ସୁନ୍ଦରଗଡ଼: ମୁଖାପିନ୍ଧି ଆସିଲେ, ଲୁଟିନେଲେ । ସୁନ୍ଦରଗଡ଼ ଜିଲ୍ଲାରେ ଏବେ ବିଦ୍ୟୁତ୍ କମ୍ପାନୀରୁ ଲୁଟ୍ କରୁଥିବା ଗ୍ୟାଙ୍ଗ ସକ୍ରିୟ ଅଛନ୍ତି । ଗତକାଲି ରାତିରେ ଲହୁଣିପଡ଼ା ଥାନା ଦର୍ଜିଂ ଠାରେ ଏକ ବିଦ୍ୟୁତ୍ ନିର୍ମାଣ କମ୍ପାନୀର କ୍ୟାମ୍ପରେ ପ୍ରାୟ ଦେଢ଼ କୋଟି ଟଙ୍କାର କପର ଲୁଟିନେଇଛନ୍ତି ଲୁଟେରା ।
ଗତ ରାତିରେ ପ୍ରାୟ ୨୦ରୁ ୨୨ ଜଣ ଡକାୟତ ଆସି ବିଭିନ୍ନ ମାରଣାସ୍ତ୍ର ଦେଖାଇ ଗାର୍ଡ ଓ ଲେବରଙ୍କୁ ପିଟି ଘରେ ପୁରାଇ ବାନ୍ଧି ଦେଇଥିଲେ । ଟ୍ରାନ୍ସଫର କୁ ଭାଙ୍ଗି ଦେବାସହ ପ୍ରାୟ ଦେଢ଼ କୋଟି ଟଙ୍କାର ତମ୍ବା ତାର ଲୁଟି ନେଇଛନ୍ତି ଦୁର୍ବୃତ୍ତ । ଘଟଣାସ୍ଥଳରେ ଲହୁଣିପଡ଼ା ଥାନା ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି । ଗତ ୨୧ ତାରିଖ ମଧ୍ୟ କୁତ୍ରାଠାରେ ଏହି କମ୍ପାନୀର କାମ ଚାଲିଥିବା ବେଳେ ମଧ୍ୟ ସଶସ୍ତ୍ର ଡକାୟତି ହୋଇଥିଲା । ଉଭୟ ଡକାୟତି ଘଟଣାର ରାଉରକେଲା ଏବଂ ସୁନ୍ଦରଗଡ଼ ପୋଲିସ ତଦନ୍ତ କରୁଛନ୍ତି ।