ନୂଆଦିଲ୍ଲୀ: ବିଶ୍ୱରେ ଅନେକ ପ୍ରକାରର ଭୂତାଣୁ (ଭାଇରସ) ଓ ଜୀବାଣୁ (ବ୍ୟାକ୍ଟେରିଆ) ମଣିଷର ସ୍ୱାସ୍ଥ୍ୟ ପାଇଁ ବିପଦ ସୃଷ୍ଟି କରୁଛନ୍ତି। କିନ୍ତୁ କେତେକ ଏମିତି ଅଛନ୍ତି, ଯାହାର ନାମ ଶୁଣିଲେ ହିଁ ଲୋକେ ଭୟଭୀତ ହୋଇଯାଆନ୍ତି। ‘ବ୍ରେନ ଇଟିଂ ଆମୀବା’ ଏପରି ଏକ ଅତି ଦୁର୍ଲଭ ଓ ଜୀବନଘାତୀ ସଂକ୍ରମଣ। ନିକଟରେ କେରଳରେ ମାତ୍ର ୩ ମାସ ମଧ୍ୟରେ ୩ ଜଣଙ୍କର ଏହି ସଂକ୍ରମଣ ହୋଇଥିବା ସୂଚନା ମିଳିଛି, ଯେଉଁଥିରେ ଜଣେ ୩ ମାସର ଶିଶୁ ମଧ୍ୟ ଅଛନ୍ତି।
‘ବ୍ରେନ ଇଟିଂ ଆମୀବା’ କ’ଣ?
‘ବ୍ରେନ ଇଟିଂ ଆମୀବା’ର ବୈଜ୍ଞାନିକ ନାମ ହେଉଛି ନେଗ୍ଲେରିଆ ଫୋଲେରୀ। ଏହା ଏକ ଅଣୁଦର୍ଶୀ (ମାଇକ୍ରୋସ୍କୋପିକ) ଆମୀବା, ଯାହା ଗରମ ପାଣି, ପୋଖରୀ, ହ୍ରଦ, ନଦୀ ଓ ସ୍ୱିମିଂ ପୁଲରେ ମିଳିଥାଏ। ଏହି ଆମୀବା ମଣିଷର ଶରୀରରେ ନାକ ମାଧ୍ୟମରେ ପ୍ରବେଶ କରି ସିଧାସଳଖ ମସ୍ତିଷ୍କକୁ ପହଞ୍ଚିଥାଏ। ସେଠାରେ ଏହା ମସ୍ତିଷ୍କର କୋଷଗୁଡ଼ିକୁ ନଷ୍ଟ କରିବା ଆରମ୍ଭ କରେ, ଯାହା ଫଳରେ ରୋଗୀର ଜୀବନ ବିପଦରେ ପଡ଼ିଥାଏ।