କୋରାପୁଟ : ‘ସୁସ୍ଥ ବାର୍ଦ୍ଧକ୍ୟ ନିମନ୍ତେ ଯୋଗ’ ଶୀର୍ଷକ ବାର୍ତ୍ତା ସହ ‘ଆନ୍ତର୍ଜାତୀୟ ଯୋଗ ଦିବସ-2026’ ଆଜି କୋରାପୁଟ ସ୍ପୋର୍ଟ୍ସ କମ୍ପ୍ଲେକ୍ସ ଠାରେ ଉତ୍ସାହପୂର୍ଣ୍ଣ ବାତାବରଣ ମଧ୍ୟରେ ପାଳିତ ହୋଇଯାଇଛି |
ଏହି କାର୍ଯ୍ୟକ୍ରମରେ କୋରାପୁଟ ବିଧାୟକ ରଘୁରାମ ମାଛ, ଜିଲ୍ଲାପାଳ ମନୋଜ ସତ୍ୟୱାନ ମହାଜନ,ଜିଲ୍ଲା ଆରକ୍ଷୀ ଅଧିକ୍ଷକ ରୋହିତ ଶର୍ମା, ମୁଖ୍ୟ ଉନ୍ନୟନ ଅଧିକାରୀ ତଥା ନିର୍ବାହୀ ଅଧିକାରୀ, ଜିଲ୍ଲା ପରିଷଦ ବେଣୁଧର ଶବର ଏବଂ ଅନ୍ୟ ଜିଲ୍ଲାସ୍ତରୀୟ ଅଧିକାରୀମାନେ ଯୋଗ ଦେଇଥିଲେ। ବହୁ ସଂଖ୍ୟାରେ ବରିଷ୍ଠ ନାଗରିକ ଓ ସାଧାରଣ ଜନତା ସାମୂହିକ ଯୋଗାଭ୍ୟାସରେ ଅଂଶଗ୍ରହଣ କରିଥିଲେ।
ପ୍ରଶିକ୍ଷକମାନଙ୍କ ଦ୍ୱାରା ତାଡ଼ାସନ, ଭୁଜଙ୍ଗାସନ, ବଜ୍ରାସନ, ପ୍ରାଣାୟାମ ଓ ଧ୍ୟାନ ଆଦି ଅଭ୍ୟାସ କରାଯାଇଥିଲା। ବିଧାୟକ ରଘୁରାମ ମାଛ ନିଜ ବକ୍ତବ୍ୟରେ କହିଥିଲେ, “ଆସନ୍ତୁ, ଯୋଗକୁ ଆମ ଦୈନନ୍ଦିନ ଜୀବନର ଅଂଶ କରିବା ଏବଂ ଏହାର ସୁଫଳକୁ ଆହୁରି ସୁଦୂର ପ୍ରସାରୀ କରିବା। ବିଶେଷ କରି ବାର୍ଦ୍ଧକ୍ୟ ସମୟରେ ସୁସ୍ଥ ଶରୀର ଓ ମନ ପାଇଁ ଯୋଗ ଅତ୍ୟନ୍ତ ଉପଯୋଗୀ।”
କାର୍ଯ୍ୟକ୍ରମ ଶେଷରେ ଅଂଶଗ୍ରହଣକାରୀମାନଙ୍କୁ ଯୋଗ ଉପରେ ସଚେତନତା ପତ୍ରିକା ବଣ୍ଟନ କରାଯାଇଥିଲା ଓ ପ୍ରତିଦିନ ଅତିକମରେ ତିରିଶି ମିନିଟ ଯୋଗ କରିବାକୁ ଶପଥ ନିଆଯାଇଥିଲା।
