କୋରାପୁଟ ‘ପରବ-୨୦୨୬’ର ଶୁଭାରମ୍ଭ : ବାଗଦେରୀ ଠାକୁରାଣୀ ମନ୍ଦିରଠାରେ ଉଦ୍ଘାଟିତ ହେଲା ୨୯ତମ ଜାତୀୟସ୍ତରୀୟ ଆଦିବାସୀ ଲୋକ ମହୋତ୍ସବ
କୋରାପୁଟ : କୁନ୍ଦୁରା ବ୍ଲକ୍ର ବାଗଦେରୀ ଠାକୁରାଣୀ ମନ୍ଦିରଠାରେ ୨୯ତମ ଜାତୀୟସ୍ତରୀୟ ଆଦିବାସୀ ଲୋକ ମହୋତ୍ସବ ‘ପରବ-୨୦୨୬’ର ଶୁଭାରମ୍ଭ ତଥା ଉଦ୍ଘାଟନୀ ସମାରୋହ ଆଜି ଅତି ଉତ୍ସାହ ଓ ଉଦ୍ଦୀପନାର ସହ ଅନୁଷ୍ଠିତ ହୋଇଯାଇଛି।
କାର୍ଯ୍ୟକ୍ରମର ପ୍ରାରମ୍ଭରେ କୋରାପୁଟସ୍ଥିତ ନିଶାଣୀ ମୁଣ୍ଡାଠାରେ ପାରମ୍ପରିକ ରୀତିନୀତି ଅନୁଯାୟୀ ପୂଜାର୍ଚ୍ଚନା କରାଯାଇଥିଲା। ଏହାପରେ ବାଗଦେରୀ ଠାକୁରାଣୀ ମନ୍ଦିରଠାରୁ ବ୍ଲକ୍ସ୍ତରୀୟ ‘ପରବ’ ମହୋତ୍ସବ ପାଳନ ଉପଲକ୍ଷେ ଏକ ପାରମ୍ପରିକ ମଶାଲ ଶୋଭାଯାତ୍ରା ବାହାରିଥିଲା। ଏହି ଶୋଭାଯାତ୍ରା ମହୋତ୍ସବର ସଭାସ୍ଥଳରେ ପହଞ୍ଚିବା ପରେ ଉଦ୍ଘାଟନୀ ସମାରୋହ ଆରମ୍ଭ ହୋଇଥିଲା।
ଏହି ଅବସରରେ କୋରାପୁଟ ଜିଲ୍ଲାପାଳ ତଥା ଜିଲ୍ଲା ମାଜିଷ୍ଟ୍ରେଟ୍ ମନୋଜ ସତ୍ୟୱାନ ମହାଜନ, କୋରାପୁଟ ବିଧାୟକ ରଘୁରାମ ମାଛ, ଲକ୍ଷ୍ମୀପୁର ବିଧାୟକ ପବିତ୍ର ସାଆନ୍ତା, ଜୟପୁର ବିଧାୟକ ତାରାପ୍ରସାଦ ବାହିନୀପତି, ପଟ୍ଟାଙ୍ଗୀ ବିଧାୟକ ରାମଚନ୍ଦ୍ର କାଡ଼ାମ, କୋଟପାଡ଼ ବିଧାୟକ ରୁପୁ ଭତ୍ରା, ଜିଲ୍ଲା ପରିଷଦ ଅଧ୍ୟକ୍ଷା ସସ୍ମିତା ମେଲେକା, ଜିଲ୍ଲା ପରିଷଦ ଉପାଧ୍ୟକ୍ଷ ରାଧାବିନୋଦ ସାମନ୍ତରାୟ, ଜିଲ୍ଲା ପରିଷଦ ସଦସ୍ୟା କନକଲତା ପେଣ୍ଠିଆଙ୍କ ସମେତ ଅନ୍ୟାନ୍ୟ ଜିଲ୍ଲା ପରିଷଦ ସଦସ୍ୟ, ସମସ୍ତ ବ୍ଲକ୍ ଅଧ୍ୟକ୍ଷ, ପୌରପାଳିକା ଅଧ୍ୟକ୍ଷ, ପୂର୍ବତନ ବିଧାୟକ ଚନ୍ଦ୍ରଶେଖର ମାଝୀ, ପୂର୍ବତନ ବିଧାୟକ ପ୍ରୀତମ ପାଢ଼ୀ, ସାଂସଦଙ୍କ ପ୍ରତିନିଧି ମନୋଜ ଆଚାର୍ଯ୍ୟ ଏବଂ କୁନ୍ଦୁରା ସରପଞ୍ଚ ଦଇମତି ସାନ୍ତା ପ୍ରମୁଖ ଯୋଗଦେଇଥିଲେ। ସେହିପରି ପ୍ରଶାସନିକ ଅଧିକାରୀଙ୍କ ମଧ୍ୟରେ କୋରାପୁଟ ଉପଜିଲ୍ଲାପାଳ ଫାବି ରସିଦ, ଜୟପୁର ଉପଜିଲ୍ଲାପାଳ ଶୁଭ୍ରା ପଣ୍ଡା, ଜୟପୁର ଏସ୍ଡିପିଓ ଅର୍ଚ୍ଚିତା ମିତ୍ତଲ, ପ୍ରବେସନାରୀ ଅଧିକାରୀ ଅନୁପ କୁମାର ନାୟକ, ଅତିରିକ୍ତ ଜିଲ୍ଲାପାଳ (ସାଧାରଣ) ତପନ କୁମାର ନାଏକ, ଅତିରିକ୍ତ ଜିଲ୍ଲାପାଳ (ରାଜସ୍ୱ) ନରେଶ ଚନ୍ଦ୍ର ଶବର, ଜିଲ୍ଲା ପରିଷଦର ମୁଖ୍ୟ ଉନ୍ନୟନ ଅଧିକାରୀ ତଥା ନିର୍ବାହୀ ଅଧିକାରୀ ବେଣୁଧର ଶବର, ଜିଲ୍ଲା ସଂସ୍କୃତି ଅଧିକାରୀ ପ୍ରୀତି ସୁଧା ଜେନାଙ୍କ ସମେତ ଜିଲ୍ଲାର ସମସ୍ତ ବିଡିଓ, ତହସିଲଦାର ଓ ବିଭିନ୍ନ ବିଭାଗର ଅଧିକାରୀମାନେ ଏହି ଉତ୍ସବରେ ଉପସ୍ଥିତ ଥିଲେ।
ଉତ୍ସବରେ ଉପସ୍ଥିତ ଅତିଥିମାନଙ୍କ ଦ୍ୱାରା ‘ପରବ-୨୦୨୬’ର ପୋଷ୍ଟର ଉନ୍ମୋଚନ କରାଯାଇଥିଲା। ଏହାପରେ ଅତିରିକ୍ତ ଜିଲ୍ଲାପାଳ (ସାଧାରଣ) ତପନ କୁମାର ନାଏକ ଆନୁଷ୍ଠାନିକ ଭାବେ ‘ପରବ-୨୦୨୬’ର ଶୁଭାରମ୍ଭ ଘୋଷଣା କରିଥିଲେ।
‘ପରବ’ କୋରାପୁଟ ଜିଲ୍ଲାର ଆଦିବାସୀ ଜନଜାତିଙ୍କ ସମୃଦ୍ଧ କଳା, ସଂସ୍କୃତି, ପରମ୍ପରା, ଲୋକନୃତ୍ୟ ଓ ଲୋକକଳାକୁ ଜାତୀୟସ୍ତରରେ ପରିଚିତ କରାଇବାର ଏକ ଅନନ୍ୟ ମଞ୍ଚ। ଏହି ମହୋତ୍ସବ ମାଧ୍ୟମରେ ଜିଲ୍ଲାର ବିଭିନ୍ନ ଅଞ୍ଚଳର ସାଂସ୍କୃତିକ ବିବିଧତା ଓ ଆଦିବାସୀ ପରମ୍ପରାର ଭବ୍ୟ ପ୍ରଦର୍ଶନ ସହ ଜିଲ୍ଲାର ଐତିହ୍ୟ ଓ ପରିଚୟକୁ ଅଧିକ ବ୍ୟାପକ କରିବାର ଉଦ୍ୟମ ଦୀର୍ଘ ବର୍ଷ ଧରି କରାଯାଇ ଆସୁଛି।
