ଦୁବାଇ: ପାରସ୍ୟ ଉପସାଗର ଅଞ୍ଚଳରେ ବଢ଼ୁଥିବା ଭୂ-ରାଜନୈତିକ ତିକ୍ତତା ଓ ସୁରକ୍ଷା ବିପତ୍ତି ମଧ୍ୟରେ ସଂଯୁକ୍ତ ଆରବ ଏମିରେଟ୍ସ (ୟୁଏଇ) ଏକ ବଡ଼ ପଦକ୍ଷେପ ନେବାକୁ ଯାଉଛି। ବିଶ୍ୱର ସବୁଠାରୁ ଗୁରୁତ୍ୱପୂର୍ଣ୍ଣ ସାମୁଦ୍ରିକ ବାଣିଜ୍ୟିକ ପଥ ‘ହର୍ମୁଜ୍ ପ୍ରଣାଳୀ’ ଉପରେ ନିଜର ନିର୍ଭରଶୀଳତା ହ୍ରାସ କରିବା ପାଇଁ ୟୁଏଇ ଏକ ନୂତନ ବନ୍ଦର ନିର୍ମାଣ କରିବାକୁ ଯୋଜନା କରୁଛି। ୟୁଏଇ ସରକାରଙ୍କ ଅଧୀନରେ ଥିବା ବିଶ୍ୱର ପ୍ରସିଦ୍ଧ ବନ୍ଦର ପରିଚାଳନାକାରୀ ସଂସ୍ଥା ‘ଡିପି ୱାର୍ଲ୍ଡ’ ସଂଯୁକ୍ତ ଆରବ ଏମିରେଟ୍ସର ପୂର୍ବ ଉପକୂଳରେ ଥିବା ଫୁଜୈରାର୍ ଠାରେ ଏକ ନୂତନ ବହୁମୁଖୀ ବନ୍ଦର ଓ କଣ୍ଟେନର ଟର୍ମିନାଲ୍ ନିର୍ମାଣ କରିବା ପାଇଁ ଆଲୋଚନା ଚଳାଇଛି। ଏହି ନୂତନ ବନ୍ଦର ନିର୍ମାଣ ହେବା ଫଳରେ ମାଲବାହୀ ଜାହାଜଗୁଡ଼ିକୁ ବିବାଦୀୟ ହର୍ମୁଜ ପ୍ରଣାଳୀ ଦେଇ ଯିବାକୁ ପଡ଼ିବ ନାହିଁ। ସେଠାରେ କଣ୍ଟେନରଗୁଡ଼ିକୁ ଓହ୍ଲାଇବା ପରେ ସ୍ଥଳପଥରେ ଟ୍ରକ୍ ଯୋଗେ ଦୁବାଇ, ଆବୁଧାବି ଏବଂ ଅନ୍ୟ ଉପସାଗରୀୟ ଦେଶଗୁଡ଼ିକୁ ସହଜରେ ପଠାଯାଇପାରିବ। ଆମେରିକା ଓ ଇରାନ ମଧ୍ୟରେ ଚାଲିଥିବା ଯୁଦ୍ଧ ଏବଂ ଇରାନ ହର୍ମୁଜ ପ୍ରଣାଳୀକୁ ବାରମ୍ବାର ବନ୍ଦ ରଖିବା ଯୋଗୁଁ ଦୁବାଇର ପ୍ରମୁଖ ବନ୍ଦର ‘ଜେବେଲ୍ ଅଲି’ ର ବ୍ୟବସାୟ ସମ୍ପୂର୍ଣ୍ଣ ପ୍ରଭାବିତ ହୋଇଛି। ଯୁଦ୍ଧ ପୂର୍ବରୁ ଏହି ବନ୍ଦର ଦେଇ ଦୈନିକ ପ୍ରାୟ ୪୦,୦୦୦ କଣ୍ଟେନର ଯାତାୟାତ କରୁଥିବା ବେଳେ ବର୍ତ୍ତମାନ ତାହା ହ୍ରାସ ପାଇ ମାତ୍ର ୧,୦୦୦ ରେ ପହଞ୍ଚିଛି (ପ୍ରାୟ ୯୭ ପ୍ରତିଶତ ହ୍ରାସ)। ଏହି ବିପୁଳ କ୍ଷୟକ୍ଷତିକୁ ଦୃଷ୍ଟିରେ ରଖି ୟୁଏଇ ସରକାର ନିଜ ଅର୍ଥନୀତିକୁ ଭବିଷ୍ୟତର ଯୁଦ୍ଧ ଓ ସଙ୍କଟରୁ ସୁରକ୍ଷିତ ରଖିବା ପାଇଁ ଏହି ବିକଳ୍ପ ବାଣିଜ୍ୟିକ ମାର୍ଗ ପ୍ରସ୍ତୁତ କରିବାକୁ ଯୋଜନା କରିଛନ୍ତି। ଏହି ପ୍ରକଳ୍ପ ଦ୍ୱାରା ଦୁବାଇ ନିଜର ଅନ୍ତର୍ଜାତୀୟ ବ୍ୟାବସାୟିକ ପ୍ରତିଷ୍ଠା ଓ ସାମୁଦ୍ରିକ ବାଣିଜ୍ୟ ସାମର୍ଥ୍ୟକୁ ବଜାୟ ରଖିବ। ଫଳରେ ଆଗାମୀ ଦିନରେ ଇରାନ କିମ୍ବା ଅନ୍ୟ କୌଣସି ଆଞ୍ଚଳିକ ବିବାଦ ୟୁଏଇର ସ୍ଥଳ ବାଣିଜ୍ୟ ଉପରେ ପ୍ରତିବନ୍ଧକ ସୃଷ୍ଟି କରିପାରିବ ନାହିଁ।
