ଭୁବନେଶ୍ବର: ଉତ୍କଳ ବିଶ୍ୱବିଦ୍ୟାଳୟ ମନସ୍ତତ୍ତ୍ବ ବିଭାଗ ପକ୍ଷରୁ ମାନସିକ ସ୍ବାସ୍ଥ୍ୟ, ଜାତୀୟ ଶିକ୍ଷା ନୀତି ୨୦୨୦ ଏବଂ ପ୍ରୟୋଗାତ୍ମକ ମନସ୍ତତ୍ତ୍ବ ଶୀର୍ଷକ ଆନ୍ତର୍ଜାତୀୟ ସମ୍ମିଳନୀ ଅନୁଷ୍ଠିତ ହୋଇଯାଇଛି।
ଆନ୍ତର୍ଜାତିକ ସମ୍ମିଳନୀକୁ ଉଦଘାଟନ କରି ଉତ୍କଳ ବିଶ୍ୱବିଦ୍ୟାଳୟର କୁଳପତି ପ୍ରଫେସର ସବିତା ଆଚାର୍ଯ୍ୟ କହିଛନ୍ତି ଯେ ଏକବିଂଶ ଶତାବ୍ଦୀରେ ବ୍ୟକ୍ତିବିଶେଷଙ୍କ ମନୋଭାବ ଓ ପରିବେଶର ପରିବର୍ତ୍ତନ ସହିତ ଶିକ୍ଷା ଉପରେ ଗଠନମୂଳକ ଦୃଷ୍ଟିକୋଣକୁ ଜାତୀୟ ଶିକ୍ଷା ନୀତିରେ ଗୁରୁତ୍ୱ ଦିଆଯାଇଛି। ଜ୍ଞାନ ଆହରଣ ସହ ତାହାକୁ କିଭଳି ପ୍ରୟୋଗାତ୍ମକ ଭାବେ ବ୍ୟବହାର କରିହେବ ଏଥିରେ ଉଲ୍ଲେଖ ରହିଛି। ସାମଗ୍ରିକ ଜ୍ଞାନ ଆହରଣ ପାଇଁ ଏକ ବହୁମୁଖୀ ଦୃଷ୍ଟିକୋଣକୁ ଅନ୍ତର୍ଭୁକ୍ତ କରାଯିବା ଜରୁରୀ। ଛାତ୍ରଛାତ୍ରୀଙ୍କ ମଧ୍ୟରେ ସମାଲୋଚିତ ଚିନ୍ତାଧାରାର ବିକାଶ ପାଇଁ ପଦକ୍ଷେପ ନିଆଯିବା ଉଚିତ। ଏହା ସେମାନଙ୍କ ଲାଗି ଆନ୍ତବିଷୟକ ଅଧ୍ୟୟନବେଳେ ଉପାଦେୟ ସାବ୍ୟସ୍ତ ହେବ ବୋଲି କୁଳପତି ପ୍ରଫେସର ସବିତା ଆଚାର୍ଯ୍ୟ ପ୍ରକାଶ କରିଥିଲେ।
କାର୍ଯ୍ୟକ୍ରମରେ ମୁଖ୍ୟଅତିଥି ଭାବେ ଯୋଗଦେଇ ୟୁନିସେଫ କ୍ଷେତ୍ର କାର୍ଯ୍ୟାଳୟ ମୁଖ୍ୟ ୱିଲିୟମ ହାନଲନ ଜେଆର ଓଡିଶାର ଶିକ୍ଷାଦାନ-ଶିକ୍ଷା ପ୍ରକ୍ରିୟାରେ ଉଭୟ ଛାତ୍ରଛାତ୍ରୀ ଏବଂ ଶିକ୍ଷାବିତମାନଙ୍କ ମାନସିକ ସୁସ୍ଥତା ଉପରେ ବକ୍ତବ୍ୟ ରଖିଥିଲେ। ମାନସିକ ସ୍ତରରେ ପ୍ରଥମ ଚିକିତ୍ସା ଓ ବିଷୟଗତ କଲ୍ୟାଣ ଆଦି ଗୁରୁତ୍ୱପୂର୍ଣ୍ଣ ବୋଲି ପ୍ରକାଶ କରିଛନ୍ତି।
ଉତ୍କଳ ବିଶ୍ବବିଦ୍ୟାଳୟର ଆଇକ୍ୟୁଏସି ନିର୍ଦେଶକ ପ୍ରଫେସର ନିଗମାନନ୍ଦ ଦାସ ଭାରତର ବିଭିନ୍ନ ପର୍ଯ୍ୟାୟରେ ଜାତୀୟ ଶିକ୍ଷା ନୀତିର ବିବର୍ତ୍ତନକୁ ଆଲୋକପାତ କରିଥିଲେ।
ଅନ୍ୟମାନଙ୍କ ମଧ୍ୟରେ ଇଂଲଣ୍ଡର ବାଥ ବିଶ୍ବବିଦ୍ୟାଳୟ ପ୍ରଫେସର ଜିଆଓ ଲାନକର୍ଡ-ଖ୍ରୀଷ୍ଟିଆନସେନ୍, ଉତ୍କଳ ବିଶ୍ବବିଦ୍ୟାଳୟର ପିଜି କାଉନସିଲ ଅଧ୍ୟକ୍ଷ ପ୍ରଫେସର ନବନୀତା ରଥ, ଶ୍ରୀ ଶ୍ରୀ ବିଶ୍ବବିଦ୍ୟାଳୟର ପ୍ରଫେସର ରେଖା ସିଂଘଲ ପ୍ରମୁଖ ବକ୍ତବ୍ୟ ରଖିଥିଲେ। ଆନ୍ତର୍ଜାତିକ ସମ୍ମିଳନୀରେ ଆବାହକ ପ୍ରଫେସର ଭାଶ୍ବତୀ ପଟ୍ଟନାୟକ କାର୍ଯ୍ୟକ୍ରମ ପରିଚାଳନା କରିଥିଲେ।