ନୟାଗଡ଼: ଜିଲ୍ଲା ସମାଜ ମଙ୍ଗଳ ବିଭାଗ, ନୟାଗଡ଼ ତରଫରୁ ମିଶନ ଶକ୍ତି ଭବନଠାରେ ଯୌତୁକ ନିଷେଧ ଅଧିନିୟମ ୧୯୬୧ ବିଷୟରେ ଏକ ଜିଲ୍ଲା ସ୍ତରୀୟ ପ୍ରଶିକ୍ଷଣ ଶିବିର ଅନୁଷ୍ଠିତ ହୋଇଯାଇଛି। ଯୌତୁକ ପ୍ରଥାକୁ ଜିଲ୍ଲାରୁ ସମ୍ପୂର୍ଣ୍ଣ ରୂପେ ନିର୍ମୂଳ କରିବା ଏହି ଶିବିରର ମୁଖ୍ୟ ଲକ୍ଷ୍ୟ ଥିଲା।
ଉକ୍ତ ଶିବିରରେ ଜିଲ୍ଲା ଆଇନ ସେବା ପ୍ରାଧିକରଣ (DLSA)ର ସେକ୍ରେଟାରୀ ଶ୍ରୀମତୀ ଅଞ୍ଜଳୀ ମାଛକୁଣ୍ଡ ମୁଖ୍ୟ ଅତିଥି ଭାବରେ ଯୋଗ ଦେଇଥିଲେ। ଏହା ବ୍ୟତୀତ, ଉପଜିଲ୍ଲାପାଳ ଶ୍ରୀ କର୍ଣ୍ଣଦେବ ସମାଦାର, ଡେପୁଟି କଲେକ୍ଟର ତପତି ରାଜ, ଜିଲ୍ଲା ସମାଜ ମଙ୍ଗଳ ଅଧିକାରୀ ଶ୍ରୀମତୀ ପୁଷ୍ପଲତା ପାତ୍ର, ପିଓ କମ୍ ପିଓ – ଶ୍ରୀମତୀ ଜୟଶ୍ରୀ ପ୍ରଧାନ, ବରିଷ୍ଠ ଆଇନଜୀବୀ – ଶ୍ରୀ ରମେଶ ଚନ୍ଦ୍ର ମହାରଣା, ଏବଂ ମହିଳା ସଶକ୍ତିକରଣର ଜିଲ୍ଲା ସଂଯୋଜକ ଶ୍ରୀ ସୌମ୍ୟ ରଞ୍ଜନ ଦାଶ ପ୍ରମୁଖ ମଞ୍ଚାସୀନ ଥିଲେ।
ମଞ୍ଚାସୀନ ଅତିଥିମାନେ ଯୌତୁକ ନିଷେଧ ଆଇନ ସମ୍ପର୍କରେ ବିସ୍ତୃତ ଆଲୋଚନା କରିଥିଲେ। ଏହି ଶିବିରରେ ବିଭିନ୍ନ ସମ୍ପ୍ରଦାୟର ବ୍ୟକ୍ତିବିଶେଷ ଯଥା ପୁରୋହିତ, କାଜି, ସ୍ୱୟଂ ସହାୟକ ଗୋଷ୍ଠୀ (SHG) ସଦସ୍ୟ, ଓଏସସି (OSC) ଷ୍ଟାଫ୍, ଶକ୍ତି ସଦନ (Shakti Sadan) ଷ୍ଟାଫ୍ ପ୍ରମୁଖ ଉପସ୍ଥିତ ଥିଲେ।
ଉପସ୍ଥିତ ସମସ୍ତଙ୍କ ସହିତ ଆଲୋଚନା କରି କିପରି ଭାବରେ ନୟାଗଡ଼ ଜିଲ୍ଲାର ସମସ୍ତ ଗ୍ରାମାଞ୍ଚଳରେ ଯୌତୁକ ପ୍ରଥାକୁ ମୂଳପୋଛ କରିହେବ, ସେ ବିଷୟରେ ରଣନୀତି ପ୍ରସ୍ତୁତ କରାଯାଇଥିଲା। ଡେପୁଟି କଲେକ୍ଟର ଶ୍ରୀମତୀ ତପତି ରାଜ ସମସ୍ତଙ୍କୁ ଯୌତୁକ ନିଷେଧ ପାଇଁ ଶପଥ ପାଠ କରାଇଥିଲେ। DLSA ସେକ୍ରେଟାରୀ ଶ୍ରୀମତୀ ଅଞ୍ଜଳୀ ମାଛକୁଣ୍ଡ ଯୌତୁକ ସମ୍ବନ୍ଧୀୟ ମାମଲାରେ ଆଇନଗତ ପ୍ରକ୍ରିୟା, ଚାର୍ଜ ସିଟ୍ (Charge Sheet) ପ୍ରସ୍ତୁତି ଏବଂ ଅନ୍ୟାନ୍ୟ ଜୁଡିସିଆରି ଆଇନ କାନୁନ ବିଷୟରେ ଉପସ୍ଥିତ ସମସ୍ତଙ୍କୁ ଅବଗତ କରାଇଥିଲେ।
ଏହି ସମସ୍ତ କାର୍ଯ୍ୟକ୍ରମକୁ ଡିଷ୍ଟ୍ରିକ୍ଟ ହବ୍ ଫର ଏମ୍ପାୱାରମେଣ୍ଟ ଅଫ ୱିମେନ (District Hub for Empowerment of Women)ର ସମସ୍ତ ଷ୍ଟାଫ୍ ସଫଳତାର ସହିତ ପରିଚାଳନା କରିଥିଲେ। ପରିଶେଷରେ, ଜିଲ୍ଲା ସମାଜ ମଙ୍ଗଳ ଅଧିକାରୀ ଶ୍ରୀମତୀ ପୁଷ୍ପଲତା ପାତ୍ର ସମସ୍ତଙ୍କୁ ଧନ୍ୟବାଦ ଅର୍ପଣ କରି ସଭା ସାଙ୍ଗ କରିଥିଲେ।