ବ୍ରହ୍ମପୁରରେ ମହିଳାଙ୍କ ସନ୍ଦେହଜନକ ମୃତ୍ୟୁ: ଛାତି ଉପରେ ପଡ଼ିଛି ପଥର ଶିଳ, ହତ୍ୟା ନା ଆତ୍ମହତ୍ୟାକୁ ନେଇ ରହସ୍ୟ

ବ୍ରହ୍ମପୁର : ବ୍ରହ୍ମପୁର ସହରର ସିଦ୍ଧାର୍ଥ ନଗର ଦ୍ୱିତୀୟ ଗଳିରେ ଜଣେ ମହିଳାଙ୍କ ସନ୍ଦେହଜନକ ମୃତ୍ୟୁକୁ ନେଇ ଚାଞ୍ଚଲ୍ୟ ଖେଳିଯାଇଛି। ମୃତ ମହିଳା ଜଣକ ହେଲେ ଅଶାନ୍ତି ସେଠୀ। ଆଜି ସକାଳେ ତାଙ୍କ ମୃତଦେହ ଉଦ୍ଧାର କରାଯାଇଥିବା ବେଳେ ମୃତ୍ୟୁର କାରଣକୁ ନେଇ ସନ୍ଦେହ ସୃଷ୍ଟି ହୋଇଛି।
ସୂଚନା ଅନୁସାରେ, ଅଶାନ୍ତି ସେଠୀ ଘରେ ଏକାକୀ ରହୁଥିଲେ। ଆଜି ସକାଳେ ସ୍ଥାନୀୟ ଲୋକେ ତାଙ୍କୁ ମୃତ ଅବସ୍ଥାରେ ପଡ଼ିଥିବା ଦେଖି ପରିବାର ଲୋକଙ୍କୁ ଖବର ଦେଇଥିଲେ। ସମ୍ପର୍କୀୟମାନେ ପହଞ୍ଚି ଦେଖିବା ବେଳକୁ ଅଶାନ୍ତିଙ୍କ ଛାତି ଉପରେ ଏକ ପଥର ଶିଳ (ମସଲା ବାଟିବା ପଥର) ପଡ଼ି ରହିଥିଲା। ଏହା ଦେଖି ପରିବାର ପକ୍ଷରୁ ତୁରନ୍ତ ବୈଦ୍ୟନାଥପୁର ଥାନା ପୋଲିସକୁ ସୂଚନା ଦିଆଯାଇଥିଲା।
ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ପରିବାର ଲୋକେ ଏହାକୁ ଏକ ଆତ୍ମହତ୍ୟା ବୋଲି କହୁଥିବା ବେଳେ, ଛାତି ଉପରେ ପଥର ପଡ଼ିଥିବା ଭଳି ପରିପାର୍ଶ୍ୱିକ ସ୍ଥିତିକୁ ଦୃଷ୍ଟିରେ ରଖି ପୋଲିସ ଏକ ସାଇଣ୍ଟିଫିକ୍ ଟିମ୍ ସହାୟତାରେ ଯାଞ୍ଚ କରୁଛି। ଏହା ଏକ ସୁଚିନ୍ତିତ ହତ୍ୟାକାଣ୍ଡ ନା ଆତ୍ମହତ୍ୟା, ତାହା ବର୍ତ୍ତମାନ ସୁଦ୍ଧା ସ୍ପଷ୍ଟ ହୋଇନାହିଁ।
ମୃତ ଅଶାନ୍ତିଙ୍କ ସାବତ ପୁଅ ମଳୟ ରଞ୍ଜନ ସେଠୀ ସୁନ୍ଦରଗଡ଼ରେ ଅବକାରୀ ବିଭାଗରେ କାର୍ଯ୍ୟରତ ଅଛନ୍ତି। ସେହିଭଳି ତାଙ୍କ ବୋହୂ ରୋଜାଲିନ୍ ସେଠୀ ନିଜ ବାପଘର ବାଣପୁରକୁ ଯାଇଥିଲେ। ଫଳରେ ଘରେ କେହି ନଥିବା ବେଳେ ଏହି ଅଘଟଣ ଘଟିଛି।

ପୋଲିସ ମୃତଦେହକୁ ଜବତ କରି ବ୍ୟବଚ୍ଛେଦ ନିମନ୍ତେ ଏମ.କେ.ସି.ଜି (MKCG) ମେଡିକାଲ କଲେଜକୁ ପଠାଇଛି। ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର ପ୍ରକୃତ କାରଣ ଜଣାପଡ଼ିବ ବୋଲି ବୈଦ୍ୟନାଥପୁର ଥାନା ପକ୍ଷରୁ ସୂଚନା ମିଳିଛି।