ଉମରକୋଟ / 🙁 ୧୮/୦୯/୨୦୨୫) ଭାରତ ବର୍ଷ ଏକ କୃଷିପ୍ରଧାନ ଦେଶ। ଆମ ଓଡ଼ିଶା ରାଜ୍ୟରେ ବସବାସ କରୁଥିବା ଅଧିକାଂଶ ଲୋକ କୃଷି ଉପରେ ନିର୍ଭରଶୀଳ। ସେଥିପାଇଁ କୃଷି ସମ୍ପର୍କିତ ପର୍ବଗୁଡ଼ିକ ଓଡ଼ିଆ ସଂସ୍କୃତିରେ ବିଶେଷ ମାନ୍ୟତା ରଖିଥାଏ। ପଶ୍ଚିମ ଓଡ଼ିଶାର ମୁଖ୍ୟ ଗଣପର୍ବ ନୂଆଖାଇ କେବଳ ସେଠିକି ସୀମିତ ନୁହେଁ, ବରଂ ସାରା ଓଡ଼ିଶାରେ ଏହାକୁ ଆନନ୍ଦ ଓ ଧୂମଧାମ ସହ ପାଳନ କରାଯାଏ। ଧାନକୁ ଓଡ଼ିଆ ଜୀବନର ମୁଖ୍ୟ ଖାଦ୍ୟ ବୋଲି ଗଣାହୁଏ। ନୂଆ ଧାନର ଅନ୍ନକୁ ପ୍ରଥମେ ଦୁର୍ଗାମାତା ଓ ଲକ୍ଷ୍ମୀଙ୍କ ଅବତାର ଭାବେ ପୂଜା କରିବାର ପରମ୍ପରା ପ୍ରାଚୀନକାଳରୁ ଚାଲିଆସୁଛି। ଏହା ପରେ ସେଇ ଅନ୍ନକୁ ପୂର୍ବପୁରୁଷ ଓ ଇଷ୍ଟଦେବୀ–ଦେବତାଙ୍କୁ ଅର୍ପଣ କରାଯାଏ। ଗ୍ରାମସମାଜ ନାଚ–ଗୀତ, ବଜା, ଆନନ୍ଦ-ଉତ୍ସବରେ ମଗ୍ନ ହୁଏ ଓ ପରେ ସେହି ଅନ୍ନକୁ ପ୍ରସାଦ ଭାବେ ସେବନ କରିଥାନ୍ତି।
ପ୍ରତ୍ୟେକ ପରିବାରରେ ନୂଆଖାଇ ପାଳନ ସମ୍ପୂର୍ଣ୍ଣ ହୋଇଯିବା ପରେ ଗ୍ରାମ, ପଞ୍ଚାୟତ ଏବଂ ବ୍ଲକ ସ୍ତରରେ ବିଭିନ୍ନ ଭେଟଘାଟ ଓ ଜୋହାରନୀ କାର୍ଯ୍ୟକ୍ରମ ଆୟୋଜିତ ହୁଏ। ଏହି ପରମ୍ପରାର ଅଂଶରୂପ, ଆଜି ନବରଙ୍ଗପୁର ଜିଲ୍ଲାର ସୀମାନ୍ତବର୍ତ୍ତୀ ରାଇଘର ବ୍ଲକର ପାରଚିପାରା ଗ୍ରାମ ପଞ୍ଚାୟତ ଅନ୍ତର୍ଗତ ଧୋଦ୍ରା ଗ୍ରାମରେ ମାଝୀ ପରିବାର ପକ୍ଷରୁ ନୂଆଖାଇ ଭେଟଘାଟ କାର୍ଯ୍ୟକ୍ରମ ଆୟୋଜିତ ହୋଇଥିଲା। ସ୍ଥାନୀୟ ଗ୍ରାମବାସୀଙ୍କ ଉତ୍ସାହଭରା ଯୋଗଦାନ, ଅତିଥିଙ୍କୁ ଜୋହାର ଦେବାର ପରମ୍ପରା, ଲୋକଗୀତ, ନାଚ ଓ ସାଧୁଭାଇପନାର ପରିବେଶରେ କାର୍ଯ୍ୟକ୍ରମଟି ରଙ୍ଗେରଙ୍ଗ ପରିଣତ ହୋଇଥିଲା।
ସାମୁଦାୟିକ ସମ୍ମିଳନୀ, ପରସ୍ପର ସମ୍ପର୍କର ସୁଦୃଢ଼ତା ଓ ସାଧୁଭାଇପନାର ପ୍ରତୀକ ଭାବରେ ଏହି ନୂଆଖାଇ ଭେଟଘାଟ କେବଳ ଗ୍ରାମକୁ ଏକତାରେ ବାନ୍ଧିନଥାଏ, ବରଂ ସମସ୍ତଙ୍କୁ କୃଷି–ସଂସ୍କୃତିର ମୂଳ ସହିତ ଅଧିକ ସ୍ନେହଭରା ସମ୍ପର୍କରେ ବାନ୍ଧି ଦେଇଥାଏ।
