ଦୀପାବଳୀରେ ବାଣ ବ୍ୟବସାୟକୁ ନେଇ ପ୍ରଶାସନର ନିୟମ ଉପରେ ପ୍ରଶ୍ନବାଚୀ : ନିୟମ ଭିତରେ ରହି ବ୍ୟବସାୟ କରିବେ କିପରି?

ବାଲିଗୁଡ଼ା, ୦୩/୧୧: ଦୀପାବଳି ଆସିଲେ ବାଣ ବଜାରରେ ବେଶ୍ ଚଳଚଞ୍ଚଳତା ଦେଖିବାକୁ ମିଳେ। ଏହି ସମୟରେ ବାଣ ବ୍ୟବସାୟ କରି ଦୁଇ ପଇସା ରୋଜଗାର କରିବାକୁ ଅନେକ କ୍ଷୁଦ୍ର ଓ ମଧ୍ୟମ ବ୍ୟବସାୟୀ ଆଗ୍ରହ ପ୍ରକାଶ କରିଥାନ୍ତି। ହେଲେ ବାଣ ବିକ୍ରି ପାଇଁ ପ୍ରଶାସନ ପକ୍ଷରୁ ଲାଇସେନ୍ସ ପ୍ରଦାନର ସମୟସୀମା ଓ ବ୍ୟବସାୟୀଙ୍କ ଦ୍ୱାରା ବାଣ ସଂଗ୍ରହ କରିବାର ବାସ୍ତବ ସ୍ଥିତିକୁ ନେଇ ଏବେ ଅନେକ ପ୍ରଶ୍ନବାଚୀ ସୃଷ୍ଟି ହୋଇଛି। ପ୍ରଶାସନର ନିୟମ ଓ ବ୍ୟବସାୟର ବ୍ୟବହାରିକ ଆବଶ୍ୟକତା ମଧ୍ୟରେ ରହିଥିବା ତାଳମେଳର ଅଭାବ ଏବେ ବ୍ୟବସାୟୀମାନଙ୍କୁ ଘୋର ଦ୍ୱନ୍ଦ୍ୱରେ ପକାଇଛି।

ଅଭିଯୋଗ ଅନୁଯାୟୀ, ଦୀପାବଳିର ମାତ୍ର ଦୁଇ ଦିନ ପୂର୍ବରୁ ଜିଲ୍ଲା ପ୍ରଶାସନ ପକ୍ଷରୁ ବାଣ ଦୋକାନ ଖୋଲିବା ନିମନ୍ତେ ଲାଇସେନ୍ସ ପ୍ରଦାନ କରାଯାଉଛି। କିନ୍ତୁ ବ୍ୟବସାୟୀମାନଙ୍କୁ ବଜାରର ଚାହିଦା ଓ ଯୋଗାଣ ବ୍ୟବସ୍ଥାକୁ ଦୃଷ୍ଟିରେ ରଖି ପ୍ରାୟ ମାସକ ପୂର୍ବରୁ ବାହାରୁ ବାଣ ସଂଗ୍ରହ କରି ରଖିବାକୁ ପଡ଼ୁଛି। କାରଣ ଶେଷ ମୁହୂର୍ତ୍ତରେ ବାଣ ଯୋଗାଣରେ ଘୋର ଅଭାବ ଦେଖାଦେବା ସହ ଅହେତୁକ ଦରବୃଦ୍ଧିର ଆଶଙ୍କା ମଧ୍ୟ ରହିଥାଏ। ଏଭଳି ସ୍ଥିତିରେ ଲାଇସେନ୍ସ ମିଳିବା ପୂର୍ବରୁ ବାଣ ସଂଗ୍ରହ କରି ମହଜୁଦ ରଖିଲେ ତାହାକୁ ବେଆଇନ ବୋଲି ଧରାଯିବାର ସମ୍ପୂର୍ଣ୍ଣ ଆଶଙ୍କା ରହୁଛି। ଯଦି ପୁଲିସ କିମ୍ବା ପ୍ରଶାସନ ଏହାର ସୁରାକ ପାଇ ଅଚାନକ ଚଢ଼ାଉ କରେ, ତେବେ ଲକ୍ଷାଧିକ ଟଙ୍କାର ବାଣ ଜବତ ହେବା ସହ ବ୍ୟବସାୟୀମାନଙ୍କୁ ଅଯଥାରେ ଆଇନଗତ ସମସ୍ୟାର ସମ୍ମୁଖୀନ ହେବାକୁ ପଡ଼ିଥାଏ। ଅନ୍ୟପକ୍ଷରେ, ଲାଇସେନ୍ସ ମିଳିବା ପରେ ବାଣ କିଣିବାକୁ ଗଲେ ଠିକ୍ ସମୟରେ ଆବଶ୍ୟକ ପରିମାଣର ଗୁଣାତ୍ମକ ବାଣ ମିଳିବା ନେଇ ସମ୍ପୂର୍ଣ୍ଣ ଅନିଶ୍ଚିତତା ଦେଖାଦେଉଛି।

ଏଠାରେ ସ୍ୱାଭାବିକ ଭାବେ ପ୍ରଶ୍ନ ଉଠୁଛି ଯେ, ଯଦି ଲାଇସେନ୍ସ ମିଳିବା ପୂର୍ବରୁ ବାଣ ରଖିବା ବେଆଇନ, ତେବେ ଲାଇସେନ୍ସ ମିଳିବାର ମାତ୍ର ଦୁଇ ଦିନ ମଧ୍ୟରେ ଜଣେ ବ୍ୟବସାୟୀ ବାହାରୁ କିପରି ବାଣ ସଂଗ୍ରହ କରି ଦୋକାନ ଖୋଲିପାରିବେ? ଆଉ ଯଦି ଲାଇସେନ୍ସ ପାଇବା ପରେ ସେହି ବାଣ ବିକ୍ରି କରିବା ଆଇନସମ୍ମତ, ତେବେ ତାହାର ପୂର୍ବ ପ୍ରସ୍ତୁତି ଓ ସୁରକ୍ଷିତ ପରିବହନ ପାଇଁ ଏକ ସ୍ପଷ୍ଟ ସରକାରୀ ବ୍ୟବସ୍ଥା କାହିଁକି ନାହିଁ?

ବାଣ ବ୍ୟବସାୟୀଙ୍କ ସୁରକ୍ଷା ସହିତ ସାଧାରଣ ଲୋକଙ୍କ ଜୀବନ ଓ ସମ୍ପତ୍ତିର ସୁରକ୍ଷା ନିଶ୍ଚିତ କରିବା ନିଶ୍ଚିତ ଭାବେ ପ୍ରଶାସନର ଏକ ପ୍ରମୁଖ ଦାୟିତ୍ୱ। ତେଣୁ ସୁରକ୍ଷା ନିୟମଗୁଡ଼ିକୁ କଡ଼ାକଡ଼ି ଭାବେ ପାଳନ କରିବା ସହ ଲାଇସେନ୍ସ ପ୍ରଦାନ, ବାଣ ସଂଗ୍ରହ ଓ ସଂରକ୍ଷଣ ପ୍ରକ୍ରିୟା ପାଇଁ ଏକ ସ୍ପଷ୍ଟ, ସରଳ ଓ ବ୍ୟବହାରିକ ନୀତି ପ୍ରଣୟନ କରିବା ଏକାନ୍ତ ଆବଶ୍ୟକ। ନଚେତ୍ ସଚ୍ଚୋଟ ଭାବେ ନିୟମ ପାଳନ କରି ବ୍ୟବସାୟ କରିବାକୁ ଚାହୁଁଥିବା ବ୍ୟବସାୟୀମାନେ ଅଯଥା ଭୟ ଓ ଆଇନଗତ ଦ୍ୱନ୍ଦ୍ୱ ମଧ୍ୟରେ ପଡ଼ି କ୍ଷତିଗ୍ରସ୍ତ ହେବେ। ନିୟମ ରହୁ, ନିରାପତ୍ତା ଓ ସୁରକ୍ଷା ମଧ୍ୟ ବଜାୟ ରହୁ; ହେଲେ ନିୟମ ଏପରି ଜଟିଳ ନହେଉ ଯାହାଦ୍ୱାରା ବ୍ୟବସାୟ ଆରମ୍ଭ କରିବା ପୂର୍ବରୁ ହିଁ ବ୍ୟବସାୟୀ ଦ୍ୱନ୍ଦ୍ୱରେ ପଡ଼ିଯିବେ। ତେଣୁ ଏହି ଗୁରୁତ୍ୱପୂର୍ଣ୍ଣ ସମସ୍ୟାର ସମାଧାନ ଦିଗରେ ଜିଲ୍ଲା ପ୍ରଶାସନ ପକ୍ଷରୁ ସମୟୋପଯୋଗୀ ସ୍ପଷ୍ଟୀକରଣ ସହ ଏକ ସ୍ଥାୟୀ ଓ ବ୍ୟବହାରିକ ପଦକ୍ଷେପ ଗ୍ରହଣ କରାଯିବା ନିତାନ୍ତ ଅପେକ୍ଷିତ।