ଅଯୋଧ୍ୟାର ଭଦ୍ରାସାରେ ୧୨ ବର୍ଷୀୟ ନାବାଳିକାକୁ ଗଣଦୁଷ୍କର୍ମ ମାମଲାରେ ସମାଜବାଦୀ ପାର୍ଟି ନେତାଙ୍କ ନାଁ ସାମ୍ନାକୁ ଆସିବା ପରେ ରାଜନୀତି ଜୋର୍ ଧରିଛି। ସମାଜବାଦୀ ପାର୍ଟିର ରାଷ୍ଟ୍ରୀୟ ସାଧାରଣ ସମ୍ପାଦକ ଶିବପାଲ ଯାଦବ ଏହି ଘଟଣାକୁ ନିନ୍ଦା କରିବା ସହ ଏକ ବଡ଼ ବୟାନ ଦେଇଛନ୍ତି।
ଗଣଦୁଷ୍କର୍ମ ପୀଡିତା, ଅଭିଯୁକ୍ତ ତଥା ଡେପୁଟି ମୁଖ୍ୟମନ୍ତ୍ରୀ କେଶବ ପ୍ରସାଦ ମୌର୍ଯ୍ୟଙ୍କର ନାର୍କୋ ଟେଷ୍ଟ କରିବାକୁ ଶିବପାଲ ଦାବି କରିଛନ୍ତି। ସେ କହିଛନ୍ତି, ମୁଁ ଅଯୋଧ୍ୟା ଘଟଣାକୁ କଡ଼ା ଭାଷାରେ ନିନ୍ଦା କରୁଛି। ଏଥିସହ ପବନ ପାଣ୍ଡେଙ୍କ ଦ୍ୱାରା କରାଯାଇଥିବା ନାର୍କୋ ଟେଷ୍ଟ ଦାବିକୁ ମଧ୍ୟ ସମର୍ଥନ କରୁଛି। ଉପମୁଖ୍ୟମନ୍ତ୍ରୀ କେଶବ ପ୍ରସାଦ ମୌର୍ଯ୍ୟଙ୍କର ମଧ୍ୟ ନାର୍କୋ ଟେଷ୍ଟ କରାଯିବା ଉଚିତ। ଏହାଦ୍ୱାରା ସମ୍ବେଦନଶୀଳ ପ୍ରସଙ୍ଗରେ କିଏ ଶସ୍ତା ରାଜନୀତି କରୁଛି ତାହା ସ୍ପଷ୍ଟ ହୋଇଯିବ।’
ଏହା ପୂର୍ବରୁ ଡେପୁଟି ସିଏମ୍ କେଶବ ମୌର୍ଯ୍ୟ ଟ୍ୱିଟ୍ କରି କହିଥିଲେ ଯେ ‘ଗଣଦୁଷ୍କର୍ମକାରୀଙ୍କୁ ବଞ୍ଚାଇବା ସମାଜବାଦୀ ପାର୍ଟିର ଜନ୍ମଗତ ପ୍ରକୃତି। ଯଦି ବଳାତ୍କାରୀ ଜଣେ ମୁସଲମାନ ତେବେ ସମଗ୍ର ସାଇଫାଇ ପରିବାର ତାଙ୍କୁ ବଞ୍ଚାଇବା ପାଇଁ ଏକ ଆଗକୁ ଚାଲିଆସିନ୍ତି। ସେ ଆହୁରି ଲେଖିଥିଲେ – ସପା ସଫା ହୋଇଯିବ।’ କେଶବ ପ୍ରସାଦ ମୌର୍ଯ୍ୟଙ୍କ ଏହି ବୟାନର ଏବେ ଶିବପାଲ ଉତ୍ତର ଦେଇଛନ୍ତି।
ଅଯୋଧ୍ୟାର ପୂର୍ବତନ ସମାଜବାଦୀ ପାର୍ଟି ବିଧାୟକ ତଥା ଅଖିଳେଶ ସରକାରରେ ମନ୍ତ୍ରୀ ରହିସାରିଥିବା ତେଜ ନାରାୟଣ ପାଣ୍ଡେ ଓରଫ ପବନ ପାଣ୍ଡେ ଅଭିଯୁକ୍ତ ମୋଇଦ ଖାନ୍ଙ୍କ ସମେତ ପୀଡିତାଙ୍କ ମା’ଙ୍କର ମଧ୍ୟ ନାର୍କୋ ଟେଷ୍ଟ କରିବାକୁ ଦାବି କରିଥିଲେ। ଏହା ପରେ ଉଭୟଙ୍କ ଡିଏନ୍ଏ ପରୀକ୍ଷା କରିବାକୁ ମଧ୍ୟ ଦାବି କରାଯାଇଥିଲା। ପବନ ପାଣ୍ଡେଙ୍କ ଏହି ଦାବିକୁ ଏବେ ଶିବପାଲ ଯାଦବ ସମର୍ଥନ ଜଣାଇଛନ୍ତି।
ପ୍ରକୃତରେ ଅଯୋଧ୍ୟା ଭଦ୍ରାସାଠାରେ ଜଣେ ୧୨ ବର୍ଷର ନାବାଳିକାକୁ ଗଣଦୁଷ୍କର୍ମ କରାଯାଇଛି। ଏହି ଘଟଣା କାଲନ୍ଦର ପୁଲିସ ଷ୍ଟେସନ ଅଞ୍ଚଳରେ ଘଟିଥିଲା। ଯେଉଁଠାରେ ନାବାଳିକାଙ୍କ ସହ ଦୁଷ୍କର୍ମ କରିବା ପରେ ଅଭିଯୁକ୍ତ ଜଣକ ତା’ର ଅଶ୍ଳୀଳ ଭିଡିଓ କରିଥିଲେ। ଏହାକୁ ନେଇ ତାଙ୍କୁ ଦୀର୍ଘ ଦିନ ଧରି ବ୍ଲାକମେଲ କରିଥିଲେ ଏବଂ ବାରମ୍ବାର ତା’ସହ ଦୁଷ୍କର୍ମ କରିଥିଲେ। ପୀଡିତା ଦୁଇମାସ ଗର୍ଭବତୀ ହେବାପରେ ଏହି ଘଟଣା ସାମ୍ନାକୁ ଆସିଥିଲା। ଏହି ମାମଲାରେ ସମାଜବାଦୀ ପାର୍ଟିର ନେତା ତଥା ବେକର ମାଲିକ ମୋଇଦ ଖାନ୍ ମୁଖ୍ୟ ଅଭିଯୁକ୍ତ ଅଛନ୍ତି। ତାଙ୍କ ଜିଲାଇ ୩୦ ତାରିଖରେ ଗିରଫ କରାଯାଇଥିଲା।
