ନୟାଗଡ଼: ନୟାଗଡ଼ ଜିଲ୍ଲାର ଓଡ଼ଗାଁ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ସଂଲଗ୍ନ ମୁଖ୍ୟ ଫାଟକର ଉଭୟ ପାର୍ଶ୍ଵକୁ ଫଳ, ଗୁପଚୁପ, ଦହିବରା ଓ ବିଭିନ୍ନ ଜଳଖିଆ ଦୋକାନୀ ମାନେ ଅକ୍ତିଆର କରିଛନ୍ତି ।ଫଳରେ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର କୁ ଆସୁଥିବା ସମ୍ପର୍କୀୟ ମାନେ ଯାନବାହାନ ପାର୍କିଂ କରିବାରେ ଅସୁବିଧାର ସମ୍ମୁଖିନ ହେଉଛନ୍ତି ।ଏପରିକି ଦୁଇ ଚକିଆ ଯାନ ପାର୍କିଂ କରିବା ପାଇଁ ସ୍ଥାନ ମିଳୁନାହିଁ । ଆମ୍ବୁଲାନ୍ସ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଭିତରକୁ ଯିବା ଓ ବାହାରିବା ସମୟରେ ବି ସମସ୍ୟା ସୃଷ୍ଟି ହେଉଛି । ଡାକ୍ତରଖାନା ପରିସରରେ ଏକ ନୂତନ କୋଠା ନିର୍ମାଣ ହେବା ପରେ ସେଠାରେ ବି ଗାଡ଼ି ପାର୍କିଂ ର ବ୍ୟବସ୍ଥା ନାହିଁ । ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ମୁଖ୍ୟ ଫାଟକର ବାମ ପାର୍ଶ୍ୱରେ ୨ ଜଣ ଫଳ ବ୍ୟବସାୟୀ ନିଜର ପସରା ମେଲାଇଛନ୍ତି । ଅନୁରୂପ ଭାବେ ଫଟକର ଡାହାଣ ପାର୍ଶ୍ଵରେ କେତକ ଦୋକାନୀ ପାର୍କିଂ ସ୍ଥାନକୁ ଅକ୍ତିଆର କରି ଦୋକାନ କରିଛନ୍ତି । ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଶବ ବ୍ୟବଚ୍ଛଦ ଗୃହ ଫାଟକ ତଥା ଏନଏସି ଶୌଚାଳୟ ସାମ୍ନାରେ ଅତ୍ୟନ୍ତ ଦୂଷିତ ପରିବେଶରେ ଗୁପଚୁପ, ଦହିବରା ଓ ଅନ୍ୟାନ୍ୟ ଖାଦ୍ୟ ସାମଗ୍ରୀ ବିକ୍ରୀ ହେଉଛି । ଏପରିକି ଶୌଚାଳୟ ରାସ୍ତା ଅବରୋଧ କରିବା ଯୋଗୁଁ ଲୋକମାନେ ଶୌଚାଳୟ ଯିବାକୁ ରାସ୍ତା ପାଉନାହାନ୍ତି । ଏପରିକି ୨୦ଲକ୍ଷ ଟଙ୍କାରେ ବ୍ୟୟରେ ନିର୍ମାଣ କରାଯାଇଥିବା ‘ ମୋ ପ୍ରିୟ ଓଡ଼ଗାଁ’ ସେଲ୍ଫୀ ପଏଣ୍ଟ ସାମ୍ନାରେ ମଧ୍ୟ ଠେଲାଗାଡ଼ି ବ୍ୟବସାୟୀ ମାନେ ବେପାର କରୁଛନ୍ତି । ବାରମ୍ବାର ଅଭିଯୋଗ ପରେ ଏନଏସି ନିର୍ବାହୀ ଅଧିକାରୀ ଦୁଃଶାସନ ସ୍ୱାଇଁ ଏହି ସ୍ଥାନକୁ ନୋ ଭେଣ୍ଡିଂ ଜୋନ ଘୋଷଣା କରି ଲିଫଲେଟ ମାରିଛନ୍ତି ।ମାତ୍ର ଠେଲା ବ୍ୟବସାୟୀ ମାନେ କିଛିଦିନ ପାରେ ଏହି ସ୍ଥାନରେ ଭିଡ଼ ଜମାଇ ଦୋକାନ କରୁଛନ୍ତି । ଏପରିକି କୌଣସି ଠେଲାଗାଡ଼ି ଆଗରେ ଗାଡ଼ି ରଖିଲେ ସଂପୃକ୍ତ ବ୍ୟବସାୟୀ ମାନେ ସେମାନଙ୍କୁ ଖରାପ ବ୍ୟବହାର କରୁଥିବାର ଅଭିଯୋଗ ଆସିଛି । ଏନଏସି ନିର୍ବାହୀ ଅଧିକାରୀ ଦାୟିତ୍ୱରେ ଥିବା ଓଡ଼ଗାଁ ବିଡ଼ିଓ ଙ୍କୁ ଏନେଇ ଅବଗତ କରାଯାଇଥିଲା । ମାତ୍ର ଏଥିପାଇଁ ପଦକ୍ଷେପ ନିଆଯିବ ବୋଲି ପ୍ରତିଶ୍ରୁତି ଦେଇଥିଲେ ମାତ୍ର ଏପର୍ଯ୍ୟନ୍ତ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନଥିବା ଅଭିଯୋଗ ଆସିଛି ।