ବାତ୍ୟା ‘ଅର୍ଣ୍ଣବ’ ସମୟରେ ମାନବିକତା ଓ କର୍ତ୍ତବ୍ୟନିଷ୍ଠାର ଅନନ୍ୟ ମିଶାଲ: ଟିପିଏସ୍ଓଡିଏଲ୍ର ସାହସୀ ଯୋଦ୍ଧାଙ୍କୁ ସଲାମ
ବାତ୍ୟା ‘ଅର୍ଣ୍ଣବ’ ସମୟରେ ମାନବିକତା ଓ କର୍ତ୍ତବ୍ୟନିଷ୍ଠାର ଅନନ୍ୟ ଉଦାହରଣ ସାଜିଲେ ଟିପିଏସ୍ଓଡିଏଲ୍ କର୍ମଚାରୀ
ବନ୍ୟା ପ୍ରଭାବିତ ଲୋକଙ୍କୁ ଆଶ୍ରୟ ଓ ଖାଦ୍ୟ ଯୋଗାଇବାଠାରୁ ଆରମ୍ଭ କରି କାର୍ଯ୍ୟାଳୟର ଗୁରୁତ୍ୱପୂର୍ଣ୍ଣ ଉପକରଣ ସୁରକ୍ଷିତ ରଖିବା ପର୍ଯ୍ୟନ୍ତ; ସାହସ, ସମ୍ବେଦନଶୀଳତା ଓ କର୍ତ୍ତବ୍ୟପରାୟଣତାର ନୂଆ ଇତିହାସ ସୃଷ୍ଟି କଲେ କର୍ମଚାରୀ
ବ୍ରହ୍ମପୁର, ନଭେମ୍ବର: ବାତ୍ୟା ‘ଅର୍ଣ୍ଣବ’ ପରବର୍ତ୍ତୀ ବନ୍ୟା ଯୋଗୁଁ ଦକ୍ଷିଣ ଓଡ଼ିଶାର ବିଭିନ୍ନ ଅଞ୍ଚଳରେ ଜନଜୀବନ ସମ୍ପୂର୍ଣ୍ଣ ବ୍ୟାହତ ହୋଇପଡ଼ିଥିବା ସମୟରେ ଭଞ୍ଜନଗରର ଦୟାସାଗର ନାୟକ ଏବଂ ଆସିକାର ବିକାଶ ଚନ୍ଦ୍ର ସ୍ୱାଇଁ ନିଜର ବୃତ୍ତିଗତ ତଥା ପେସାଦାର ଦାୟିତ୍ୱର ସୀମା ଡେଇଁ ମାନବିକତା ଓ କର୍ତ୍ତବ୍ୟନିଷ୍ଠାର ଏକ ଅନନ୍ୟ ଉଦାହରଣ ଉପସ୍ଥାପନ କରିଛନ୍ତି। ଦୟାସାଗର ବନ୍ୟା ପ୍ରଭାବିତ ନିରାଶ୍ରୟ ଲୋକଙ୍କ ପାଇଁ ନିଜ ଘରର ଦ୍ୱାର ଖୋଲି ଦେଇଥିବା ବେଳେ ବିକାଶ ନିଜ ଜୀବନକୁ ବାଜି ଲଗାଇ ଛାତିଏ ପାଣିରେ ପଶି କାର୍ଯ୍ୟାଳୟର ଗୁରୁତ୍ୱପୂର୍ଣ୍ଣ ଉପକରଣ ଓ ଦସ୍ତାବିଜ୍ଗୁଡ଼ିକୁ ସୁରକ୍ଷିତ ଭାବେ ରକ୍ଷା କରିଥିଲେ।
ସେମାନଙ୍କର ଏହି ନିସ୍ୱାର୍ଥପର କାର୍ଯ୍ୟ କେବଳ ଦୁଇ ଜଣ କର୍ମଚାରୀଙ୍କ ବ୍ୟକ୍ତିଗତ କାହାଣୀ ନୁହେଁ, ବରଂ ଚରମ ସଙ୍କଟ ସମୟରେ ସମାଜ ତଥା ସହକର୍ମୀଙ୍କ ସହାୟତା ପାଇଁ ଆଗେଇ ଆସିଥିବା ଟିପି ସଦର୍ଣ୍ଣ ଓଡ଼ିଶା ଡିଷ୍ଟ୍ରିବ୍ୟୁସନ ଲିମିଟେଡ୍ (ଟିପିଏସ୍ଓଡିଏଲ୍)ର ହଜାର ହଜାର ନିଷ୍ଠାପର କର୍ମଚାରୀଙ୍କ ନିରବଚ୍ଛିନ୍ନ ସେବା ଓ ଉତ୍ସର୍ଗୀକୃତ ମନୋଭାବର ପ୍ରକୃତ ପ୍ରତିଫଳନ।
ଭଞ୍ଜନଗରରେ କାର୍ଯ୍ୟରତ ଦୟାସାଗର ନାୟକ ବନ୍ୟା ପ୍ରଭାବିତ ଆଖପାଖ ଅଞ୍ଚଳର ଜନସାଧାରଣଙ୍କୁ ସହାୟତା କରିବାକୁ ଆଗଧାଡ଼ିରେ ରହିଥିଲେ। ସେ ପ୍ରଶାସନିକ ଉଦ୍ଧାର କାର୍ଯ୍ୟରେ ସହଯୋଗ କରିବା ସଙ୍ଗେ ସଙ୍ଗେ ପ୍ରାୟ ୨୫ ଜଣ ବନ୍ୟାବିପନ୍ନ ଲୋକଙ୍କୁ ନିଜ ବାସଭବନରେ ଆଶ୍ରୟ ପ୍ରଦାନ କରିଥିଲେ। କେବଳ ସେତିକି ନୁହେଁ, ସେମାନଙ୍କ ପାଇଁ ପ୍ରତ୍ୟହ ତାଜା ରନ୍ଧା ଖାଦ୍ୟର ବ୍ୟବସ୍ଥା ମଧ୍ୟ ନିଜ ଉଦ୍ୟମରେ କରିଥିଲେ। ଚତୁର୍ଦ୍ଦିଗରେ ଜଳବନ୍ଦୀ ହୋଇ ମୌଳିକ ଆବଶ୍ୟକତା ପାଇବା ଅତ୍ୟନ୍ତ କଷ୍ଟକର ହୋଇପଡ଼ିଥିବା ସମୟରେ ତାଙ୍କ ଘର ଅସହାୟ ଲୋକଙ୍କ ପାଇଁ ଏକ ସୁରକ୍ଷିତ ଆଶ୍ରୟ ଓ ମାନବିକ ସହାୟତାର ପ୍ରମୁଖ କେନ୍ଦ୍ର ପାଲଟିଥିଲା।
ସେହିପରି ଆସିକାରେ ବନ୍ୟାଜଳ ସହର ମଧ୍ୟକୁ ପ୍ରବେଶ କରି ଚାରିଆଡ଼େ ଜଳପ୍ଳାବନ ସୃଷ୍ଟି କରିବା ପରେ, ଗତ ଅକ୍ଟୋବର ୨୯ ତାରିଖରେ ଟିପିଏସ୍ଓଡିଏଲ୍ର ଆସିକା ଇଲେକ୍ଟ୍ରିକାଲ ଡିଭିଜନ୍-୧ର ଏଷ୍ଟିମେଟର ବିକାଶ ଚନ୍ଦ୍ର ସ୍ୱାଇଁ କାର୍ଯ୍ୟାଳୟର ସମ୍ପତ୍ତି ତଥା ଗୁରୁତ୍ୱପୂର୍ଣ୍ଣ ଜିନିଷଗୁଡ଼ିକୁ ସୁରକ୍ଷିତ ରଖିବାକୁ ସ୍ୱତଃପ୍ରବୃତ୍ତ ଭାବେ ଦୃଢ଼ ପଦକ୍ଷେପ ନେଇଥିଲେ। ପ୍ରବଳ ସ୍ରୋତ ଓ ଛାତିଏ ଉଚ୍ଚର ବନ୍ୟା ପାଣିରେ ପଶି ସେ ପ୍ରାୟ ୧୪ରୁ ୧୫ଟି କମ୍ପ୍ୟୁଟର, ସରକାରୀ ଫାଇଲ୍, ପ୍ରିଣ୍ଟର, ସିପିୟୁ ଓ ୟୁପିଏସ୍ ବ୍ୟାଟେରୀ ଭଳି ମୂଲ୍ୟବାନ ଯନ୍ତ୍ରାଂଶଗୁଡ଼ିକୁ କାର୍ଯ୍ୟାଳୟର ଉପର ମହଲାର ସୁରକ୍ଷିତ ସ୍ଥାନକୁ ସ୍ଥାନାନ୍ତରିତ କରିଥିଲେ। ପରଦିନ ପାଣି ଖସିବା ପର୍ଯ୍ୟନ୍ତ ସେ ନିଜ ଭୋକଶୋଷ ଭୁଲି ରାତିସାରା ଏକୁଟିଆ କାର୍ଯ୍ୟାଳୟରେ ଉଜାଗର ରହି ସମସ୍ତ ଉପକରଣ ଓ ଗୁରୁତ୍ୱପୂର୍ଣ୍ଣ ଦସ୍ତାବିଜ୍ଗୁଡ଼ିକର ସୁରକ୍ଷା ନିଶ୍ଚିତ କରିଥିଲେ। ଉଲ୍ଲେଖଯୋଗ୍ୟ ଯେ, ସେହି ଦୁର୍ବିପାକ ସମୟରେ ତାଙ୍କ ନିଜ ପରିବାର ମଧ୍ୟ ଘରେ ବନ୍ୟାଜଳ ଘେରରେ ଫସି ରହି ଅତ୍ୟନ୍ତ ଅସହାୟ ଅବସ୍ଥାରେ ଥିଲେ।
ସେହି ରୋମାଞ୍ଚକର ତଥା କଷ୍ଟଦାୟକ ଅନୁଭୂତି ବିଷୟରେ ପ୍ରକାଶ କରି ବିକାଶ କହିଛନ୍ତି, “ମୋର ପୂରା ପରିବାର ଘରେ ବନ୍ୟା ପାଣି ଭିତରେ ଫସି ରହିଥିଲେ, ଯାହା ମୋତେ ଚିନ୍ତିତ କରିଥିଲା। କିନ୍ତୁ ସେହି ମୁହୂର୍ତ୍ତରେ ମୋତେ ଲାଗିଥିଲା ଯେ ଜଣେ କର୍ମଚାରୀ ଭାବେ ମୋ କର୍ତ୍ତବ୍ୟ ପ୍ରତି ଥିବା ଦାୟିତ୍ୱ ମଧ୍ୟ ସେତିକି ଗୁରୁତ୍ୱପୂର୍ଣ୍ଣ ଥିଲା। ସେଠାରେ ଦ୍ୱିଧାରେ ପଡ଼ି କିଛି ଚିନ୍ତା କରିବା ପାଇଁ ସମୟ ନଥିଲା। ବିଦ୍ୟୁତ ସେବା ଯେପରି ପ୍ରଭାବିତ ନହୁଏ, ସେଥିପାଇଁ କାର୍ଯ୍ୟାଳୟର ଗୁରୁତ୍ୱପୂର୍ଣ୍ଣ ଦସ୍ତାବିଜ୍ ଓ ବୈଦ୍ୟୁତିକ ଉପକରଣଗୁଡ଼ିକୁ ସୁରକ୍ଷିତ ରଖିବା ହିଁ ସେହି ସମୟରେ ମୋର ପରମ ଧର୍ମ ବୋଲି ମୁଁ ଅନୁଭବ କରିଥିଲି।”
ଦୟାସାଗର ଓ ବିକାଶଙ୍କ ଏହି ନିଷ୍ଠାପର କାର୍ଯ୍ୟ ପ୍ରାକୃତିକ ବିପର୍ଯ୍ୟୟ ସମୟରେ ଟିପିଏସ୍ଓଡିଏଲ୍ କର୍ମଚାରୀମାନଙ୍କ ଅସୀମ ଧୈର୍ଯ୍ୟ, ନିଷ୍ଠା ଓ ସମର୍ପଣର ଉଜ୍ଜ୍ୱଳ ନମୁନା ମାତ୍ର। କମ୍ପାନୀର ଅଧୀନସ୍ଥ ଆଠଟି ଜିଲ୍ଲାର କାର୍ଯ୍ୟକ୍ଷେତ୍ରରେ ହଜାର ହଜାର କର୍ମଚାରୀ, ଦକ୍ଷ ଇଞ୍ଜିନିୟର, ଅଧିକାରୀ ଓ ଠିକା ପ୍ରକଳ୍ପ କର୍ମଚାରୀ ବାତ୍ୟା ତଥା ପ୍ରଳୟଙ୍କରୀ ବନ୍ୟାର ମୁକାବିଲା କରିବା ପାଇଁ ଦିନରାତି ଏକ କରି ନିରନ୍ତର କାର୍ଯ୍ୟ କରିଥିଲେ। ସେମାନେ ନିଜର ନିୟମିତ ସରକାରୀ ଦାୟିତ୍ୱ ନିର୍ବାହ କରିବା ସହିତ ବିପନ୍ନ ଜନସାଧାରଣଙ୍କୁ ସହାୟତାର ହାତ ବଢ଼ାଇ ଉଚ୍ଚକୋଟୀର ସେବା ଓ ସହାନୁଭୂତିର ମନୋଭାବ ପ୍ରଦର୍ଶନ କରିଥିଲେ।
ଦକ୍ଷିଣ ଓଡ଼ିଶାରେ ତ୍ୱରିତ ବିଦ୍ୟୁତ ପୁନରୁଦ୍ଧାର କାର୍ଯ୍ୟ ପାଇଁ ପ୍ରାୟ ୬,୫୦୦ କର୍ମଚାରୀଙ୍କୁ ଯୁଦ୍ଧକାଳୀନ ଭିତ୍ତିରେ ନିୟୋଜିତ କରାଯାଇଥିଲା। ଏହି ଟିମ୍ଗୁଡ଼ିକୁ ସହଯୋଗ କରିବା ଲାଗି କ୍ଷେତ୍ରସ୍ତରରେ ପ୍ରାୟ ୪୦୦ଟି ସ୍ୱତନ୍ତ୍ର ଗାଡ଼ି, ୬ଟି ମୋବାଇଲ୍ ଡିଷ୍ଟ୍ରିବ୍ୟୁସନ୍ ସବ୍ଷ୍ଟେସନ୍ ଏବଂ ୧୬ଟି ଟ୍ରାଞ୍ଜିଟ୍ ଷ୍ଟୋରର ସୁବିଧା ଯୋଗାଇ ଦିଆଯାଇଥିଲା। ପ୍ରବଳ ଜଳବନ୍ଦୀ ସ୍ଥିତି, ବିଦ୍ୟୁତ ଖୁଣ୍ଟ ଓ ତାର ଭାଙ୍ଗି ହୋଇଥିବା ଭିତ୍ତିଭୂମିଗତ କ୍ଷୟକ୍ଷତି ତଥା ଯୋଗାଯୋଗରେ ସୃଷ୍ଟି ହୋଇଥିବା ବ୍ୟାପକ ବାଧା ସତ୍ତ୍ୱେ କ୍ଷେତ୍ରୀୟ ଦଳଗୁଡ଼ିକ ଅକ୍ଳାନ୍ତ ପରିଶ୍ରମ କରି ମରାମତି ଓ ବିଦ୍ୟୁତ ପୁନରୁଦ୍ଧାର କାର୍ଯ୍ୟକୁ ଆଗେଇ ନେଇଥିଲେ। ଏହି ସମନ୍ୱିତ ପ୍ରୟାସ ଫଳରେ ହିଁ ପ୍ରଭାବିତ ଅଞ୍ଚଳରେ ଅତି କମ୍ ସମୟ ମଧ୍ୟରେ ଅତ୍ୟାବଶ୍ୟକ ବିଦ୍ୟୁତ ସେବା ପୁନଃସ୍ଥାପନ ସମ୍ଭବପର ହୋଇପାରିଥିଲା।
ଏହି ସମସ୍ତ ବାସ୍ତବ ଦୃଷ୍ଟାନ୍ତ ପ୍ରମାଣ କରିଛି ଯେ ପ୍ରାକୃତିକ ବିପର୍ଯ୍ୟୟର ମୁକାବିଲା ସମୟରେ ଜଣେ କର୍ମଚାରୀଙ୍କ ଭୂମିକା କେବଳ ତାଙ୍କ ଦୈନନ୍ଦିନ ନିର୍ଦ୍ଧାରିତ କାର୍ଯ୍ୟ ମଧ୍ୟରେ ଆବଦ୍ଧ ରହେ ନାହିଁ। ବରଂ ଅସହାୟ ଲୋକଙ୍କୁ ସାହାଯ୍ୟ କରିବା, ସଂସ୍ଥାର ଗୁରୁତ୍ୱପୂର୍ଣ୍ଣ ସମ୍ପତ୍ତିର ସୁରକ୍ଷା କରିବା କିମ୍ବା ପ୍ରତିକୂଳ ପରିସ୍ଥିତିରେ କ୍ଷେତ୍ରସ୍ତରରେ ନିର୍ଭୀକ ଭାବେ କାର୍ଯ୍ୟ କରିବା ମାଧ୍ୟମରେ ସେମାନଙ୍କର ପ୍ରତ୍ୟେକଟି ପଦକ୍ଷେପ ସମାଜ ପ୍ରତି ଥିବା ସାମୂହିକ ଦାୟିତ୍ୱବୋଧକୁ ସ୍ପଷ୍ଟ ଭାବେ ପ୍ରତିଫଳିତ କରିଛି।
ଏ ସମ୍ପର୍କରେ ନିଜର ପ୍ରତିକ୍ରିୟା ରଖି ଟିପିଏସ୍ଓଡିଏଲ୍ର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଶ୍ରୀ ଅମିତ କୁମାର ଗର୍ଗ କହିଛନ୍ତି, “ବାତ୍ୟା ‘ଅର୍ଣ୍ଣବ’ ସମୟରେ ଆମ ସଂସ୍ଥାର ହଜାର ହଜାର କର୍ମଚାରୀ ନିଜ ପେସାଦାର ଦାୟିତ୍ୱର ସୀମା ପାର୍ କରି ଯେଉଁଭଳି ନିଷ୍ଠା ଓ ତ୍ୟାଗର ସହ କାର୍ଯ୍ୟ କରିଛନ୍ତି, ସେଥିପାଇଁ ମୁଁ ଅତ୍ୟନ୍ତ ଗର୍ବିତ। ବିପର୍ଯ୍ୟୟରେ ପ୍ରଭାବିତ ପରିବାରଗୁଡ଼ିକୁ ସହାୟତାର ହାତ ବଢ଼ାଇଥିବା କର୍ମଚାରୀଙ୍କ ମାନବିକତା, ଗୁରୁତ୍ୱପୂର୍ଣ୍ଣ ସମ୍ପତ୍ତିକୁ ରକ୍ଷା କରିଥିବା କର୍ମଚାରୀଙ୍କ କର୍ତ୍ତବ୍ୟନିଷ୍ଠା ଏବଂ ଆମ କ୍ଷେତ୍ରୀୟ ଦଳଗୁଡ଼ିକର ଅହରହ ପ୍ରୟାସ ଆମ ସଂଗଠନର ମୂଳ ମୂଲ୍ୟବୋଧକୁ ପ୍ରତିପାଦିତ କରେ। ଏହି ଘଟଣା ଆମକୁ ପୁନର୍ବାର ମନେ ପକାଇ ଦେଇଛି ଯେ ଆମର ଦାୟିତ୍ୱ କେବଳ ବିଦ୍ୟୁତ ସରବରାହ ସ୍ୱାଭାବିକ କରିବାରେ ସୀମିତ ନୁହେଁ, ବରଂ ଯେକୌଣସି ବିପଦ ସମୟରେ ଆମ ରାଜ୍ୟର ଜନସାଧାରଣ ତଥା ସମାଜ ସହିତ ଦୃଢ଼ ଭାବରେ ଠିଆ ହେବା ମଧ୍ୟ ଆମର ପରମ ଧର୍ମ।”
ପରିଶେଷରେ, ନିଜ କର୍ମଚାରୀମାନଙ୍କର ଏହି ସାମୂହିକ ଏକତା, ନିଷ୍ଠା, ଆତ୍ମତ୍ୟାଗ ଓ ମାନବୀୟ ସେବା ମନୋଭାବକୁ ପାଥେୟ କରି ଟିପିଏସ୍ଓଡିଏଲ୍ ବାତ୍ୟା ପ୍ରଭାବିତ ଅଞ୍ଚଳରେ ଦ୍ରୁତ ଗତିରେ ସ୍ୱାଭାବିକ ସ୍ଥିତି ଫେରାଇ ଆଣିବା ସହିତ ସମଗ୍ର ଦକ୍ଷିଣ ଓଡ଼ିଶାର ଜନସାଧାରଣଙ୍କ ସେବାରେ ନିରବଚ୍ଛିନ୍ନ ଭାବେ ନିୟୋଜିତ ରହିଛି।
