ନୂଆଦିଲ୍ଲୀ: କୋଲକାତା ଆଇନ କଲେଜ ମାମଲାକୁ ନେଇ ତୃଣମୂଳ କଂଗ୍ରେସ (ଟିଏମସି) ଭିତରେ ଥିବା ବିବାଦ ଏବେ ପଦାରେ ପଡ଼ିଛି। ଦଳର ଦୁଇ ବରିଷ୍ଠ ସାଂସଦ ମହୁଆ ମୋଇତ୍ରା ଏବଂ କଲ୍ୟାଣ ବାନାର୍ଜୀଙ୍କ ମଧ୍ୟରେ ଆରମ୍ଭ ହୋଇଥିବା ବାକ୍ଯୁଦ୍ଧ ବ୍ୟକ୍ତିଗତ ସ୍ତରକୁ ଖସି ଆସିଛି।
ଏକ ବିବାଦୀୟ ମନ୍ତବ୍ୟକୁ ନେଇ ସାଂସଦ ମହୁଆ ମୋଇତ୍ରା, କଲ୍ୟାଣ ବାନାର୍ଜୀଙ୍କୁ ସମାଲୋଚନା କରିଥିଲେ। ସେ କହିଥିଲେ, “ଭାରତରେ ମହିଳାଙ୍କ ପ୍ରତି ଘୃଣା ମନୋଭାବ ଦଳମତ ନିର୍ବିଶେଷରେ ରହିଛି, କିନ୍ତୁ ଟିଏମସି ଏଭଳି ମନ୍ତବ୍ୟକୁ କଦାପି ସମର୍ଥନ କରେନାହିଁ, ଯେକୌଣସି ନେତା ଏହା ଦେଇଥାନ୍ତୁ ନା କାହିଁକି।” ଟିଏମସି ମଧ୍ୟ କଲ୍ୟାଣ ବାନାର୍ଜୀ ଏବଂ ମଦନ ମିତ୍ରଙ୍କ ବିବାଦୀୟ ମନ୍ତବ୍ୟରୁ ନିଜକୁ ଦୂରେଇ ରଖି ଏହାକୁ ନିନ୍ଦନୀୟ ବୋଲି କହିଥିଲା।
ମହୁଆଙ୍କ ଏହି ମନ୍ତବ୍ୟରେ କ୍ଷୁବ୍ଧ ହୋଇ କଲ୍ୟାଣ ବାନାର୍ଜୀ ଏକ ବ୍ୟକ୍ତିଗତ ଆକ୍ଷେପ କରି କହିଥିଲେ, “ସେ (ମହୁଆ) ନିଜ ହନିମୁନରୁ ଫେରି ମୋ ସହ ଝଗଡ଼ା କରୁଛନ୍ତି।” ଏତିକିରେ ନ ଅଟକି ସେ ଆହୁରି ଅଭିଯୋଗ କରିଥିଲେ ଯେ ମହୁଆ ଜଣେ ୬୫ ବର୍ଷୀୟ ବ୍ୟକ୍ତିଙ୍କ ପରିବାର ଭାଙ୍ଗି ତାଙ୍କୁ ବିବାହ କରିଛନ୍ତି। ଏହି ମନ୍ତବ୍ୟ ମାଧ୍ୟମରେ ସେ ପୂର୍ବତନ ସାଂସଦ ପିନାକୀ ମିଶ୍ରଙ୍କ ସହ ମହୁଆଙ୍କ ସମ୍ପର୍କକୁ ଇଙ୍ଗିତ କରିଥିଲେ। କଲ୍ୟାଣ ଆହୁରି ମଧ୍ୟ ମହୁଆଙ୍କୁ ‘ମହିଳା ବିରୋଧୀ’ କହିବା ସହ ସେ ଦଳର ମହିଳା ନେତ୍ରୀମାନଙ୍କୁ କାମ କରିବାକୁ ଦିଅନ୍ତି ନାହିଁ ବୋଲି ଅଭିଯୋଗ କରିଥିଲେ।
ଦଳର ଦୁଇ ବରିଷ୍ଠ ସାଂସଦଙ୍କ ଏଭଳି ଖୋଲାଖୋଲି କାଦୁଅ ଫିଙ୍ଗା ଘଟଣା ତୃଣମୂଳ କଂଗ୍ରେସରେ ଥିବା ଗୋଷ୍ଠୀ କନ୍ଦଳକୁ ସ୍ପଷ୍ଟ କରିଦେଇଛି।
ବିଜେପିର ଆକ୍ରମଣ:
ଏହି ଘଟଣାକୁ ନେଇ ବିଜେପି, ଟିଏମସି ଉପରେ ବର୍ଷିଛି। ବରିଷ୍ଠ ବିଜେପି ନେତା ଅମିତ ମାଲବ୍ୟ କହିଛନ୍ତି, “ଟିଏମସି ଏବେ ଦୁଷ୍କର୍ମକାରୀଙ୍କୁ ସୁରକ୍ଷା ଦେଉଥିବା ଏକ ଦଳରେ ପରିଣତ ହୋଇଛି। ମମତା ବାନାର୍ଜୀଙ୍କ ନେତୃତ୍ୱରେ ଏହା ଦୁଷ୍କର୍ମକାରୀଙ୍କ ପ୍ରତି ସହାନୁଭୂତି ରଖୁଥିବା ଏକ ସରକାର।”