ଉମରକୋଟ :
ନବରଙ୍ଗପୁର ଜିଲ୍ଲାର ଉମରକୋଟ ଠାରେ ଗୋସିନ କାନ ଜୁନ ଗୋଜୁ କାଇ ଇଣ୍ଡିଆର ଏକ ଗୁରୁତ୍ୱପୂର୍ଣ୍ଣ ସଭା ଉତ୍ସାହ ଓ ଉଦ୍ଦେଶ୍ୟପୂର୍ଣ୍ଣ ପରିବେଶ ମଧ୍ୟରେ ଅନୁଷ୍ଠିତ ହୋଇଥିଲା। ସମଗ୍ର ଓଡ଼ିଶାର ମୁଖ୍ୟ ପ୍ରଶିକ୍ଷକ ମାଷ୍ଟର ଶ୍ରୀରାମ ନାଗଙ୍କ ନେତୃତ୍ୱରେ ଏହି ସଭା ଆୟୋଜିତ ହୋଇଥିଲା। ସଭାରେ କାରାଟେର ପ୍ରଚାର ଓ ପ୍ରସାର, ଯୁବପିଢ଼ୀଙ୍କ ମଧ୍ୟରେ ଆତ୍ମରକ୍ଷା ଶିକ୍ଷାର ଗୁରୁତ୍ୱ ଏବଂ ସଂଗଠନକୁ ଅଧିକ ସୁଦୃଢ଼ କରିବା ସମ୍ପର୍କରେ ବିସ୍ତୃତ ଆଲୋଚନା କରାଯାଇଥିଲା।
ଯୁବପିଢ଼ୀଙ୍କୁ ଆତ୍ମବିଶ୍ୱାସୀ ଓ ଶୃଙ୍ଖଳିତ କରିବା ସହ ସମାଜରେ ଆତ୍ମରକ୍ଷା ସଚେତନତା ବୃଦ୍ଧି କରିବା ଉଦ୍ଦେଶ୍ୟରେ ଓଡ଼ିଶା ପାଇଁ ଏକ ନୂତନ ରାଜ୍ୟ କମିଟି ଗଠନ କରାଯାଇଥିବା ଘୋଷଣା କରାଯାଇଥିଲା। ସଂଗଠନର ଭବିଷ୍ୟତ ଯୋଜନା ଏବଂ କାର୍ଯ୍ୟକ୍ରମକୁ ଆହୁରି ଗତିଶୀଳ କରିବା ପାଇଁ ନୂତନ ପଦାଧିକାରୀମାନଙ୍କୁ ଦାୟିତ୍ୱ ଅର୍ପଣ କରାଯାଇଛି।
ନବଗଠିତ ରାଜ୍ୟ କମିଟିର ପଦାଧିକାରୀମାନେ ହେଲେ— ରାଜ୍ୟ ସଭାପତି ଶ୍ରୁତି ନାଗ, ରାଜ୍ୟ ଉପ-ସଭାପତି ଗଙ୍ଗାଧର କଛିମ, ରାଜ୍ୟ ସାଧାରଣ ସମ୍ପାଦକ ସୁମନ ହିଆଲ, ରାଜ୍ୟ ଯୁଗ୍ମ ସମ୍ପାଦକ ଅର୍ଜୁନ ଗୌଡ଼, ରାଜ୍ୟ କୋଷାଧ୍ୟକ୍ଷ ମନୋହର ଜାନୀ ଏବଂ ରାଜ୍ୟ ଟେକ୍ନିକାଲ ଡାଇରେକ୍ଟର ଭାବେ ଶ୍ରୀରାମ ନାଗଙ୍କୁ ମନୋନୀତ କରାଯାଇଛି। ଏହା ସହ କାର୍ଯ୍ୟକାରିଣୀ ସଦସ୍ୟ ଭାବେ ଅଭି ମୁଦୁଲି, ବସନ୍ତ ମହାନ୍ତି, ସନ୍ତୋଷ ମାଝୀ, ନୀଳ ପୂଜାରୀ ଓ ରୋସନଦା ସତନାମୀଙ୍କୁ ଚୟନ କରାଯାଇଛି।
ଏହି ଅବସରରେ ମାଷ୍ଟର ଶ୍ରୀରାମ ନାଗ ନିଜ ବକ୍ତବ୍ୟରେ କହିଥିଲେ ଯେ, “କାରାଟେ କେବଳ ଏକ ଖେଳ ନୁହେଁ, ଏହା ମଣିଷର ଆତ୍ମରକ୍ଷା କ୍ଷମତା ବିକାଶ ସହ ଶୃଙ୍ଖଳା, ଆତ୍ମବିଶ୍ୱାସ ଓ ଉତ୍ତମ ଚରିତ୍ର ଗଠନର ଏକ ଶକ୍ତିଶାଳୀ ମାଧ୍ୟମ। ଆଜିର ଯୁବପିଢ଼ୀଙ୍କୁ ସଠିକ୍ ଦିଗଦର୍ଶନ ଦେବା ପାଇଁ କାରାଟେ ଶିକ୍ଷା ଅତ୍ୟନ୍ତ ଆବଶ୍ୟକ।”
ସେ ଆହୁରି କହିଥିଲେ ଯେ ଉମରକୋଟ ଓ ଆଖପାଖ ଅଞ୍ଚଳରେ କାରାଟେର ବିକାଶ ପାଇଁ ଏହି ନୂତନ କମିଟି ଗୁରୁତ୍ୱପୂର୍ଣ୍ଣ ଭୂମିକା ନିଭାଇବ ଏବଂ ଆଗାମୀ ଦିନରେ ଅଧିକ ସଂଖ୍ୟକ ଯୁବକ ଓ ଯୁବତୀଙ୍କୁ ଏହି ପ୍ରଶିକ୍ଷଣ ସହ ଯୋଡ଼ାଯିବ।
ସଭାରେ ଉପସ୍ଥିତ ସଦସ୍ୟମାନେ ଭବିଷ୍ୟତରେ କାରାଟେ ପ୍ରଶିକ୍ଷଣ ଶିବିର, ଜିଲ୍ଲାସ୍ତରୀୟ ଏବଂ ରାଜ୍ୟସ୍ତରୀୟ ପ୍ରତିଯୋଗିତା ଆୟୋଜନ ସହିତ ଯୁବପିଢ଼ୀଙ୍କ ମଧ୍ୟରେ ଆତ୍ମରକ୍ଷା ସଚେତନତା ବୃଦଧି ପାଇଁ ବିଭିନ୍ନ ଯୋଜନା ଉପରେ ଏକମତ ପ୍ରକାଶ କରିଥିଲେ। ଏହି ସଭା ମାଧ୍ୟମରେ କାରାଟେର ପ୍ରଚାର ଓ ସଂଗଠନର ଭବିଷ୍ୟତ କାର୍ଯ୍ୟଧାରାକୁ ନୂତନ ଦିଗ ମିଳିବ ବୋଲି ଉପସ୍ଥିତ ସଦସ୍ୟମାନେ ଆଶା ପ୍ରକାଶ କରିଥିଲେ।
