କୋରାପୁଟ :–15/10/26–: ଧାନ ଚାଷରୁ ନିର୍ଗତ ହେଉଥିବା ମିଥେନ୍ ଗ୍ୟାସ୍ ହ୍ରାସ କରିବା ଉଦ୍ଦେଶ୍ୟରେ ‘ବେଟର୍ ରାଇସ୍ ଇନିସିଏଟିଭ୍’ ଏକ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି l
ପ୍ରକଳ୍ପ ସାମାଜିକ ଉତ୍ଥାନ ଅଧୀନରେ କାର୍ଯ୍ୟକାରୀ ହେଉଥିବା ଏହି ପଦକ୍ଷେପ ଧାନ ଚାଷରେ ଅଲ୍ଟରନେଟ୍ ୱେଟିଂ ଆଣ୍ଡ ଡ୍ରାଇଂ (AWD) ବା ପର୍ଯ୍ୟାୟକ୍ରମେ ଜଳସେଚନ ଓ ଶୁଖାଇବା ପଦ୍ଧତିକୁ ପ୍ରୋତ୍ସାହିତ କରୁଛି। ଆୟୋଜକଙ୍କ କହିବା ଅନୁଯାୟୀ, ଏହି ପଦ୍ଧତି ଦ୍ୱାରା ଧାନ କ୍ଷେତରେ ଜଳ ବ୍ୟବହାର ୨୦ରୁ ୩୦ ପ୍ରତିଶତ ହ୍ରାସ ପାଇପାରିବ ଏବଂ କାର୍ବନ ମାର୍କେଟ ମାଧ୍ୟମରେ ଚାଷୀଙ୍କ ପାଇଁ ଅତିରିକ୍ତ ଆୟର ସୁଯୋଗ ସୃଷ୍ଟି ହେବ l
ଏଠାରେ ଚାଷୀ, ସ୍ୱୟଂ ସହାୟକ ଗୋଷ୍ଠୀ (SHG)ର ମହିଳା ସଦସ୍ୟା, ଯୁବକ ସଂଘ ସଦସ୍ୟ, ୱାର୍ଡ ସଦସ୍ୟ, ଜନପ୍ରତିନିଧି, ସାମାଜିକ ସଂଗଠନର ପ୍ରତିନିଧି ଓ ପ୍ରକଳ୍ପ ଅଧିକାରୀଙ୍କ ସମେତ ପ୍ରାୟ 240 ଜଣ ଯୋଗ ଦେଇଥିଲେ।
ଚାନ୍ଦିଲି, ଢlମନା ହାଣ୍ଡି, ମୁର୍ତ୍ତାହାଣ୍ଡି, ସଡରଙ୍ଗା,ଭୋଂସୁଳି , ସୁତିପଦର, ଏସ୍.ବି. ନୂଆଗାଁ ଓ ବୋବେୟା ଗ୍ରାମ ପଞ୍ଚାୟତର ଲୋକପ୍ରତିନିଧି ଯୋଗ ଦେଇ ଅଞ୍ଚଳର ଚାଷୀଙ୍କୁ ପ୍ରୋତ୍ସାହିତ କରିଥିଲେ l
କୋର୍ କାର୍ବନଏକ୍ସ ସଲ୍ୟୁସନ୍ସ ପ୍ରାଇଭେଟ୍ ଲିମିଟେଡ୍ (CCX), ଗାଲାକ୍ସି ସର୍ଫାକ୍ଟାଣ୍ଟସ୍ ଲିମିଟେଡ୍, କୋର୍ କାର୍ବନଏକ୍ସ ଫାଉଣ୍ଡେସନ୍ ଓ ଶୋଭା (SOVA) କୋରାପୁଟର ମିଳିତ ପ୍ରଚେଷ୍ଟାରେ ଏହି ପ୍ରକଳ୍ପ ପରିକଳ୍ପିତ କରାଯାଇଛି । ଧାନ କ୍ଷେତରେ ଜଳ ପରିଚାଳନାରେ ଉନ୍ନତି ଆଣି ଜଳର ଦକ୍ଷ ବ୍ୟବହାର ଓ ମିଥେନ୍ ନିର୍ଗମନ ହ୍ରାସ କରିବା ଏହାର ମୁଖ୍ୟ ଲକ୍ଷ୍ୟ।
ଶୋଭାର ପ୍ରକଳ୍ପ ପରିଚାଳକ ଅମଜଦ ଖାନ ସ୍ୱାଗତ ଭାଷଣ ଦେବା ସହ ଅତିଥି ଓ ଅଂଶଗ୍ରହଣକାରୀଙ୍କୁ ପରିଚିତ କରାଇଥିଲେ। ଏହା ପରେ ପ୍ରକଳ୍ପର ଉଦ୍ଦେଶ୍ୟ, ଚାଷ ଜମି ଚୟନର ମାନଦଣ୍ଡ, ଚାଷୀଙ୍କ ଭୂମିକା ଓ ଦାୟିତ୍ୱ ଏବଂ ସମ୍ଭାବ୍ୟ ଲାଭ ଓ ବିପଦ ଉପରେ ବିସ୍ତୃତ ଆଲୋଚନା ହୋଇଥିଲା।
AWD ପଦ୍ଧତିରେ ଧାନ କ୍ଷେତକୁ ସବୁବେଳେ ପାଣିରେ ବୁଡ଼ାଇ ରଖାଯାଏ ନାହିଁ। ଆବଶ୍ୟକତା ଅନୁସାରେ ଜଳସେଚନ କରାଯାଏ ଏବଂ ନିୟନ୍ତ୍ରିତ ସମୟ ପାଇଁ କ୍ଷେତକୁ ଶୁଖିବାକୁ ଦିଆଯାଏ। ଏହାଦ୍ୱାରା ଜଳସେଚନ ପାଣିର ବ୍ୟବହାର ଓ ମିଥେନ୍ ନିର୍ଗମନ ଉଭୟ କମିଥାଏ। ଚାଷୀମାନଙ୍କୁ ଏହି ପଦ୍ଧତି ବୁଝାଇବା ପାଇଁ ବୈଠକରେ କ୍ଷେତର ଜଳସ୍ତର ମାପିବା ନଳୀର ପ୍ରଦର୍ଶନ କରାଯାଇଥିଲା।
ହାଇଦ୍ରାବାଦସ୍ଥିତ କୋର୍ କାର୍ବନଏକ୍ସ ଫାଉଣ୍ଡେସନର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ କବିତା ସାହାନୀ ଅଂଶୀଦାର ପରାମର୍ଶ ପ୍ରକ୍ରିୟା ଏବଂ ପ୍ରକଳ୍ପରେ ସ୍ଥାନୀୟ ସମୁଦାୟର ଅଂଶଗ୍ରହଣର ଆବଶ୍ୟକତା ବିଷୟରେ ବୁଝାଇଥିଲେ।
ଶୋଭାର ସଭାପତି ମଦନ କ୍ରିଶାନୀ ଚାଷୀ ଚୁକ୍ତିନାମା, ଲାଭ ବଣ୍ଟନ ବ୍ୟବସ୍ଥା, ଜମି ଅଧିକାର ସମ୍ବନ୍ଧୀୟ ଦସ୍ତାବିଜ ଏବଂ ଚାଷୀଙ୍କ ତଥ୍ୟର ବ୍ୟବହାର ବିଷୟରେ ବୁଝାଇଥିଲେ। ପରିବେଶ ଓ ସାମାଜିକ ସୁରକ୍ଷା ବ୍ୟବସ୍ଥା, ସ୍ୱାଧୀନ, ପୂର୍ବ ଓ ସୂଚିତ ସମ୍ମତି (FPIC) ଏବଂ ଅଭିଯୋଗ ନିରାକରଣ ବ୍ୟବସ୍ଥା ଉପରେ ମଧ୍ୟ ଆଲୋଚନା ହୋଇଥିଲା।
କୋର୍ କାର୍ବନଏକ୍ସ ସଲ୍ୟୁସନ୍ସର ପରିଚାଳନା ନିର୍ଦ୍ଦେଶକ ନିରୋଜ ମହାନ୍ତି ପ୍ରକଳ୍ପର ଲକ୍ଷ୍ୟ ଓ ଭବିଷ୍ୟତ ଯୋଜନା ବିଷୟରେ କହିଥିଲେ। ଏହି ପ୍ରକଳ୍ପ ସ୍ଥାୟୀ ଧାନ ଚାଷ, ଉନ୍ନତ ଜଳ ପରିଚାଳନା ଓ ଗ୍ରୀନହାଉସ୍ ଗ୍ୟାସ୍ ନିର୍ଗମନ ହ୍ରାସକୁ ପ୍ରୋତ୍ସାହିତ କରିବ ବୋଲି ସେ କହିଥିଲେ।
ଗାଲାକ୍ସି ସର୍ଫାକ୍ଟାଣ୍ଟସ୍ ଲିମିଟେଡ୍ର ଚିଫ୍ ଅଫ୍ ପିପୁଲ୍, କମ୍ଫର୍ଟ, ସିକ୍ୟୁରିଟି ଆଣ୍ଡ CSR କର୍ଣ୍ଣେଲ ଅମରଜିତ ଦାସ ଚାଷୀ, ସାମାଜିକ ସଂଗଠନ, କର୍ପୋରେଟ୍ ସଂସ୍ଥା ଓ ସ୍ଥାନୀୟ ଜନପ୍ରତିନିଧିଙ୍କ ମଧ୍ୟରେ ସମନ୍ୱୟର ଆବଶ୍ୟକତା ଉପରେ ଗୁରୁତ୍ୱାରୋପ କରିଥିଲେ। ଗାଲାକ୍ସି ସର୍ଫାକ୍ଟାଣ୍ଟସ୍ର ପ୍ରତିନିଧି ଅମିତ ଗୋରି ମଧ୍ୟ କାର୍ଯ୍ୟକ୍ରମରେ ଯୋଗ ଦେଇଥିଲେ ।
‘ବେଟର୍ ରାଇସ୍ ଇନିସିଏଟିଭ୍’ ଏକ ପ୍ରସ୍ତାବିତ କାର୍ବନ କ୍ରେଡିଟ୍ ପ୍ରକଳ୍ପ। ଏକ ନିର୍ଦ୍ଦିଷ୍ଟ ପଦ୍ଧତି ବ୍ୟବହାର କରି ମିଥେନ୍ ନିର୍ଗମନ ହ୍ରାସର ମାପ କରାଯିବ ଏବଂ ଏକ ସ୍ୱାଧୀନ ଯାଞ୍ଚକାରୀ ସଂସ୍ଥା ଦ୍ୱାରା ଏହାର ଯାଞ୍ଚ ହେବ। ଆବଶ୍ୟକ ମାନଦଣ୍ଡ ପୂରଣ ହେଲେ, ଆଇସୋମେଟ୍ରିକ୍ ଷ୍ଟାଣ୍ଡାର୍ଡ ଅଧୀନରେ ଏହି ନିର୍ଗମନ ହ୍ରାସକୁ କାର୍ବନ କ୍ରେଡିଟ୍ ଭାବେ ପ୍ରମାଣୀକରଣ ପାଇଁ ଦାଖଲ କରାଯିବ।
ଆୟୋଜକଙ୍କ କହିବା ଅନୁଯାୟୀ, ଚାଷୀଙ୍କ ମଧ୍ୟରେ AWD ପଦ୍ଧତି ବିଷୟରେ ସଚେତନତା ସୃଷ୍ଟି କରିବା, ଜଳ ସଂରକ୍ଷଣର ଗୁରୁତ୍ୱ ବୁଝାଇବା ଏବଂ ପରିବେଶ ଅନୁକୂଳ ଧାନ ଚାଷକୁ ପ୍ରୋତ୍ସାହନ ଦେବା ପାଇଁ ଚାଷୀ, ଜନପ୍ରତିନିଧି ଓ ଅନ୍ୟ ଅଂଶୀଦାରଙ୍କ ମଧ୍ୟରେ ସମନ୍ୱୟ ସୁଦୃଢ଼ କରିବା ଏହି ପରାମର୍ଶ ବୈଠକର ମୁଖ୍ୟ ଉଦ୍ଦେଶ୍ୟ ଥିଲା।
ପ୍ରକଳ୍ପ ସମ୍ପର୍କରେ ଯେକୌଣସି ବ୍ୟକ୍ତି 16 ନଭେମ୍ବର 2026 ସୁଦ୍ଧା ଲିଖିତ ବା ମୌଖିକ ଭାବେ ନିଜ ମତାମତ ଦେଇପାରିବେ। ଏଥିପାଇଁ କୋରାପୁଟସ୍ଥିତ ଶୋଭା କାର୍ଯ୍ୟାଳୟ (ଫୋନ୍: 06852-357223) ସହ ଯୋଗାଯୋଗ କରାଯାଇପାରିବ।
