ସମ୍ବଲପୁର:
ପାଣିପାଗର ସଠିକ୍ ଓ ଆଗୁଆ ପୂର୍ବାନୁମାନ କରିବା ଲକ୍ଷ୍ୟରେ ସମ୍ବଲପୁର ଜମଦାରପାଲି ରୋଡ୍ ସ୍ଥିତ ମଧୁପୁରଠାରେ ଏକ ନୂତନ ଡପଲର୍ ପାଣିପାଗ ରାଡାର୍ କେନ୍ଦ୍ର ଉଦ୍ଘାଟିତ ହୋଇଯାଇଛି। ବୁଧବାର ଦିନ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ମୁଖ୍ୟ ଅତିଥି ଭାବେ ଯୋଗଦେଇ ଏହି ଆଧୁନିକ କେନ୍ଦ୍ରକୁ ଲୋକାର୍ପିତ କରିଛନ୍ତି।
ଏହି ଉଦ୍ଘାଟନୀ ସମାରୋହରେ କେନ୍ଦ୍ର ରାଷ୍ଟ୍ରମନ୍ତ୍ରୀ ଡ. ଜିତେନ୍ଦ୍ର ସିଂହ ଭର୍ଚୁଆଲ୍ ମାଧ୍ୟମରେ ଯୋଗ ଦେଇଥିବା ବେଳେ ରାଜସ୍ୱ ମନ୍ତ୍ରୀ ସୁରେଶ ପୂଜାରୀ, ଭାରତୀୟ ପାଣିପାଗ ବିଭାଗ (ଆଇଏମ୍ଡି)ର ମହାନିର୍ଦ୍ଦେଶକ ଡ. ମୃତ୍ୟୁଞ୍ଜୟ ମହାପାତ୍ର ଏବଂ ସ୍ୱତନ୍ତ୍ର ରିଲିଫ୍ କମିଶନର ତଥା ଓଏସ୍ଡିଏମ୍ଏ (OSDMA) ପରିଚାଳନା ନିର୍ଦ୍ଦେଶକ ରାଜେଶ ପ୍ରଭାକର ପାଟିଲ ପ୍ରମୁଖ ଉପସ୍ଥିତ ଥିଲେ।
ଭାରତୀୟ ପାଣିପାଗ ବିଜ୍ଞାନ ବିଭାଗ ଏବଂ ରାଜ୍ୟ ରାଜସ୍ୱ ଓ ବିପର୍ଯ୍ୟୟ ପରିଚାଳନା ବିଭାଗ ଅଧୀନସ୍ଥ ଓଡ଼ିଶା ରାଜ୍ୟ ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷ (ଓଏସ୍ଡିଏମ୍ଏ)ର ମିଳିତ ସହଯୋଗରେ ଏହି କେନ୍ଦ୍ର ନିର୍ମିତ ହୋଇଛି। ପୂର୍ବରୁ ଉପକୂଳବର୍ତ୍ତୀ ପାରାଦୀପ ଓ ଗୋପାଳପୁରରେ ଦୁଇଟି ଡପଲର୍ ରାଡାର୍ କାର୍ଯ୍ୟକ୍ଷମ ଥିବା ବେଳେ ଏବେ ସମ୍ବଲପୁରଠାରେ ତୃତୀୟ କେନ୍ଦ୍ର ସ୍ଥାପନ ଦ୍ୱାରା ରାଜ୍ୟର ଆଭ୍ୟନ୍ତରୀଣ ଭାଗରେ ପାଣିପାଗ ନିରୀକ୍ଷଣ ବ୍ୟବସ୍ଥା ଅଧିକ ଶକ୍ତିଶାଳୀ ହେବ।
କ’ଣଏହିଡପଲର୍ରାଡାର୍ଏବଂଏହାରଉପଯୋଗିତା:
- କାର୍ଯ୍ୟପ୍ରଣାଳୀ: ଡପଲର୍ ପାଣିପାଗ ରାଡାର୍ ରେଡ଼ିଓ ତରଙ୍ଗ ବିଶ୍ଳେଷଣ କରି ବାୟୁମଣ୍ଡଳରେ ମେଘ, ବୃଷ୍ଟିପାତ ଏବଂ ଝଡ଼ର ଦୂରତା, ବେଗ ତଥା ଗତିପଥ ସଠିକ୍ ଭାବେ ଚିହ୍ନଟ କରିପାରେ।
- ସି–ବ୍ୟାଣ୍ଡକ୍ଷମତା: ସମ୍ବଲପୁରରେ ସ୍ଥାପିତ ହୋଇଥିବା ଏହି ‘ସି-ବ୍ୟାଣ୍ଡ’ (C-Band) ରାଡାର୍ ପ୍ରାୟ ୧୫୦ କିଲୋମିଟର ପରିଧି ମଧ୍ୟରେ ପ୍ରଭାବଶାଳୀ ଭାବେ କାର୍ଯ୍ୟ କରିବ।
- ଉପକୃତହେବେ୯ଜିଲ୍ଲା: ଏହି କେନ୍ଦ୍ର ଦ୍ୱାରା ସମ୍ବଲପୁର ସମେତ ଝାରସୁଗୁଡ଼ା, ସୁନ୍ଦରଗଡ଼, ବରଗଡ଼, ବଲାଙ୍ଗୀର, ସୋନପୁର, ବୌଦ୍ଧ, ଅନୁଗୋଳ ଏବଂ ନୂଆପଡ଼ା ଜିଲ୍ଲାର ପାଣିପାଗ ସମ୍ପର୍କିତ ସୂଚନା ଶୀଘ୍ର ଓ ସଠିକ୍ ଭାବେ ମିଳିପାରିବ।
- ଜଳପରିଚାଳନାରେସହାୟକ: ଉପରମୁଣ୍ଡରେ ବର୍ଷାର ପରିମାଣ ଜଣାପଡ଼ିବା ଫଳରେ ହୀରାକୁଦ ଜଳଭଣ୍ଡାରର ଜଳ ପରିଚାଳନା ଅଧିକ ସୁବ୍ୟବସ୍ଥିତ ହେବ।
ଏହି ଅତ୍ୟାଧୁନିକ ରାଡାର୍ ବ୍ୟବସ୍ଥା କାର୍ଯ୍ୟକ୍ଷମ ହେବା ଫଳରେ ପ୍ରାକୃତିକ ବିପର୍ଯ୍ୟୟ ପରିଚାଳନା, ବିମାନ ଚଳାଚଳ ଏବଂ କୃଷି କାର୍ଯ୍ୟ ପାଇଁ ସମୟୋପଯୋଗୀ ପୂର୍ବାନୁମାନ କରିବା ସହଜ ହେବ ବୋଲି ବିଭାଗ ପକ୍ଷରୁ କୁହାଯାଇଛି !
