(୪୬ ଜଣ ନିର୍ମାଣ ଶ୍ରମିକ ହିତାଧିକାରୀଙ୍କୁ ୩୬ ଲକ୍ଷ ୯୭ ହଜାର ୨୦୦ ଟଙ୍କାର ସହାୟତା ପ୍ରଦାନ)
କୋରାପୁଟ, : ମହାନ ଜନଜାତୀୟ ସ୍ୱାଧୀନତା ସଂଗ୍ରାମୀ ଭଗବାନ ବିର୍ସା ମୁଣ୍ଡାଙ୍କ ୧୫୧ତମ ଜନ୍ମଜୟନ୍ତୀ ଅବସରରେ ନଭେମ୍ବର ୧୫ ତାରିଖକୁ ଜନଜାତୀୟ ଗୌରବ ଦିବସ ଭାବେ ପାଳନ କରାଯାଇଛି। ଏହି ଅବସରରେ କୋରାପୁଟ ଜିଲ୍ଲାର ବୈପାରିଗୁଡ଼ା ବ୍ଲକ୍ ଅନ୍ତର୍ଗତ କୋଲାରସ୍ଥିତ ଏକଲବ୍ୟ ମଡେଲ ଆବାସିକ ବିଦ୍ୟାଳୟ ପରିସରରେ ଏକ ସ୍ୱତନ୍ତ୍ର ହିତାଧିକାରୀ ସହାୟତା ବଣ୍ଟନ କାର୍ଯ୍ୟକ୍ରମ ଓ ଜନଜାତୀୟ ଗୌରବ ଦିବସ-୨୦୨୬ ଅନୁଷ୍ଠିତ ହୋଇଯାଇଛି।
ଜିଲ୍ଲାପାଳ ତଥା ଜିଲ୍ଲା ମାଜିଷ୍ଟ୍ରେଟ୍ ମନୋଜ ସତ୍ୟବାନ ମହାଜନଙ୍କ ଅଧ୍ୟକ୍ଷତାରେ ଆୟୋଜିତ ଏହି ସମାରୋହରେ କୋରାପୁଟ ବିଧାୟକ ତଥା ଜିଲ୍ଲା ଯୋଜନା କମିଟିର ଅଧ୍ୟକ୍ଷ ରଘୁରାମ ମାଛ ମୁଖ୍ୟ ଅତିଥି ଭାବେ ଯୋଗଦେଇଥିଲେ। ଅନ୍ୟମାନଙ୍କ ମଧ୍ୟରେ ଜିଲ୍ଲା ଜନଜାତି ଉନ୍ନୟନ ପରିଷଦ (ଏସ୍ଡିସି), କୋରାପୁଟର ଅଧ୍ୟକ୍ଷ ଭଗବାନ ମୁଦୁଲି, ସାଂସଦଙ୍କ ପ୍ରତିନିଧି ନରେନ୍ଦ୍ର କାନ୍ଧୁଲିଆ, ଜୟପୁର ଆଇଟିଡିଏର ପ୍ରକଳ୍ପ ପ୍ରଶାସକ ତୃପ୍ତି ବାରାଇ, କୋରାପୁଟ ଆଇଟିଡିଏର ପ୍ରକଳ୍ପ ପ୍ରଶାସକ ସ୍ନେହପ୍ରଭା ମାଝୀ, ବୈପାରିଗୁଡ଼ା ବିଡିଓ ସୁବ୍ରତ କୁମାର ସାହୁ, କୋରାପୁଟ ଏସ୍ଡିସିର ଉପାଧ୍ୟକ୍ଷ, ସହିଦ ଲକ୍ଷ୍ମଣ ନାୟକଙ୍କ ନାତି ବାଣସିଂ ମାଝୀ ଏବଂ ଜନଜାତି ନେତା ତଥା ସମାଜସେବୀ ଶିବ ମୁଦୁଲି ସମ୍ମାନିତ ଅତିଥି ଭାବେ ଯୋଗଦେଇଥିଲେ।
କାର୍ଯ୍ୟକ୍ରମରେ ନିର୍ମାଣ ଶ୍ରମିକ କଲ୍ୟାଣ ଯୋଜନା ଅଧୀନରେ ମୋଟ ୪୬ ଜଣ ଜନଜାତି ହିତାଧିକାରୀଙ୍କୁ ୩୬ ଲକ୍ଷ ୯୭ ହଜାର ୨୦୦ ଟଙ୍କାର ଆର୍ଥିକ ସହାୟତା ବଣ୍ଟନ କରାଯାଇଥିଲା। ଏଥିମଧ୍ୟରେ ଶିକ୍ଷା ସହାୟତା ବାବଦରେ ୮ ଜଣଙ୍କୁ ୬୨ ହଜାର ୨୦୦ ଟଙ୍କା, ବିବାହ ସହାୟତା ବାବଦରେ ୩ ଜଣଙ୍କୁ ୧ ଲକ୍ଷ ୫୦ ହଜାର ଟଙ୍କା, ମାତୃତ୍ୱକାଳୀନ ସହାୟତା ବାବଦରେ ୧୩ ଜଣଙ୍କୁ ୧ ଲକ୍ଷ ୩୦ ହଜାର ଟଙ୍କା, ମୃତ୍ୟୁକାଳୀନ ସହାୟତା ବାବଦରେ ୧୧ ଜଣଙ୍କୁ ୩୩ ଲକ୍ଷ ଟଙ୍କା ଏବଂ ଅନ୍ତ୍ୟେଷ୍ଟିକ୍ରିୟା ସହାୟତା ବାବଦରେ ୧୧ ଜଣଙ୍କୁ ୫୫ ହଜାର ଟଙ୍କା ପ୍ରଦାନ କରାଯାଇଥିଲା। ଏଥିସହିତ ୧୧ ଜଣ ନିର୍ମାଣ ଶ୍ରମିକଙ୍କୁ ନୂତନ ପଞ୍ଜୀକରଣ କାର୍ଡ ମଧ୍ୟ ବଣ୍ଟନ କରାଯାଇଥିଲା।
ଏହି ଅବସରରେ ଅତିଥିମାନେ ଭଗବାନ ବିର୍ସା ମୁଣ୍ଡାଙ୍କ ଅଦମ୍ୟ ସାହସ, ତ୍ୟାଗ, ସଂଘର୍ଷ ତଥା ଜନଜାତି ସମାଜର ଅଧିକାର ଓ ସ୍ୱାଭିମାନ ରକ୍ଷା ପାଇଁ ତାଙ୍କର ଅବଦାନକୁ ସ୍ମରଣ କରିଥିଲେ। ଜନଜାତି ସମାଜର ସାମଗ୍ରିକ ବିକାଶ, ଶିକ୍ଷା, ଜୀବିକା ଓ ସାମାଜିକ ସୁରକ୍ଷା ଦିଗରେ ସରକାରଙ୍କ ବିଭିନ୍ନ କଲ୍ୟାଣକାରୀ ଯୋଜନାର ସୁଫଳ ତୃଣମୂଳ ସ୍ତରରେ ପହଞ୍ଚାଇବା ଉପରେ ସେମାନେ ଗୁରୁତ୍ୱାରୋପ କରିଥିଲେ।
କାର୍ଯ୍ୟକ୍ରମରେ ଜୟପୁର ଡିଭିଜନାଲ ଲେବର କମିଶନର, କୋରାପୁଟ ଓ ଜୟପୁରର ସହକାରୀ ପ୍ରକଳ୍ପ ପ୍ରଶାସକ (ଆଇଟିଡିଏ), ଜିଲ୍ଲା ମଙ୍ଗଳ ଅଧିକାରୀ, ଜୟପୁରର ଶ୍ରମ ଅଧିକାରୀ (ଏନଫୋର୍ସମେଣ୍ଟ) ଓ ଶ୍ରମ ଅଧିକାରୀ (ୱେଲଫେୟାର)ଙ୍କ ସମେତ ବୈପାରିଗୁଡ଼ା ବ୍ଲକ୍ର ବିଭିନ୍ନ ଅଧିକାରୀ ଓ ହିତାଧିକାରୀ ଉପସ୍ଥିତ ଥିଲେ। ତେନ୍ତୁଳିଗୁମ୍ମା ଆଶ୍ରମ ବିଦ୍ୟାଳୟର ପ୍ରଧାନଶିକ୍ଷକ ସୂର୍ଯ୍ୟନାରାୟଣ ସାବତ ଅତିଥିମାନଙ୍କୁ ନିମନ୍ତ୍ରଣ କରିବାର ଦାୟିତ୍ୱ ନିର୍ବାହ କରିଥିଲେ।
