ନୂଆଦିଲ୍ଲୀ: ରାଜଧାନୀ ଦିଲ୍ଲୀରେ ବସ୍ତି ଭଙ୍ଗାକୁ ବିରୋଧ କରି ଆମ ଆଦମୀ ପାର୍ଟି (ଆପ୍) ଆଜି ଜନ୍ତର ମନ୍ତରଠାରେ ଏକ ବିଶାଳ ପ୍ରତିବାଦ ସଭା ଆୟୋଜନ କରିଛି। ଏହି ଅବସରରେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ସମେତ ଦଳର ବହୁ ବରିଷ୍ଠ ନେତା ଉପସ୍ଥିତ ଥିଲେ।
ଏହି ଅବସରରେ କେଜ୍ରିୱାଲ କେନ୍ଦ୍ର ସରକାରଙ୍କୁ ତୀବ୍ର ସମାଲୋଚନା କରି ଅଭିଯୋଗ କରିଛନ୍ତି ଯେ, ବିଜେପି ମାତ୍ର ୫ ମାସ ମଧ୍ୟରେ ଗରିବ ଲୋକଙ୍କ ଜୀବନକୁ ଦୁର୍ବିସହ କରିଦେଇଛି। ସେ କହିଛନ୍ତି, “ଯେଉଁ ବସ୍ତିଗୁଡ଼ିକୁ ଭଙ୍ଗା ଯାଉଛି, ସେଠାକାର ଲୋକମାନେ ଆଖପାଖରେ କାମ କରି ଚଳୁଥିଲେ, କିନ୍ତୁ ଆଜି ସେମାନଙ୍କୁ ରାସ୍ତା ଉପରକୁ ଅଣାଯାଇଛି।”
ତାଙ୍କ ଭାଷଣରେ କେଜ୍ରିୱାଲ ସିଧାସଳଖ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଆକ୍ରମଣ କରିଥିଲେ। ସେ କହିଥିଲେ, “ପ୍ରଧାନମନ୍ତ୍ରୀ ମୋଦୀ ପ୍ରତିଶ୍ରୁତି ଦେଇଥିଲେ ‘ଯେଉଁଠି ବସ୍ତି, ସେଇଠି ଘର’, କିନ୍ତୁ ବାସ୍ତବରେ ସେ କେବଳ ସ୍ଥାନ ଖାଲି କରୁଛନ୍ତି। ସେ ଜଣେ ମିଛୁଆ ପ୍ରଧାନମନ୍ତ୍ରୀ। ଭବିଷ୍ୟତରେ ମୋଦୀଙ୍କ ଗ୍ୟାରେଣ୍ଟି ଉପରେ କେବେ ବିଶ୍ୱାସ କରନ୍ତୁ ନାହିଁ।”
ସେ ଆହୁରି ମଧ୍ୟ କହିଥିଲେ, “ଏହି ଲୋକମାନେ ପୂର୍ବରୁ ଆପଣଙ୍କ ଘରକୁ ଆସି ଭୋଟ ମାଗୁଥିଲେ, ଏବେ ସେମାନେ ସେହି ଘରକୁ ଭାଙ୍ଗିବାକୁ ଯୋଜନା କରୁଛନ୍ତି। ଦିଲ୍ଲୀର ୪୦ ଲକ୍ଷ ଲୋକ ବସ୍ତିରେ ବାସ କରନ୍ତି ଏବଂ ସେମାନଙ୍କୁ ହଟାଇବାର ଷଡ଼ଯନ୍ତ୍ର ଚାଲିଛି।”
କେଜ୍ରିୱାଲ ଚେତାବନୀ ଦେଇ କହିଥିଲେ, “ଯଦି ବସ୍ତି ଭାଙ୍ଗିବା କାର୍ଯ୍ୟ ବନ୍ଦ ନହୁଏ, ତେବେ ଏତେ ବଡ଼ ଆନ୍ଦୋଳନ ହେବ ଯେ ସରକାର ତିଷ୍ଠି ପାରିବେ ନାହିଁ। ଏହି ସରକାର ଗୋଟିଏ ବର୍ଷ ମଧ୍ୟରେ ମାଗଣା ବିଦ୍ୟୁତ୍ ବନ୍ଦ କରିଦେବ, ସ୍କୁଲ୍ ଫି ବଢ଼ାଇ ଦେଇଛି, ମୋହଲ୍ଲା କ୍ଲିନିକ୍ ବନ୍ଦ କରିଦେଇଛି। ଏମାନେ ସରକାର ଚଳାଇବା ଜାଣନ୍ତି ନାହିଁ, କେବଳ ଲୁଟିବା ଜାଣନ୍ତି।”