ଭୁବନେଶ୍ୱର: ଆଉଟସୋର୍ସିଂ ନିଯୁକ୍ତି ନେଇ ଓଡ଼ିଶା ସରକାର ସମସ୍ତ ବିଭାଗକୁ କଡ଼ା ନିର୍ଦ୍ଦେଶ ଦେଇଛନ୍ତି । ଆଉଟସୋର୍ସିଂ ଭିତ୍ତିରେ କର୍ମଚାରୀ ନିଯୁକ୍ତି ପାଇଁ ଅର୍ଥ ବିଭାଗର ପୂର୍ବ ଅନୁମୋଦନ ବାଧ୍ୟତାମୂଳକ। ଏପରି କରି ରାଜ୍ୟ ସରକାର ଠିକା ବା କଣ୍ଟ୍ରାକ୍ଟଚୁଆଲ ନିଯୁକ୍ତି ରୋକିବା ଏବଂ ଆର୍ଥିକ ଅନୁଶାସନ ନିଶ୍ଚିତ କରିବାକୁ ଲକ୍ଷ୍ୟ ରଖିଛନ୍ତି ।
ଅର୍ଥ ବିଭାଗର ଏକ ସରକାରୀ ଚିଠିରେ କୁହାଯାଇଛି ଯେ, ସମସ୍ତ ବିଭାଗକୁ ଲିଖିତ ଭାବେ ଜଣାଇ ଦିଆଯାଇଛି ଯେ ନୂଆ କରି ଆଉଟସୋର୍ସିଂ ନିଯୁକ୍ତି ଆରମ୍ଭ କରିବା ପୂର୍ବରୁ ଔପଚାରିକ ଅନୁମତି ନେବା ଦରକାର। ପୂର୍ବରୁ ଅନୁମୋଦିତ ପଦବୀଗୁଡ଼ିକର ନବୀକରଣ ପାଇଁ ମଧ୍ୟ ଏହି ଅନୁମୋଦନ ଆବଶ୍ୟକ। ଯଦି କୌଣସି ବିଭାଗରେ ପୂର୍ବ ଅନୁମୋଦନ ଥାଏ, ତେବେ ଚୁକ୍ତି ଅବଧି ଶେଷରେ ନବୀକରଣ ପାଇଁ ନୂଆ ଅନୁମତି ନେବାକୁ ପଡ଼ିବ। ପ୍ରାରମ୍ଭିକ ଅନୁମୋଦିତ ସଂଖ୍ୟାଠାରୁ ଅଧିକ କର୍ମଚାରୀ ନିଯୁକ୍ତି ପାଇଁ ଅତିରିକ୍ତ ଅନୁମୋଦନ ଦରକାର।
ସରକାରୀ କାର୍ଯ୍ୟାଳୟରେ ଆଉଟସୋର୍ସିଂ ନିଯୁକ୍ତି ବଢ଼ୁଥିବା ଦେଖି ଏହାଉପରେ ଏପରି ଏକ ପଦକ୍ଷେପ ଆସିଛି। ସମସ୍ତ ବିଭାଗକୁ ତୁରନ୍ତ ଏହି ନିର୍ଦ୍ଦେଶ ପାଳନ କରିବାକୁ କୁହାଯାଇଛି।
ବିଜ୍ଞପ୍ତିରେ କୁହାଯାଇଛି, “ଆଉଟସୋର୍ସିଂ ଭିତ୍ତିରେ କର୍ମଚାରୀ ନିଯୁକ୍ତି ପାଇଁ ଅର୍ଥ ବିଭାଗର ପୂର୍ବ ଅନୁମୋଦନ ବାଧ୍ୟତାମୂଳକ। ତେବେ ନବୀକରଣ ସମୟରେ ଅନୁମୋଦିତ ସଂଖ୍ୟାଠାରୁ ଅଧିକ ନହେଲେ ଅନୁମୋଦନ ଦରକାର ନାହିଁ।” ଯଦି ନବୀକରଣରେ ଅଧିକ କର୍ମଚାରୀ ପ୍ରସ୍ତାବିତ ହୁଏ, ତେବେ ଅତିରିକ୍ତ ସଂଖ୍ୟା ପାଇଁ ପୂର୍ବ ଅନୁମୋଦନ ଆବଶ୍ୟକ। ଏହି ନିର୍ଦ୍ଦେଶ ରାଜ୍ୟରେ ଆଉଟସୋର୍ସିଂ କର୍ମଚାରୀଙ୍କ ସଂଖ୍ୟା ଉପରେ ପ୍ରଭାବ ପକାଇବ, ଯେଉଁଥିରେ ବର୍ତ୍ତମାନ ୨୫ ହଜାରରୁ ଅଧିକ କର୍ମଚାରୀ ରାଜ୍ୟର ବିଭିନ୍ନ ବିଭାଗରେ କାର୍ଯ୍ୟରତ ଅଛନ୍ତି। ଅର୍ଥ ବିଭାଗର ଅଧିକାରୀମାନେ କହିଛନ୍ତି ଯେ ଏହା ଅନିୟମିତ ଖର୍ଚ୍ଚକୁ ରୋକିବ ଏବଂ ସରକାରୀ ବ୍ୟବସ୍ଥାରେ ସ୍ୱଚ୍ଛତା ବଢ଼ାଇବ। ବିରୋଧୀ ଦଳମାନେ ଏହି ପଦକ୍ଷେପକୁ ସ୍ୱାଗତ କରିଛନ୍ତି, କିନ୍ତୁ କହିଛନ୍ତି ଯେ ପୂର୍ବରୁ ଥିବା ଚୁକ୍ତିଗୁଡ଼ିକର ନିରୀକ୍ଷଣ ମଧ୍ୟ ଆବଶ୍ୟକ।
ଉଲ୍ଲେଖଯୋଗ୍ୟ, ପୂର୍ବ ବିଜେଡି ସରକାରରେ ଆଉଟସୋର୍ସିଂ ନିଯୁକ୍ତି ବହୁତ ଥିଲା। ଆଉ ଏଥିରେ ପାରଦର୍ଶିତା ନଥିବା ଏବେର ସରକାର କହିଛନ୍ତି। ଏହାପରେ ନିଜେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଆଉଟସୋର୍ସିଂ ନିଯୁକ୍ତିର ନୀରିକ୍ଷଣ କରିବାକୁ ନିକଟରେ ନିର୍ଦ୍ଦେଶ ଦେଇଥିଲେ।