ପ୍ରଶାସନର ଉଦାସୀନତା ଯୋଗୁଁ ଆସିକା ବୁଡ଼ିଲା, ଅଭିଶାପ ପାଲଟିଲା ଟିପିସର ନାଳଗଞ୍ଜାମ ଜିଲ୍ଲା ଉପରେ ଦୃଷ୍ଟି ନଦେବାରେ ରାଜ୍ୟ ସରକାର ସମ୍ପୂର୍ଣ୍ଣ ବିଫଳ

ବ୍ରହ୍ମପୁର: ଗଞ୍ଜାମ ଜିଲ୍ଲାର ଆସିକା ଅଞ୍ଚଳବାସୀଙ୍କୁ ଏକ ଅକଥନୀୟ ଦୁର୍ଦ୍ଦଶା ମଧ୍ୟକୁ ଠେଲି ଦେଇଛି ପ୍ରଳୟଙ୍କରୀ ବନ୍ୟା। ଆସିକା ସହରର ଦୁଇ ପାର୍ଶ୍ୱରେ ପ୍ରବାହିତ ଋଷିକୂଲ୍ୟା ଓ ବଡ଼ନଦୀ କ୍ଷେତ୍ରରେ ପ୍ରଶାସନର ଭୁଲ୍ ନିଷ୍ପତ୍ତି ତଥା ଅଦୂରଦର୍ଶିତା ଯୋଗୁଁ ଆଜି ଆସିକାବାସୀ ଏହି ପ୍ରଳୟଙ୍କରୀ ବନ୍ୟା ସହ ଜୁଝୁଛନ୍ତି। ପ୍ରଶାସନ ପକ୍ଷରୁ କେବଳ ଋଷିକୂଲ୍ୟା ନଦୀରେ ବନ୍ୟା ଜଳ ଆସିବ, ତେଣୁ ତଳିଆ ଅଞ୍ଚଳବାସୀ ଉଚ୍ଚ ସ୍ଥାନକୁ ଚାଲିଯାଆନ୍ତୁ ବୋଲି ଡାକବାଜି ଯନ୍ତ୍ର (ମାଇକ୍) ଯୋଗେ ପ୍ରଚାର କରି ପ୍ରଶାସନ ନିଜ କର୍ତ୍ତବ୍ୟ ସାରିଦେଇ ନାକରେ ତେଲ ଦେଇ ଶୋଇପଡ଼ିଥିଲା। ଅନ୍ୟପକ୍ଷରେ, ଋଷିକୂଲ୍ୟାରେ ବନ୍ୟା ଜଳସ୍ତର ବିପଦସଙ୍କୁଳ ଭାବେ ଯେତିକି ବଢ଼ିବାରେ ଲାଗିଥିଲା, ପ୍ରଶାସନିକ ଅଧିକାରୀମାନେ ଲୋକଙ୍କ ଫୋନ୍ ଉଠାଇବା (ରିସିଭ୍ କରିବା) ସେତିକି ଭୁଲିଯାଇଥିଲେ ଏବଂ ଅସହାୟ ଲୋକଙ୍କ ସହ କୌଣସି ଯୋଗାଯୋଗ ରଖିନଥିଲେ।

ଗତ ୧୯୯୦ ମସିହାର ପ୍ରଳୟଙ୍କରୀ ବନ୍ୟା ଠାରୁ ମଧ୍ୟ ସାମ୍ପ୍ରତିକ ‘ଅର୍ଣ୍ଣବ’ ବାତ୍ୟା ପରବର୍ତ୍ତୀ ସ୍ଥିତିରେ ଆସିକାବାସୀଙ୍କ ଦୁର୍ଦ୍ଦଶା ଆହୁରି ବଢ଼ିଯାଇଥିବା ଦେଖିବାକୁ ମିଳିଛି। ଆସିକାର ବାଣୀବିହାର, କଳିଙ୍ଗାରୋଡ୍, ଲକ୍ଷ୍ମୀ ବଜାର ଓ ବିନାୟକ ବଜାର ଆଦି ଅଞ୍ଚଳରେ ପ୍ରାୟ ୧୮ ଫୁଟରୁ ଊର୍ଦ୍ଧ୍ୱ ବନ୍ୟା ଜଳ ଦୀର୍ଘ ଘଣ୍ଟା ଧରି ଜମି ରହିବା ଫଳରେ ବ୍ୟବସାୟୀ ତଥା ସାଧାରଣ ଲୋକଙ୍କର କୋଟି କୋଟି ଟଙ୍କାର ସମ୍ପତ୍ତି ନଷ୍ଟ ହୋଇଛି। ଆସିକା ସହରର ସମସ୍ତ ୱାର୍ଡରେ ଥିବା ଘରଗୁଡ଼ିକ ମଧ୍ୟରେ କେଉଁଠି ୬ ଫୁଟ ତ ଆଉ କେଉଁଠି ୭ ଫୁଟ ଉଚ୍ଚତାରେ ବନ୍ୟା ଜଳ ପ୍ରବେଶ କରି ସବୁକିଛି ଜଳମଗ୍ନ କରିଦେଇଥିଲା। ଏହି କାରଣରୁ ସହରର ପରିମଳ ବ୍ୟବସ୍ଥା ଓ ବିଶୁଦ୍ଧ ପାନୀୟ ଜଳ ଯୋଗାଣ ବ୍ୟବସ୍ଥା ସମ୍ପୂର୍ଣ୍ଣ ଠପ୍ ହୋଇଯାଇଥିଲା। ବନ୍ୟା ଆସିବାର ଦୁଇ ଦିନ ପରେ ଯାଇ ବିଦ୍ୟୁତ୍ ସେବା କୌଣସି ପ୍ରକାରେ ଚାଲୁ ହୋଇପାରିଥିଲା।

ଏତେ ବଡ଼ ବିପର୍ଯ୍ୟୟ ଘଟିଯାଇଥିଲେ ହେଁ ପ୍ରଶାସନ ପକ୍ଷରୁ ସଫେଇ କାର୍ଯ୍ୟ ସନ୍ତୋଷଜନକ ଭାବେ ହୋଇପାରିନାହିଁ। ଏବେ ବି ସହରର ବିଭିନ୍ନ ରାସ୍ତାଘାଟ ଓ ଅଳିଆ ଆବର୍ଜନା କୁଣ୍ଡ ନିକଟରେ କୁଢ଼ କୁଢ଼ ମଇଳା ପଡ଼ିରହି ଦୁର୍ଗନ୍ଧ ବ୍ୟାପୁଛି, ଯାହାଫଳରେ ସ୍ଥାନୀୟ ଅଞ୍ଚଳରେ ଭୟଙ୍କର ସଂକ୍ରାମକ ମହାମାରୀ ଓ ରୋଗ ବ୍ୟାପିବାର ଗମ୍ଭୀର ଆଶଙ୍କା ସୃଷ୍ଟି ହୋଇଛି। ପ୍ରଶାସନ ତୁରନ୍ତ ଏଥିପ୍ରତି ଦୃଷ୍ଟି ଦେଇ ସ୍ଥାୟୀ ପ୍ରତିକାର ନକଲେ ଆଗାମୀ ଦିନରେ ସ୍ଥିତି ଆହୁରି ଜଟିଳ ହେବ ବୋଲି ସ୍ଥାନୀୟ ଜନସାଧାରଣରେ ତୀବ୍ର ଅସନ୍ତୋଷ ପ୍ରକାଶ ପାଇଛି।