ହିମାଚଳ ପ୍ରଦେଶ : ହିମାଚଳ ପ୍ରଦେଶ ଚମ୍ବାରେ ଦୁର୍ଘଟଣାରେ ଚାଲିଗଲା ୭ ଜୀବନ । ବିଳମ୍ବିତ ରାତି ୨ଟାରେ ଭୟଙ୍କର ସଡ଼କ ଦୁର୍ଘଟଣାରେ ଏକ ଗାଡ଼ି ଅନିୟନ୍ତ୍ରିତ ହୋଇ ଗଭୀର ଖାଇକୁ ଖସିପଡିଥିଲା । ଦୁର୍ଘଟଣା ଏତେ ଭୟଙ୍କର ଥିଲା ଯେ, ଗାଡ଼ିଟି ସଂପୂର୍ଣ୍ଣ କ୍ଷତିଗ୍ରସ୍ତ ହୋଇଥିଲା । ମୃତକଙ୍କ ମଧ୍ୟରେ ୩ ଜଣ ମହିଳା ଏବଂ ୩ ଜଣ ପୁରୁଷ ସାମିଲ ରହିଛନ୍ତି ।
ଖବର ମୁତାବକ, ଚମ୍ବା ମସରୁଡ-ହମଲ ମାର୍ଗରେ ଗାଡ଼ି ବିଳମ୍ବିତ ରାତିରେ ଅନିୟନ୍ତ୍ରିତ ହୋଇ ଗଭୀର ଖାଇକୁ ଖସିପଡିଥିଲା । କୁଠେଢର ମହଲ ଗାଁର କିଛି ଲୋକ ବୋଲେରୋରେ ଆୟୋଜିତ ଏକ ମୁଣ୍ଡନ ସଂସ୍କାର ଧାମରେ ସାମିଲ ହେବା ପାଇଁ ଯାଇଥିଲେ । ଧାମ ଖାଇବା ପରେ ସମସ୍ତଲୋକ ବୋଲେରୋରେ ନିଜ ଘରକୁ ଫେରୁଥିଲେ । ଏହି ସମୟରେ ଗାଡ଼ି ଗଭୀର ଖାଇକୁ ଖସିପଡିଥିଲା । ଘଟଣା ବିଷୟରେ ସୂଚନା ପାଇବା ପରେ ପୋଲିସ, ପ୍ରଶାସନ ଏବଂ ସ୍ଥାନୀୟ ଲୋକ ଉଦ୍ଧାର କାର୍ଯ୍ୟ କରିଥିଲେ । ଗାଁ ଲୋକ ଗଭୀର ଖାଇକୁ ଯାଇ ମୃତଦେହ ଉଦ୍ଧାର କରିବାରେ ସହାୟତା କରିଥିଲେ । ଅନ୍ଧାର ଏବଂ ଦୁର୍ଗମ ଅଞ୍ଚଳ ହେବା କାରଣରୁ ଉଦ୍ଧାର କାର୍ଯ୍ୟରେ କଠିନ ପରିଶ୍ରମ କରିବାକୁ ପଡିଥିଲା ।
ସ୍ଥାନୀୟ ଲୋକଙ୍କ କହିବା ମୁତାବକ, ଯେଉଁ ସ୍ଥାନରେ ଦୁର୍ଘଟଣା ହୋଇଛି, ସେହି ସ୍ଥାନରେ କ୍ରାସ୍ ବେରିଅର ଲାଗିନଥିଲା । ଦୁର୍ଘଟଣା ପରେ ସ୍ଥାନୀୟ ଅଞ୍ଚଳରେ ଶୋକର ଲହରୀ ଖେଳିଯାଇଛି । ପୋଲିସ ଦୁର୍ଘଟଣାର କାରଣ ଯାଞ୍ଚ ଆରମ୍ଭ କରୁଛି । ପ୍ରଶାସନ ତରଫରୁ ମୃତକଙ୍କ ପରିଚୟ ଏବଂ ଅନ୍ୟ ଔପଚାରିକତା ପୂରଣ କରାଯିବ ।
ସୂଚନାଯୋଗ୍ୟ, ଚମ୍ବା ଜିଲ୍ଲାରେ ଭୟଙ୍କର ସଡ଼କ ଦୁର୍ଘଟଣା ଦୁଇଦିନ ତଳେ ହୋଇଥିଲା । ଏନଏଚ-୧୫୪ଏରେ ବନିଖେତ-ଚମ୍ବା ମାର୍ଗ ସ୍ଥିତ ଡ୍ୟାମ୍ ଭ୍ୟୁ ପଏଣ୍ଟ ନିକଟରେ ହୋଇଛି । ଏକ କାର ଅନିୟନ୍ତ୍ରିତ ହୋଇ ଖାଇକୁ ଖସିପଡିଥିଲା । କାରରେ ୨ ଜଣ ଲୋକ ରହିଥିଲେ । ଦୁର୍ଘଟଣା ପରେ ସ୍ଥାନୀୟ ଲୋକ ତୁରନ୍ତ ପୋଲିସ ଏବଂ ପ୍ରଶାସନକୁ ସୂଚନା ଦେଇଥିଲା । କଠିନ ପରିଶ୍ରମ କରିବା ପରେ ୨ ଜଣ ବ୍ୟକ୍ତିଙ୍କ ମୃତଦେହ ଉଦ୍ଧାର କରାଯାଇଥିଲା ।
