ଉମରକୋଟ, ନବରଙ୍ଗପୁର: ନବରଙ୍ଗପୁର ଜିଲ୍ଲା ଉମରକୋଟ ବ୍ଲକର ଜଣେ ବିରଳ ବ୍ୟକ୍ତିତ୍ୱ ମଙ୍ଗୁଳୁ ଏବେ ସବୁଆଡ଼େ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛନ୍ତି। ଆଖିରେ ଦେଖି ପାରୁନଥିଲେ ମଧ୍ୟ ସେ ଦିନ ବା ରାତିର ସଠିକ୍ ସମୟ କହିବାରେ ଅଦ୍ଭୁତ ଦକ୍ଷତା ପ୍ରଦର୍ଶନ କରିଛନ୍ତି, ଯାହା ସମସ୍ତଙ୍କୁ ଆଶ୍ଚର୍ଯ୍ୟଚକିତ କରିଛି।
ସାଧାରଣ ଲୋକେ ସମୟ ଅନୁମାନ କରିବାରେ ଯେଉଁଠି ଅସୁବିଧାର ସମ୍ମୁଖୀନ ହୁଅନ୍ତି, ମଙ୍ଗୁଳୁ ସେଠାରେ ସଠିକ୍ ସମୟ କହି ମନ୍ଦିରକୁ ଆସୁଥିବା ଭକ୍ତମାନଙ୍କୁ ବିସ୍ମିତ କରନ୍ତି। ତାଙ୍କର ଏହି ଅଦୃଶ୍ୟ କଳା ଏବଂ ଦିବ୍ୟଶକ୍ତି ଦେଖିବା ପାଇଁ ଛୋଟ ଛୋଟ ଶିଶୁ ଏବଂ ଯୁବକମାନେ ମଧ୍ୟ ଅତ୍ୟନ୍ତ ଆଗ୍ରହରେ ଭିଡ଼ ଜମାନ୍ତି।
ପ୍ରତିଦିନ ମଙ୍ଗୁଳୁ ଉମରକୋଟର ବିଭିନ୍ନ ମନ୍ଦିର ଚାରିପାଖରେ ନିଜ ପେଟ ପୋଷିବା ପାଇଁ ଭିକ୍ଷାବୃତ୍ତି କରନ୍ତି ଏବଂ ଏହି ସମୟରେ ଲୋକମାନଙ୍କୁ ସଠିକ୍ ସମୟ ଜଣାନ୍ତି। ତାଙ୍କର ଏହି ସ୍ୱତନ୍ତ୍ର ଦକ୍ଷତା ଓ ଦିବ୍ୟ ପ୍ରତିଭା ଉମରକୋଟ ଜନସାଧାରଣଙ୍କ ମନରେ ଏକ ଅଲଗା ସମ୍ମାନ ଓ ଆଶ୍ଚର୍ଯ୍ୟ ସୃଷ୍ଟି କରିଛି।
ଭଗବାନ ତାଙ୍କୁ ଦୃଷ୍ଟିଶକ୍ତି ନ ଦେଇଥିଲେ ମଧ୍ୟ ଏହି ଦିବ୍ୟଶକ୍ତି ପ୍ରଦାନ କରିଛନ୍ତି, ଯାହା ମଙ୍ଗୁଳୁଙ୍କୁ ସମୟ ଜଣାଇ ଲୋକମାନଙ୍କର ହୃଦୟ ଜିତିବାରେ ସକ୍ଷମ କରିଛି। ଉମରକୋଟର ଲୋକମାନେ ମଙ୍ଗୁଳୁଙ୍କ ପ୍ରତି ଗଭୀର ଆଦର, ସମ୍ମାନ ଏବଂ ଆଶ୍ଚର୍ଯ୍ୟ ପ୍ରକଟ କରିଛନ୍ତି। ଈଶ୍ୱରୀୟ ଶକ୍ତି ଯୋଗୁଁ ଆଜି ମଙ୍ଗୁଳୁଙ୍କୁ ନେଇ ଚାରିଆଡ଼େ ଚର୍ଚ୍ଚା ଲାଗିରହିଛି।
