ବେଜିଂ : ତାଇଓ୍ବାନ ପ୍ରଣାଳୀ ନିକଟରେ ମୁହାଁମୁହିଁ ହୋଇଛନ୍ତି ଚୀନ ଓ ଆମେରିକା । ଏହା ଫଳରେ ଏହି ଅଂଚଳରେ ଗତ କିଛି ମାସ ହେଲା ଚାଲିଥିବା ଉତ୍ତେଜନା ଆହୁରି ବଢିଯାଇଛି ।
ଶୁକ୍ରବାର ଦିନ ଚୀନର ସରକାରୀ ନ୍ୟୁଜ୍ ଚ୍ୟାନେଲ୍ ଏକ ଫୁଟେଜ୍ ଜାରି କରି ପ୍ରକାଶ କରିଛି ଯେ ଚୀନ୍ ଉପକୂଳ ନିକଟରେ ଚୀନ୍ କୋଷ୍ଟ ଗାର୍ଡ ଏବଂ ଏକ ସନ୍ଦିଗ୍ଧ ଆମେରିକୀୟ ନୌସେନା ହେଲିକପ୍ଟର ମୁହାଁମୁହିଁ ହୋଇଥିଲେ। ଏହି ସିସିଟିଭି ଫୁଟେଜ୍ ଅନୁଯାୟୀ, ଘଟଣାଟି ତାଇୱାନ ପ୍ରଣାଳୀରେ ଘଟିଛି, ଫୁଟେଜ୍ରେ ଏକ ବିଦେଶୀ ସାମରିକ ରୋଟରକ୍ରାଫ୍ଟର ଏକ ଚିତ୍ର ଦେଖାଯାଉଛି, ଯାହା ଆମେରିକା ନିର୍ମିତ ସିକୋର୍ସ୍କି ଏମଏଚ୬୦-ଆର୍ ସିହକ୍ ପରି ଦେଖାଯାଉଛି, ଏହା ଆମେରିକା ଏବଂ ପ୍ରଶାନ୍ତ ମହାସାଗରୀୟ ଅଞ୍ଚଳରେ ଅନେକ ସହଯୋଗୀ ବାହିନୀ ଦ୍ୱାରା ବ୍ୟବହୃତ ହେଲିକପ୍ଟର। ଯଦିଓ ଚୀନ୍ ସେନା ଏହି ମୁକାବିଲା କେବେ ଏବଂ କେଉଁଠାରେ ହୋଇଥିଲା ତାହା କହିନାହିଁ, ତଥାପି ଏହା ବିଶ୍ୱାସ କରାଯାଉଛି ଯେ ଯଦି ଏପରି ଘଟଣା ବୃଦ୍ଧି ପାଏ, ତେବେ ଉତ୍ତେଜନା ଯୁଦ୍ଧରେ ପରିଣତ ହେବାକୁ ଅଧିକ ସମୟ ଲାଗିବ ନାହିଁ। ଏହି ଖବର ପ୍ରକାଶ ପାଇବା ପରେ ତାଇଓ୍ବାନରେ ଭୟର ବାତାବରଣ ସୃଷ୍ଟି କରିଛି, କାରଣ ଚୀନ୍ ପୂର୍ବରୁ ଚେତାବନୀ ଦେଇସାରିଛି ଯେ ସେ ଦକ୍ଷିଣ ଚୀନ୍ ସାଗରରେ କୌଣସି ବାହ୍ୟ ହସ୍ତକ୍ଷେପ ଗ୍ରହଣ କରିବ ନାହିଁ।
