ଭୁବନେଶ୍ୱର: ରାଜ୍ୟରେ ଥିବା ସରକାରୀ ଔଦ୍ୟୋଗିକ ପ୍ରଶିକ୍ଷଣ ପ୍ରତିଷ୍ଠାନ (ଆଇଟିଆଇ) ଗୁଡ଼ିକର ନାମକରଣରେ ସରକାର ଏକ ବଡ଼ ଧରଣର ପରିବର୍ତ୍ତନ ଆଣିଛନ୍ତି। ବିଭିନ୍ନ ଜିଲ୍ଲା ଏବଂ ସହରଗୁଡ଼ିକର ସଂଶୋଧିତ ଭୌଗୋଳିକ ନାମକରଣ ସହିତ ସାମଞ୍ଜସ୍ୟ ରଖି ରାଜ୍ୟର ମୋଟ ୨୮ଟି ସରକାରୀ ଆଇଟିଆଇର ନାମ ସଂଶୋଧନ କରାଯାଇଛି। ଏହି ନୂତନ ନାମକୁ ତୁରନ୍ତ ପ୍ରଭାବରୁ କାର୍ଯ୍ୟକାରୀ କରିବା ଲାଗି ରାଜ୍ୟ କୌଶଳ ବିକାଶ ଓ ବୈଷୟିକ ଶିକ୍ଷା ବିଭାଗ ପକ୍ଷରୁ ବିଧିବଦ୍ଧ ବିଜ୍ଞପ୍ତି ଜାରି କରାଯାଇଛି।
ସରକାରୀ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ରାଜସ୍ୱ ଓ ବିପର୍ଯ୍ୟୟ ପରିଚାଳନା ବିଭାଗ ପକ୍ଷରୁ ରାଜ୍ୟର ବିଭିନ୍ନ ଭୌଗୋଳିକ ସ୍ଥାନର ନାମକରଣରେ ପୂର୍ବରୁ ସଂଶୋଧନ କରାଯାଇଥିଲା। ସେହି ତାଲିକାକୁ ଆଧାର କରି ବୈଷୟିକ ଶିକ୍ଷା ବିଭାଗ ନିଜ ଅଧୀନରେ ଥିବା ଏହି ୨୮ଟି ଆଇଟିଆଇର ନାମରେ ପରିବର୍ତ୍ତନ ଆଣିବାକୁ ନିଷ୍ପତ୍ତି ନେଇଛି, ଯାହା ଫଳରେ ସରକାରୀ ନାମକରଣରେ ଏକରୂପତା ବଜାୟ ରହିବ।
ସବୁ ସରକାରୀ ନଥିପତ୍ରରେ ବ୍ୟବହାର ହେବ ନୂଆ ନାମ ବିଭାଗୀୟ ବିଜ୍ଞପ୍ତି ମୁତାବକ, ଏହି ସଂଶୋଧନ ତୁରନ୍ତ ଲାଗୁ ହେବ। ଏଣିକି ଆଇଟିଆଇ ସମ୍ପର୍କିତ ସମସ୍ତ ସରକାରୀ ନଥିପତ୍ରରେ କେବଳ ନୂଆ ନାମ ହିଁ ବ୍ୟବହାର କରାଯିବ। ଛାତ୍ରଛାତ୍ରୀଙ୍କ ପ୍ରମାଣପତ୍ର (ସାର୍ଟିଫିକେଟ୍) ଓ ଆଡମିଶନ୍ ଦସ୍ତାବିଜ୍ ବିଭାଗୀୟ କାର୍ଯ୍ୟାଳୟର ପତ୍ରାଚାର ସମସ୍ତ ପ୍ରଶାସନିକ ଏବଂ ଅଧିକୃତ ରେକର୍ଡ ଉପରୋକ୍ତ ସମସ୍ତ କ୍ଷେତ୍ରରେ ପୁରୁଣା ନାମ ବଦଳରେ ସଂଶୋଧିତ ନାମ ଉଲ୍ଲେଖ କରିବାକୁ କଡ଼ା ନିର୍ଦ୍ଦେଶ ଦିଆଯାଇଛି।
ଏହି ନିଷ୍ପତ୍ତି ସମ୍ପର୍କରେ ସମସ୍ତ ସମ୍ପୃକ୍ତ ସରକାରୀ ପ୍ରଶିକ୍ଷଣ ପ୍ରତିଷ୍ଠାନର ଅଧ୍ୟକ୍ଷ, ବୈଷୟିକ ଶିକ୍ଷାନୁଷ୍ଠାନ ଏବଂ ସମ୍ପୃକ୍ତ ବିଭାଗୀୟ ଅଧିକାରୀମାନଙ୍କୁ ଅବଗତ କରାଯାଇଛି। ନୂଆ ନାମକୁ କଡ଼ାକଡ଼ି ଭାବେ ଅନୁସରଣ କରି ଆବଶ୍ୟକୀୟ ପ୍ରଶାସନିକ ପଦକ୍ଷେପ ନେବାକୁ ବିଭାଗ ନିର୍ଦ୍ଦେଶ ଦେଇଛି। ଏହା ସହିତ ସରକାରଙ୍କ ଏହି ସଂଶୋଧିତ ନାମକରଣ ଆଦେଶନାମାକୁ ଖୁବ୍ଶୀଘ୍ର ରାଜ୍ୟ ସରକାରଙ୍କ ଓଡ଼ିଶା ଗେଜେଟ୍ରେ ପ୍ରକାଶ କରିବା ଲାଗି ମଧ୍ୟ ବ୍ୟବସ୍ଥା କରାଯାଇଥିବା ସୂଚନା ମିଳିଛି।
