ଗମ୍ଭାରୀମୁଣ୍ଡା: ଗମ୍ଭାରୀମୁଣ୍ଡା ଫାଣ୍ଡି ଅଞ୍ଚଳରେ ‘ଆମ ପୋଲିସ’ ସମିତିର ଏକ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହୋଇଯାଇଛି। ସ୍ଥାନୀୟ ଅଞ୍ଚଳକୁ ଅପରାଧମୁକ୍ତ ତଥା ଶାନ୍ତିଶୃଙ୍ଖଳା ବଜାୟ ରଖିବା ଉଦ୍ଦେଶ୍ୟରେ ଆୟୋଜିତ ଏହି କାର୍ଯ୍ୟକ୍ରମରେ ଗ୍ରାମର ପ୍ରାୟ ୩୦ ଜଣ ମୁରବୀ, ବୁଦ୍ଧିଜୀବୀ ଓ ବିଶିଷ୍ଟ ବ୍ୟକ୍ତି ଉପସ୍ଥିତ ଥିଲେ। ଏହି ଅବସରରେ ମୁଖ୍ୟତଃ ‘ନିଶାମୁକ୍ତ ଓଡ଼ିଶା ଅଭିଯାନ’ ଏବଂ ବୃଦ୍ଧି ପାଉଥିବା ସାଇବର ଅପରାଧ ନିବାରଣ ଉପରେ ବ୍ୟାପକ ଆଲୋଚନା ଓ ଜନସଚେତନତା ସୃଷ୍ଟି କରାଯାଇଥିଲା।
ବୈଠକରେ ଉପସ୍ଥିତ ପୋଲିସ ଅଧିକାରୀମାନେ ନିଶା ସେବନ ଓ ବେଆଇନ ନିଶା କାରବାରର ଭୟାବହ କୁପ୍ରଭାବ ସମ୍ପର୍କରେ ଲୋକଙ୍କୁ ଅବଗତ କରାଇଥିଲେ। ସମାଜରୁ ନିଶା ପ୍ରବୃତ୍ତିକୁ ସମ୍ପୂର୍ଣ୍ଣ ଦୂର କରିବା ପାଇଁ ସମସ୍ତେ ସହଯୋଗ କରିବା ସହ ନିଶାମୁକ୍ତ ପରିବେଶ ଗଠନରେ ନିଜ ନିଜର ଦାୟିତ୍ୱ ତୁଲାଇବାକୁ ପରାମର୍ଶ ଦିଆଯାଇଥିଲା। ଏଥିସହିତ ବର୍ତ୍ତମାନର ଡିଜିଟାଲ ଯୁଗରେ ଦିନକୁ ଦିନ ବୃଦ୍ଧି ପାଉଥିବା ଅନଲାଇନ୍ ଠକେଇ, ନକଲି ୱେବ୍ଲିଙ୍କ୍ ଏବଂ ଓଟିପି (OTP) ଜାଲିଆତି ବିଷୟରେ ଗ୍ରାମବାସୀଙ୍କୁ ସତର୍କ କରାଯାଇଥିଲା। କୌଣସି ଅଜଣା ନମ୍ବରରୁ ଆସୁଥିବା ସନ୍ଦିଗ୍ଧ କଲ୍ ବା ଲିଙ୍କ୍ ଠାରୁ କିପରି ସୁରକ୍ଷିତ ରହିବେ ଏବଂ ନିଜର ବ୍ୟାଙ୍କ ସମ୍ବନ୍ଧୀୟ ଗୋପନୀୟ ତଥ୍ୟ କାହା ସହିତ ନ ବାଣ୍ଟିବେ, ସେ ସମ୍ପର୍କରେ ବିସ୍ତୃତ ତଥ୍ୟ ପ୍ରଦାନ କରାଯାଇଥିଲା।
ଏହି ବୈଠକରେ ଗ୍ରାମବାସୀଙ୍କ ଉତ୍ସାହଜନକ ଉପସ୍ଥିତି ଓ ସହଭାଗିତାକୁ ଦେଖି ପୋଲିସ ପ୍ରଶାସନ ପକ୍ଷରୁ ସନ୍ତୋଷ ପ୍ରକାଶ କରାଯାଇଛି। ଜନସାଧାରଣ ଓ ପୋଲିସ ମଧ୍ୟରେ ଉତ୍ତମ ସମନ୍ୱୟ ରକ୍ଷା କରିବା ପାଇଁ ଆଗାମୀ ଦିନରେ ଏଭଳି ସଚେତନତାମୂଳକ କାର୍ଯ୍ୟକ୍ରମ ନିରନ୍ତର ଜାରି ରହିବ ବୋଲି ପୋଲିସ ପକ୍ଷରୁ ସୂଚନା ମିଳିଛି।
