ଭୁବନେଶ୍ୱର : ଭିଏତନାମକୁ ନିଆଯାଇଥିବା ଭଗବାନ ବୁଦ୍ଧଙ୍କ ପବିତ୍ର ଅବଶେଷକୁ (ରେଲିକ୍ସ) ଭାରତ ଫେରାଇ ଆଣିବା ପାଇଁ ଭିଏତନାମ ଗସ୍ତ କରିଥିବା ଓଡ଼ିଶାର ରାଜ୍ୟପାଳ ଡ. ହରି ବାବୁ କମ୍ଭମପାଟି ଓଡ଼ିଶା ଏବଂ ଭିଏତନାମର ଡା-ନାଙ୍ଗ ସିଟି ମଧ୍ୟରେ ପ୍ରଦେଶସ୍ତରୀୟ ସମ୍ପର୍କ ସ୍ଥାପନ କରିବାକୁ ପ୍ରସ୍ତାବ ଦେଇଛନ୍ତି । ସୋମବାର ଦିନ ଡା-ନାଙ୍ଗ ପିପୁଲ୍ସ କମିଟିର ଅଧ୍ୟକ୍ଷ ମହାମହିମ ଲେ ଟ୍ରଙ୍ଗ ଚିନ୍ହଙ୍କ ସହ ସାକ୍ଷାତ ସମୟରେ ରାଜ୍ୟପାଳ ଏହି ପ୍ରସ୍ତାବ ଦେଇଛନ୍ତି।
ଏହି ଅବସରରେ ରାଜ୍ୟପାଳ କହିଛନ୍ତି ଯେ ଓଡ଼ିଶା ଏକ ସମୃଦ୍ଧ ଇତିହାସ, ଦୃଢ଼ ସାଂସ୍କୃତିକ ପରମ୍ପରା ଏବଂ ଦ୍ରୁତ ଆର୍ଥିକ ଅଭିବୃଦ୍ଧିର ରାଜ୍ୟ। ଆମର ଅନେକ ଗୁରୁତ୍ୱପୂର୍ଣ୍ଣ ବୌଦ୍ଧ ସ୍ଥଳ ମଧ୍ୟ ଅଛି I ଯଦି ଡା-ନାଙ୍ଗ ଆଗ୍ରହୀ, ତେବେ ଆମେ ଆମର ଦୁଇ ଅଞ୍ଚଳ ମଧ୍ୟରେ ସମ୍ପର୍କ ସଂସ୍ଥାପନ କରିପାରିବା।
ରାଜ୍ୟପାଳ ଡା-ନାଙ୍ଗକୁ ଏକ ସୁନ୍ଦର ଏବଂ ଐତିହାସିକ ସହର ଭାବରେ ପ୍ରଶଂସା କରିଛନ୍ତି । ଡା-ନାଙ୍ଗ ଏକ ପ୍ରମୁଖ ବନ୍ଦର, ଉଚ୍ଚ ପ୍ରଯୁକ୍ତିବିଦ୍ୟାର କେନ୍ଦ୍ରବିନ୍ଦୁ, ଅର୍ଥ ଏବଂ ପର୍ଯ୍ୟଟନର କେନ୍ଦ୍ର ହେବାର ଅପାର ସମ୍ଭାବନା ଅଛି ବୋଲି ରାଜ୍ୟପାଳ କହିଛନ୍ତି। ରାଜ୍ୟପାଳ ପୁଣି କହିଛନ୍ତି ଯେ ମଧ୍ୟ ଭିଏତନାମରେ ଏକ ସ୍ପନ୍ଦନଶୀଳ ଉପକୂଳ ସହର ଭାବରେ ଡା-ନାଙ୍ଗର ଅବସ୍ଥିତି ଭାରତ ଏବଂ ଭିଏତନାମ ମଧ୍ୟରେ ଆର୍ଥିକ ଏବଂ ବାଣିଜ୍ୟିକ ସହଯୋଗ ପାଇଁ ଗୁରୁତ୍ୱପୂର୍ଣ୍ଣ ଅଟେ ।
ରାଜ୍ୟପାଳ ଭିଏତନାମ ସରକାର ଏବଂ ଡା-ନାଙ୍ଗର ଲୋକମାନଙ୍କୁ ସେମାନଙ୍କର ଭବ୍ୟ ଆତିଥ୍ୟ ଏବଂ ଭଗବାନ ବୁଦ୍ଧଙ୍କ ପବିତ୍ର କୀର୍ତ୍ତି ପାଇଁ କରାଯାଇଥିବା ଉତ୍କୃଷ୍ଟ ବ୍ୟବସ୍ଥା ନିମନ୍ତେ ଧନ୍ୟବାଦ ଜଣାଇଥିଲେ। ଏହି କୀର୍ତ୍ତି ଏବଂ ଅବଶେଷକୁ ଭାରତ ସରକାର ଯଥୋଚିତ ପ୍ରୋଟୋକଲ ପ୍ରଦାନ କରିଛନ୍ତି ଏବଂ ମୁଁ ବ୍ୟକ୍ତିଗତ ଭାବରେ ଏହି ସବୁକୁ ସାଙ୍ଗରେ ନେଇ ଫେରିବା ପାଇଁ ଯାତ୍ରା କରୁଛି ବୋଲି କହିଥିଲେ। ବୌଦ୍ଧ ଧର୍ମ ପ୍ରାୟ ୧୮୦୦ ବର୍ଷ ଧରି ଭାରତ ଏବଂ ଭିଏତନାମ ମଧ୍ୟରେ ଏକ ଦୃଢ଼ ସଂଯୋଗ ସ୍ଥାପନ କରି ଆସିଛି । ଭାରତ ଏହାର ବୌଦ୍ଧ ଐତିହ୍ୟକୁ ଗୁରୁତ୍ୱ ଦିଏ ଏବଂ ବୌଦ୍ଧ ସ୍ଥଳଗୁଡ଼ିକର ସୁରକ୍ଷା, ସଂରକ୍ଷଣ ଏବଂ ପ୍ରୋତ୍ସାହନ ପାଇଁ ପ୍ରାଥମିକତା ଦେଇଛି ।
ଭାରତ ଏବଂ ଭିଏତନାମ ମଧ୍ୟରେ ବଢ଼ୁଥିବା ସହଭାଗିତା ବିଷୟରେ ରାଜ୍ୟପାଳ ଅବତାରଣା କରିଥିଲେ । ଗତ ବର୍ଷ ଭିଏତନାମର ପ୍ରଧାନମନ୍ତ୍ରୀଙ୍କ ଭାରତ ଗସ୍ତ ଏବଂ ୨୦୨୪ରେ ନ୍ୟୁୟର୍କରେ ଭାରତର ପ୍ରଧାନମନ୍ତ୍ରୀ ଏବଂ ଭିଏତନାମ ରାଷ୍ଟ୍ରପତି ଏବଂ ପାର୍ଟି ମହାସଚିବ ଟୋ ଲାମଙ୍କ ମଧ୍ୟରେ ଏକ ବୈଠକ ଅନୁଷ୍ଠିତ ହୋଇଥିବା ଉଲ୍ଲେଖ କରି ଏହା ଉଭୟ ଦେଶର ସମ୍ପର୍କକୁ ସୁଦୃଢ଼ କରିବାରେ ସାହାଯ୍ୟ କରିଛି ବୋଲି ରାଜ୍ୟପାଳ କହିଥିଲେ । ବାଣିଜ୍ୟ, ପ୍ରତିରକ୍ଷା, ପର୍ଯ୍ୟଟନ, ସ୍ୱାସ୍ଥ୍ୟ, ଡିଜିଟାଲ୍ ଅର୍ଥନୀତି, ଶିକ୍ଷା ଏବଂ ସ୍ଥାୟୀ ବିକାଶ ଭଳି କ୍ଷେତ୍ରରେ ଦୁଇ ଦେଶ ମଧ୍ୟରେ ସହଯୋଗ ବିସ୍ତାରିତ ହେଉଛି ବୋଲି ରାଜ୍ୟପାଳ କହିବା ସହିତ ଯୋଗ, ସାଂସ୍କୃତିକ ବିନିମୟ ଏବଂ ଶୈକ୍ଷିକ ସମ୍ପର୍କକୁ ପ୍ରୋତ୍ସାହିତ କରିବା ପାଇଁ ଭାରତୀୟ ଦୂତାବାସ ସହିତ କାମ କରିବାରେ ଡା-ନାଙ୍ଗଙ୍କ ସମର୍ଥନକୁ ପ୍ରଶଂସା କରିଥିଲେ। ଏତତବ୍ୟତୀତ ଦୁଇ ଦେଶ ମଧ୍ୟରେ ଅଧିକ ସିଧାସଳଖ ବିମାନ ଚଳାଚଳ ଲୋକଙ୍କ ମଧ୍ୟରେ ସମ୍ପର୍କକୁ ଉନ୍ନତ କରିବାରେ ସାହାଯ୍ୟ କରିଛି ବୋଲି ମତବ୍ୟକ୍ତ କରିଥିଲେ।
ରାଜ୍ୟପାଳ ଡ. କମ୍ଭମପାଟି କେନ୍ଦ୍ରୀୟ ଭିଏତନାମର ମାଇ ସନ୍ ଠାରେ ୟୁନେସ୍କୋ ବିଶ୍ୱ ଐତିହ୍ୟ ସ୍ଥଳ ପରିଦର୍ଶନ କରିବାର ଅଭିଜ୍ଞତା ବାଣ୍ଟିଥିଲେ। ପ୍ରାଚୀନ ମନ୍ଦିରଗୁଡ଼ିକର ପୁନରୁଦ୍ଧାର କରୁଥିବା ଭାରତୀୟ ପ୍ରତ୍ନତାତ୍ତ୍ୱିକ ଦଳର କାର୍ଯ୍ୟକୁ ପ୍ରଶଂସା କରି ଏହି ପ୍ରକଳ୍ପ ଭାରତ ଏବଂ ଭିଏତନାମ ମଧ୍ୟରେ ଘନିଷ୍ଠ ଐତିହାସିକ ଏବଂ ସାଂସ୍କୃତିକ ସଂଯୋଗର ଏକ ଦୃଢ଼ ପ୍ରତୀକ ସାଜିଛି ବୋଲି ରାଜ୍ୟପାଳ କହିଥିଲେ ।