କାମାକ୍ଷାନଗର : ପରଜଙ୍ଗ ଥାନା ଦଦରାଘାଟି ଫାଣ୍ଡି ଅଞ୍ଚଳରେ ଚାଞ୍ଚଲ୍ୟ l ଝିଅକୁ ଅସଦାଚରଣ କରୁଥିବା ନେଇ ଯୁବକଙ୍କୁ ବିଭତ୍ସ ଭାବେ ହତ୍ୟା କଲା ବାପା l ହତ୍ୟା କରିବା ପରେ ନିଜକୁ ପୋଲିସ ନିକଟରେ ଆତ୍ମସମର୍ପଣ କରିଛି ବାପା l ମୃତ ଯୁବକ ଜଣକ ଦଦରାଘାଟି ଫାଣ୍ଡି ଆଖୁଆପାଳ ପଞ୍ଚାୟତର ୧ ନମ୍ବର କଲୋନୀର କରୁଣାକର ବେହେରା l ହତ୍ୟାକାରୀ ସେହି ପଞ୍ଚାୟତ ମୋହନପଶି ଗ୍ରାମର ରୁପା ପିଙ୍ଗୁଆ ହୋଇଥିବା ଜଣାପଡିଛି l
ସୂଚନା ଅନୁସାରେ, ୧ ନମ୍ବର କଲୋନୀର କାଶୀନାଥ ବେହେରାଙ୍କ ପୁଅ କରୁଣାକର, ଜେସିବି ହେଲ୍ପର ଭାବରେ କାମ କରୁଥିବା ବେଳେ ଗତ ତିନିଦିନ ଧରି ମୋହନପଶି ଗାଁରେ ରହି କାମ କରୁଥିଲେ l ଗତକାଲି ରାତିରେ କରୁଣାକର ରୁପା ପିଙ୍ଗୁଆଙ୍କ ଝିଅକୁ ଅସଦାଚରଣ କରୁଥିବା ବେଳେ ରୁପା ପିଙ୍ଗୁଆ ଏହାକୁ ଦେଖି ଦେଇଥିଲେ l ଏଥିରେ ଉତକ୍ଷିପ୍ତ ହୋଇ ରୁପା ପିଙ୍ଗୁଆ ଏକ ଧାରୁଆ ଅସ୍ତ୍ରରେ କରୁଣାକରଙ୍କୁ ଆକ୍ରମଣ କରିବା ସହ ହତ୍ୟା କରିଥିଲେ l
ହତ୍ୟା କରିବା ପରେ ମୃତ ଦେହକୁ ଗାଁ ନିକଟରେ ଥିବା ଗମ୍ଭାରୀଆ ନାଳ ନିକଟରେ ଫିଙ୍ଗିଦେଇ ଦଦରାଘାଟି ଫାଣ୍ଡିକୁ ଯାଇ ଆତ୍ମସମର୍ପଣ କରିଥିଲେ l ତେବେ ଖବର ପାଇ ମୃତକ କରୁଣାକରଙ୍କ ବାପା କାଶୀନାଥ ଓ ଅନ୍ୟ ସମ୍ପର୍କୀୟମାନେ ମୋହନପଶି ଗାଁରେ ପହଞ୍ଚି ପୁଅକୁ ସଂଘବଦ୍ଧ ଭାବେ ଆକ୍ରମଣ କରି ହତ୍ୟା କରିଥିବା ଅଭିଯୋଗ କରିଛନ୍ତି l
ସମସ୍ତ ହତ୍ୟା ଅଭିଯୁକ୍ତଙ୍କୁ ଧରିବା ସହ ସେମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ପୋଲିସ ନିକଟରେ ଦାବି କରିଛନ୍ତି ମୃତକଙ୍କ ପରିବାର l ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଉଦ୍ଧାର କରି ହତ୍ୟାକାରୀ ରୁପା ପିଙ୍ଗୁଆଙ୍କୁ ଘଟଣା ସମ୍ପର୍କରେ ଅଧିକ ପଚରାଉଚୁରା ଜାରି ରଖିଛି l