ଦିଲ୍ଲୀ : ବନ୍ୟା ଘେରରେ ରାଜଧାନୀ ଦିଲ୍ଲୀ । ବୁଡ଼ିଛି ଘରଦ୍ୱାର ରାସ୍ତାଘାଟ । ଅନେକ ଅଞ୍ଚଳ ରହିଛି ଜଳମଗ୍ନ । ଲଗାଣ ବର୍ଷା ଯୋଗୁଁ ହାଥନିକୁଣ୍ଡ ବ୍ୟାରେଜରୁ ପାଣି ଛଡ଼ାଯିବା ପରେ ବଢୁଛି ଯମୁନା ନଦୀର ଜଳସ୍ତର । ଫଳରେ ଦିଲ୍ଲୀର ଅନେକ ତଳିଆ ଅଞ୍ଚଳ ଜଳମଗ୍ନ ହୋଇଛି ।
ଆଣ୍ଠୁଏ ଆଣ୍ଠୁଏ ପାଣିରେ ଯାତାୟତ କରୁଛନ୍ତି ଲୋକେ । ହଜାର ହଜାର ଲୋକ ଜଳବନ୍ଦୀରେ ଅଛନ୍ତି । ବନ୍ୟା ପ୍ଳାବିତ ଅଞ୍ଚଳରେ ଲୋକଙ୍କୁ ସୁରକ୍ଷିତ ଅଞ୍ଚଳକୁ ସ୍ଥାନାନ୍ତର କରାଯାଇଛି । ପ୍ରାୟ ୧୪ ହଜାରରୁ ଅଧିକ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି ।
ଦିଲ୍ଲୀର ମୟୂର ବିହାର, ଯମୁନା ବଜାର, ରିଙ୍ଗ ରୋଡ୍ , ସିଭିଲ୍ ଲାଇନ୍ସ, ସୋନିଆ ବିହାର, କାଶ୍ମୀର ଗେଟ୍, ବାୱାନା, ମୁକୁନ୍ଦପୁର, ସରିତା ବିହାର ଏବଂ ଜନକପୁରୀ ଅଞ୍ଚଳ ଜଳମଗ୍ନ ହୋଇଛି । ବହୁ ସ୍ଥାନରେ ପ୍ରଶାସନ ପକ୍ଷରୁ ଯାତାୟତ ବନ୍ଦ କରାଯାଇଛି ।
ଯମୁନାର ଜଳସ୍ତର ବୃଦ୍ଧି ପାଇବା ଯୋଗୁଁ ଦିଲ୍ଲୀର ଅନେକ ଅଞ୍ଚଳ ବୁଡ଼ି ଯାଇଛି । ତିବ୍ବତୀୟ କଲୋନୀରେ ଜୀବନଯାତ୍ରା ବନ୍ୟା ଦ୍ୱାରା ପ୍ରଭାବିତ ହୋଇଛି। ବନ୍ୟା ରେଷ୍ଟୁରାଣ୍ଟଠାରୁ ଆରମ୍ଭ କରି ଟାଟୁ ପାର୍ଲର, ସେଲୁନ୍, ହୋମ୍-ସ୍ପା ଏବଂ ପୋଷାକ ଦୋକାନ ପର୍ଯ୍ୟନ୍ତ ପ୍ରତ୍ୟେକ ପ୍ରକାରର ବ୍ୟବସାୟକୁ ପ୍ରଭାବିତ କରିଛି ।
ଜିଲ୍ଲା ପ୍ରଶାସନ କହିଛି ଯେ ବର୍ତ୍ତମାନ ପାଖାପାଖି ୪୩ ରୁ ଅଧିକ ଗାଁ ବନ୍ୟା ପାଣି ଦ୍ୱାରା ପ୍ରଭାବିତ ହୋଇଛି । ଅନେକ ତଳିଆ ଅଞ୍ଚଳରେ ପାଣି ଜମି ରହିଥିବାରୁ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି । ରିଲିଫ୍ ଏବଂ ଉଦ୍ଧାର କାର୍ଯ୍ୟ ପାଇଁ ପ୍ରଶାସନିକ ଦଳ ପ୍ରଭାବିତ ଅଞ୍ଚଳରେ ନିରନ୍ତର ମୁତୟନ ଅଛନ୍ତି ।
ବିଶେଷଜ୍ଞଙ୍କ ମତରେ ଆଗାମୀ ଦିନରେ ବର୍ଷାର ତୀବ୍ରତା ବୃଦ୍ଧି ପାଇଲେ ଜଳବନ୍ଦୀ ଏବଂ ବନ୍ୟା ପରିସ୍ଥିତି ଆହୁରି ଗମ୍ଭୀର ହୋଇପାରେ । ଏନସିଆରରେ ରାସ୍ତାରେ ଜାମ୍ ଏବଂ ପାଣି ଜମି ରହିବାର ସମସ୍ୟା ପୂର୍ବରୁ ରହିଛି, ଏପରି ପରିସ୍ଥିତିରେ ପ୍ରବଳ ବର୍ଷା ଯୋଗୁଁ ପରିସ୍ଥିତି ଆହୁରି ଖରାପ ହେବାର ସମ୍ଭାବନା ରହିଛି ।
ପ୍ରଶାସନ ଲୋକଙ୍କୁ ଅଯଥାରେ ତଳିଆ ଅଞ୍ଚଳକୁ ନଯିବା ଏବଂ ପାଣିପାଗ ବିଭାଗର ସତର୍କତା ପ୍ରତି ଧ୍ୟାନ ଦେବାକୁ ନିବେଦନ କରିଛି । ବଜ୍ରପାତ ସମୟରେ ଖୋଲା ସ୍ଥାନରେ ଠିଆ ହେବାଠାରୁ ଦୂରେଇ ରହିବାକୁ କୁହାଯାଇଛି ।