ସୀମା ପୁନଃନିର୍ଦ୍ଧାରଣ ବିଲ୍ ପାସ୍ କରାଇବାକୁ ସରକାର କରିବେ ଉଦ୍ୟମ; ଲୋକସଭା ଆସନ ସଂଖ୍ୟା ୫୪୩ରୁ ୮୫୦କୁ ବୃଦ୍ଧି ପ୍ରସ୍ତାବ
ନୂଆଦିଲ୍ଲୀ: ସଂସଦର ଶୀତକାଳୀନ ଅଧିବେଶନ ଆସନ୍ତା ଡିସେମ୍ବର ପ୍ରଥମ ସପ୍ତାହରେ ଆରମ୍ଭ ହେବାର ସମ୍ଭାବନା ରହିଛି। ଏହି ଅଧିବେଶନରେ ମହିଳା ସଂରକ୍ଷଣ ଲାଗୁ କରିବା ସହ ଜଡ଼ିତ ସମ୍ବିଧାନ ସଂଶୋଧନ ବିଲ୍ ପାରିତ କରିବାକୁ କେନ୍ଦ୍ର ସରକାର ପ୍ରାଥମିକତା ଦେଉଛନ୍ତି। ଏଥିପାଇଁ ସରକାରୀ ସ୍ତରରେ ଅଧିବେଶନର ସମ୍ଭାବ୍ୟ ତାରିଖ ନେଇ ଆଲୋଚନା ଚାଲିଥିବା ଜଣାପଡ଼ିଛି।
ପ୍ରସ୍ତାବିତ ବିଲ୍ରେ ନିର୍ବାଚନମଣ୍ଡଳୀ ପୁନର୍ଗଠନ ବା ସୀମା ପୁନଃନିର୍ଦ୍ଧାରଣ ମାଧ୍ୟମରେ ଲୋକସଭା ଆସନ ସଂଖ୍ୟା ବର୍ତ୍ତମାନର ୫୪୩ରୁ ସର୍ବାଧିକ ୮୫୦କୁ ବୃଦ୍ଧି କରିବାର ବ୍ୟବସ୍ଥା ରହିଛି। ଏହାଦ୍ୱାରା ସଂସଦ ଓ ରାଜ୍ୟ ବିଧାନସଭାଗୁଡ଼ିକରେ ମହିଳାଙ୍କ ପାଇଁ ୩୩ ପ୍ରତିଶତ ଆସନ ସଂରକ୍ଷଣ ଲାଗୁ କରିବାର ପଥ ପରିଷ୍କାର ହେବ। ୨୦୨୯ ସାଧାରଣ ନିର୍ବାଚନ ପୂର୍ବରୁ ଏହାକୁ କାର୍ଯ୍ୟକାରୀ କରିବା ସରକାରଙ୍କ ଲକ୍ଷ୍ୟ।
ତେବେ ବିଲ୍ ପାରିତ କରିବା ପାଇଁ ଆବଶ୍ୟକ ସାଂସଦଙ୍କ ସମର୍ଥନ ଯୋଗାଡ଼ କରିବା ସରକାରଙ୍କ ପାଇଁ ବଡ଼ ଆହ୍ୱାନ ହେବ। ସମ୍ବିଧାନ ସଂଶୋଧନ ବିଲ୍ ପାରିତ କରିବାକୁ ଲୋକସଭାରେ ଦୁଇ-ତୃତୀୟାଂଶ ସମର୍ଥନ ଆବଶ୍ୟକ। ସମସ୍ତ ୫୪୦ ସଦସ୍ୟ ଭୋଟ୍ ଦେଲେ ଏଥିପାଇଁ ୩୬୧ଟି ଭୋଟ୍ ଦରକାର। ବର୍ତ୍ତମାନ ତିନୋଟି ଆସନ ଖାଲି ଥିବାରୁ ଲୋକସଭାରେ ସଦସ୍ୟଙ୍କ ସଂଖ୍ୟା ୫୪୦ ରହିଛି। ଶାସକ ଏନ୍ଡିଏ ପାଖରେ ୩୨୦ ସଦସ୍ୟ ଥିବାରୁ ବିଲ୍ ପାରିତ କରିବାକୁ ବିରୋଧୀ ଦଳଗୁଡ଼ିକର ସମର୍ଥନ ଆବଶ୍ୟକ ହେବ। ତେବେ ଜଣେ ବରିଷ୍ଠ ସରକାରୀ ଅଧିକାରୀ ଗତ ଗୁରୁବାର ଏହି ବିଲ୍ ୧୫ରୁ ୧୮ ଭୋଟ୍ ବ୍ୟବଧାନରେ ପାରିତ ହେବ ବୋଲି ଆଶା ପ୍ରକାଶ କରିଥିଲେ।
ଅନ୍ୟପକ୍ଷରେ ଭୋଟର ତାଲିକାର ସ୍ୱତନ୍ତ୍ର ସଘନ ସଂଶୋଧନ (ଏସ୍ଆଇଆର୍)କୁ ନେଇ ସରକାର ଓ ବିରୋଧୀଙ୍କ ମଧ୍ୟରେ ବିବାଦ ତୀବ୍ର ହୋଇଛି। ମୁଖ୍ୟ ନିର୍ବାଚନ କମିସନର ଜ୍ଞାନେଶ କୁମାରଙ୍କ ଇସ୍ତଫା ଦାବି କରି ବିରୋଧୀ ଦଳଗୁଡ଼ିକ ସଂସଦରେ ପ୍ରତିବାଦ କରିବାକୁ ପ୍ରସ୍ତୁତ ହେଉଛନ୍ତି। ଏହା ଅଧିବେଶନକୁ ହଟ୍ଟଗୋଳପୂର୍ଣ୍ଣ କରିପାରେ। ଗୃହରେ ଶୃଙ୍ଖଳିତ ଆଲୋଚନା ନ ହେଲେ ସମ୍ବିଧାନ ସଂଶୋଧନ ବିଲ୍ ଉପରେ ଭୋଟ୍ ହେବା ସମ୍ଭବ ନୁହେଁ ବୋଲି ଶାସକ ମେଣ୍ଟର ଜଣେ ସାଂସଦ କହିଛନ୍ତି।
ଏହି ସମୟରେ ଅଗଷ୍ଟ ୧୩ରେ ଅନିର୍ଦ୍ଦିଷ୍ଟ କାଳ ପାଇଁ ମୁଲତବୀ ହୋଇଥିବା ମୌସୁମୀ ଅଧିବେଶନକୁ ସରକାର ଏପର୍ଯ୍ୟନ୍ତ ଆନୁଷ୍ଠାନିକ ଭାବେ ଶେଷ କରିନାହାନ୍ତି। ନଭେମ୍ବର ୧୫ ସୁଦ୍ଧା ଏହା ୯୪ ଦିନ ଧରି ଜାରି ରହିଛି, ଯାହା ୨୦୦୮ର ୮୭ ଦିନର ରେକର୍ଡକୁ ଅତିକ୍ରମ କରିଛି। ପୁରୁଣା ଅଧିବେଶନକୁ ବଢ଼ାଇବାକୁ ହେଲେ ଦୁଇ ଦିନର ନୋଟିସ୍ ଯଥେଷ୍ଟ ହୋଇଥିବାବେଳେ ନୂଆ ଅଧିବେଶନ ଡାକିବାକୁ ଅତି କମ୍ରେ ୧୪ ଦିନର ନୋଟିସ୍ ଆବଶ୍ୟକ।
ସୀମା ପୁନଃନିର୍ଦ୍ଧାରଣକୁ ନେଇ ଦକ୍ଷିଣ ଭାରତୀୟ ରାଜ୍ୟଗୁଡ଼ିକର ଉଦ୍ବେଗ ଦୂର କରିବାକୁ ସରକାର ସବୁ ରାଜ୍ୟରେ ଲୋକସଭା ଆସନ ସଂଖ୍ୟା ୫୦ ପ୍ରତିଶତ ବଢ଼ାଇବାର ଏକ ସୂତ୍ର ଉପରେ ବିଚାର କରୁଛନ୍ତି। ଏଥିସହ ୧୯୭୧ ଜନଗଣନା ଆଧାରରେ ବିଭିନ୍ନ ରାଜ୍ୟ ମଧ୍ୟରେ ରହିଥିବା ଆସନ ଅନୁପାତ ଅପରିବର୍ତ୍ତିତ ରଖିବାର ପ୍ରସ୍ତାବ ମଧ୍ୟ ରହିଛି। ତେବେ ଏ ନେଇ ଚୂଡ଼ାନ୍ତ ନିଷ୍ପତ୍ତି ହୋଇନାହିଁ। ଉଲ୍ଲେଖଯୋଗ୍ୟ, ଗତ ଏପ୍ରିଲ ୧୭ରେ ସଂସଦର ସ୍ୱତନ୍ତ୍ର ବୈଠକରେ ଏହି ପ୍ରସ୍ତାବିତ ବିଲ୍ ଆବଶ୍ୟକ ସମର୍ଥନ ପାଇପାରି ନଥିଲା।
