ନୂଆଦିଲ୍ଲୀ: ଅଗଷ୍ଟ ୧୫ ସ୍ୱାଧୀନତା ଦିବସକୁ ଦୃଷ୍ଟିରେ ରଖି ଦେଶର ରାଜଧାନୀ ଦିଲ୍ଲୀରେ ହାଇ ଆଲର୍ଟ ଜାରି କରାଯାଇଛି। ପାକିସ୍ତାନ ସମର୍ଥିତ ଆତଙ୍କବାଦୀ ସଂଗଠନ, ଖାଲିସ୍ତାନୀ ତତ୍ତ୍ୱ ଏବଂ ହଠାତ୍ ବିରୋଧ ପ୍ରଦର୍ଶନ (ସ୍ନାପ୍ ପ୍ରୋଟେଷ୍ଟ)ର ଆଶଙ୍କାକୁ ନଜରରେ ରଖି ଦିଲ୍ଲୀ ପୋଲିସ ଓ ସୁରକ୍ଷା ଏଜେନ୍ସିଗୁଡ଼ିକ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା କରାଯାଇଛି। ବିଶେଷକରି ଐତିହାସିକ ଲାଲକିଲ୍ଲା ଏବଂ ଏହାର ଆଖପାଖ ଅଞ୍ଚଳରେ କଡ଼ା ସୁରକ୍ଷା ବଳୟ ସୃଷ୍ଟି କରାଯାଇଛି।
ସୂଚନା ଅନୁଯାୟୀ, ସ୍ୱାଧୀନତା ଦିବସ ସମାରୋହରେ ପ୍ରାୟ ୨୪ ହଜାର ଅତିଥି ଯୋଗଦେବାର ସମ୍ଭାବନା ରହିଛି। ଏହାକୁ ଦୃଷ୍ଟିରେ ରଖି ୧୨ ହଜାରରୁ ଅଧିକ ଦିଲ୍ଲୀ ପୋଲିସ କର୍ମଚାରୀ ସୁରକ୍ଷା ଦାୟିତ୍ୱରେ ମୁତୟନ ହେବେ। ଦିଲ୍ଲୀ ପୁଲିସ ସହ ବିଭିନ୍ନ ସୁରକ୍ଷା ଓ ଗୁଇନ୍ଦା ଏଜେନ୍ସି ମିଳିତ ଭାବେ ସମଗ୍ର ବ୍ୟବସ୍ଥା ଉପରେ ନଜର ରଖିବେ।
ଲାଲକିଲ୍ଲା ଓ ଏହାର ଆଖପାଖ ଅଞ୍ଚଳରେ ୧୦୦୦ରୁ ଅଧିକ AI ଆଧାରିତ CCTV କ୍ୟାମେରା ଲଗାଯାଇଛି। AI ଭିଡିଓ ଆନାଲିଟିକ୍ସ ଜରିଆରେ ରିଅଲ୍-ଟାଇମ୍ ନଜରଦାରି କରାଯିବ। ଏହା ସହ ଭିଡ଼ ନିୟନ୍ତ୍ରଣ, ସନ୍ଦିଗ୍ଧ କାର୍ଯ୍ୟକଳାପ ଚିହ୍ନଟ ଏବଂ ଯେକୌଣସି ଅସ୍ୱାଭାବିକ ପରିସ୍ଥିତିକୁ ତୁରନ୍ତ ମୁକାବିଲା କରିବା ପାଇଁ ବିଶେଷ ବ୍ୟବସ୍ଥା କରାଯାଇଛି।
ସୁରକ୍ଷା ବ୍ୟବସ୍ଥାରେ କ୍ୱିକ୍ ରିଆକ୍ସନ୍ ଟିମ୍ (QRT), SWAT କମାଣ୍ଡୋ, ସ୍ନାଇପର୍, ବମ୍ ନିରୋଧକ ଦଳ ଏବଂ ଡଗ୍ ସ୍କ୍ୱାଡ୍ ମୁତୟନ କରାଯିବ। ଏଥିସହ ଲାଲକିଲ୍ଲା ପରିସରରେ ପ୍ରବେଶ ପୂର୍ବରୁ କଡ଼ା ଆକ୍ସେସ୍ କଣ୍ଟ୍ରୋଲ୍ ଏବଂ ଆଣ୍ଟି-ସାବୋଟାଜ୍ ଚେକିଂ କରାଯିବ, ଯାହାଦ୍ୱାରା କୌଣସି ସୁରକ୍ଷା ତ୍ରୁଟି ନ ରହେ।
ସ୍ୱାଧୀନତା ଦିବସ ପୂର୍ବରୁ ଦିଲ୍ଲୀର ବିଭିନ୍ନ ସ୍ଥାନରେ ଯାନବାହନର କଡ଼ା ଯାଞ୍ଚ, ନିୟମିତ ପାଟ୍ରୋଲିଂ ଏବଂ ସମଗ୍ର ସୁରକ୍ଷା କ୍ଷେତ୍ରରେ କଡ଼ା ନଜରଦାରି କରାଯିବ। ସରକାରୀ ପ୍ରତିଷ୍ଠାନ, ସମ୍ବେଦନଶୀଳ ଅଞ୍ଚଳ, ବସ୍ ଷ୍ଟାଣ୍ଡ, ରେଳ ଷ୍ଟେସନ୍ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ସ୍ଥାନରେ ମଧ୍ୟ ସୁରକ୍ଷା ବ୍ୟବସ୍ଥା ବଢ଼ାଯାଇଛି।
ଗୁଇନ୍ଦା ସଂସ୍ଥାର ସୂଚନା ଆଧାରରେ ଦିଲ୍ଲୀ ପୋଲିସ ଏକ ସ୍ୱତନ୍ତ୍ର ସୁରକ୍ଷା ବ୍ଲୁପ୍ରିଣ୍ଟ ପ୍ରସ୍ତୁତ କରିଛି। ବିଶେଷକରି ଲୁଟିଏନ୍ସ ଦିଲ୍ଲୀରେ କଡ଼ା ସୁରକ୍ଷା ବ୍ୟବସ୍ଥା କରାଯିବ। ସମସ୍ତ ପ୍ରମୁଖ ରାସ୍ତାରେ ବ୍ୟାରିକେଡିଂ କରାଯିବା ସହ ପ୍ରତ୍ୟେକ ଗାଡ଼ିର ଯାଞ୍ଚ କରାଯିବ।
ପ୍ରତିବର୍ଷ ପରି ଚଳିତ ବର୍ଷ ମଧ୍ୟ ସ୍ୱାଧୀନତା ଦିବସ ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଐତିହାସିକ ଲାଲକିଲ୍ଲା ପ୍ରାଚୀରରୁ ଜାତୀୟ ପତାକା ଉତ୍ତୋଳନ କରିବେ ଏବଂ ଦେଶବାସୀଙ୍କୁ ସମ୍ବୋଧନ କରିବେ। ଏହି ଭାଷଣରେ ସରକାରଙ୍କ ବିକାଶମୂଳକ କାର୍ଯ୍ୟକ୍ରମ, ଭବିଷ୍ୟତର ରୋଡମ୍ୟାପ୍ ଏବଂ ଦେଶର ବିଭିନ୍ନ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଉପରେ ସେ ମତ ରଖିବେ। ଏହାକୁ ଦୃଷ୍ଟିରେ ରଖି ରାଜଧାନୀରେ ସର୍ବୋଚ୍ଚ ସ୍ତରର ସୁରକ୍ଷା ବ୍ୟବସ୍ଥା କରାଯାଇଛି।
