ଉମରକୋଟ : ଭାରତୀୟ ମଜଦୁର ସଂଘ ଦ୍ୱାରା ପରିଚାଳିତ ଓଡ଼ିଶା ରାଜ୍ୟ ଆଶା କର୍ମୀ ସଂଘ, ନବରଙ୍ଗପୁର ଜିଲ୍ଲା ଶାଖା ଆସନ୍ତା ଅକ୍ଟୋବର ୧୪ ତାରିଖରୁ କାର୍ଯ୍ୟ ବନ୍ଦ କରିବା ସହ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଅନଶନ ଆରମ୍ଭ କରିବାକୁ ନିଷ୍ପତ୍ତି ନେଇଛି। ଡାକ୍ତର ସାଗରିକା ସ୍ୱାଇଁଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାନଯିବାକୁ ନେଇ ଏହି ଆନ୍ଦୋଳନ ଘୋଷଣା କରାଯାଇଛି। ଗତ ଅଗଷ୍ଟ ୩୦, ୨୦୨୫ ତାରିଖରେ ଉମରକୋଟ ବ୍ଲକର ବଡ଼ବାସୀନୀ ଗ୍ରାମର ଆଶା କର୍ମୀ ଦମୟନ୍ତୀ ଭତରାଙ୍କର ଗର୍ଭସ୍ଥ ଶିଶୁ ସହ ମୃତ୍ୟୁ ଘଟିଥିଲା। ଏହି ଘଟଣାକୁ ନେଇ ସେପ୍ଟେମ୍ବର ୧, ୨୦୨୫ ରେ ଏକ ବଡ଼ ଧରଣର ଆନ୍ଦୋଳନ ହୋଇଥିଲା, ଯେଉଁଥିରେ ପ୍ରଶାସନ ତରଫରୁ ପ୍ରତିଶ୍ରୁତି ଦିଆଯାଇଥିଲା। ତେବେ, ସଂଘ ଅଭିଯୋଗ କରିଛି ଯେ, ପ୍ରଶାସନ ତା’ର ପ୍ରତିଶ୍ରୁତି ପୂରଣ କରିବାରେ ବିଫଳ ହୋଇଛି।
ନବରଙ୍ଗପୁର ଆଶା କର୍ମୀ ସଂଘ ୧୪ ତାରିଖରେ ପୁଲିସ ପଡ଼ିଆରୁ ଏକ ବିଶାଳ ଶୋଭାଯାତ୍ରା ବାହାର କରି ଜିଲ୍ଲାପାଳଙ୍କ ବାସଗୃହ କାର୍ଯ୍ୟାଳୟ ଘେରାଉ କରି ବିକ୍ଷୋଭ ପ୍ରଦର୍ଶନ କରିବାକୁ ଯୋଜନା କରିଛି। ପରବର୍ତ୍ତୀ ଦିନ, ଅକ୍ଟୋବର ୧୫ ତାରିଖରୁ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଅନଶନ ଆରମ୍ଭ କରାଯିବ ବୋଲି ସଂଘ ପକ୍ଷରୁ ସୂଚନା ଦିଆଯାଇଛି।
ସଂଘ ଆଠଟି ମୁଖ୍ୟ ଦାବି ସହିତ ରାଜରାସ୍ତାକୁ ଓହ୍ଲାଇବାକୁ ଚେତାବନୀ ଦେଇଛି। ଏହି ଦାବିଗୁଡ଼ିକ ମଧ୍ୟରେ ଅନ୍ତର୍ଭୁକ୍ତ:
- ଡାକ୍ତର ସାଗରିକା ସ୍ୱାଇଁଙ୍କୁ ତୁରନ୍ତ ନିଲମ୍ବନ ଓ ଗିରଫ କରିବା।
- ନବରଙ୍ଗପୁର ଜିଲ୍ଲାର ସମସ୍ତ ଆଶାକର୍ମୀଙ୍କ ପାଇଁ ବିଶ୍ରାମ ଗୃହର ବ୍ୟବସ୍ଥା ଏବଂ ଅବସରକାଳୀନ ସହାୟତା ପ୍ରଦାନ।
- ଆଶାକର୍ମୀଙ୍କୁ ସରକାରୀ କର୍ମଚାରୀ ଭାବେ ଘୋଷଣା କରି ମାସିକ ୨୪ ହଜାର ଟଙ୍କା ବେତନ ପ୍ରଦାନ।
- ଦୁର୍ଘଟଣାଜନିତ ମୃତ୍ୟୁ କ୍ଷେତ୍ରରେ ୧୦ ଲକ୍ଷ ଟଙ୍କା ଏବଂ ସ୍ୱାଭାବିକ ମୃତ୍ୟୁରେ ୫ ଲକ୍ଷ ଟଙ୍କା ଆର୍ଥିକ ସହାୟତା।
- ମାସିକ ପେନସନ ବାବଦରେ ପ୍ରତ୍ୟେକ ଆଶାକର୍ମୀଙ୍କୁ ୫ ହଜାର ଟଙ୍କା ପ୍ରଦାନ।
ସଂଘ ପକ୍ଷରୁ ସ୍ପଷ୍ଟ ଭାବେ କୁହାଯାଇଛି ଯେ, “ଯେତେ ଦିନ ପର୍ଯ୍ୟନ୍ତ ଆମର ଦାବିର ସମାଧାନ ନ ହୋଇଛି, ସେତିକି ଦିନ ପର୍ଯ୍ୟନ୍ତ ଆନ୍ଦୋଳନ ଚାଲୁ ରହିବ।” ଏହି ଗୁରୁତ୍ୱପୂର୍ଣ୍ଣ ନିଷ୍ପତ୍ତି ଜିଲ୍ଲା ସ୍ତରୀୟ ବୈଠକରେ ଗ୍ରହଣ କରାଯାଇଛି। ବୈଠକରେ ଭାରତୀୟ ମଜଦୁର ସଂଘ ଜିଲ୍ଲା ସଭାପତି ବାଙ୍କ ବିହାରୀ ବିଷୟୀ, ଉପଦେଷ୍ଟା ପରମେଶ୍ୱର ବିଷୟୀ, ଆଶା କର୍ମୀ ସଂଘ ଜିଲ୍ଲା ସଭାନେତ୍ରୀ କବିତା ସ୍ୱାଇଁ, ସମ୍ପାଦିକା ଗୀତାଞ୍ଜଳି ହରିଜନ ଏବଂ ବହୁ ସଂଖ୍ୟାରେ ଆଶାକର୍ମୀ ଉପସ୍ଥିତ ଥିଲେ।