ବାରାଣସୀ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶନିବାର ଉତ୍ତର ପ୍ରଦେଶସ୍ଥିତ ନିଜର ନିର୍ବାଚନମଣ୍ଡଳୀ ବାରାଣସୀ ଗସ୍ତରେ ଯାଇଥିବାବେଳେ ୪ଟି ବନ୍ଦେ ଭାରତ ଏକ୍ସପ୍ରେସ ଟ୍ରେନ୍ ଚଳାଚଳର ଶୁଭାରମ୍ଭ କରିଛନ୍ତି। ଏହି ଚାରିଟି ବନ୍ଦେ ଭାରତ ଟ୍ରେନ ବାରାଣସୀ-ଖଜୁରାହୋ, ଲକ୍ଷ୍ନୌ-ସାହାରନପୁର, ଫିରୋଜପୁର-ଦିଲ୍ଲୀ ଏବଂ ଏର୍ଣ୍ଣାକୁଲମ-ବେଙ୍ଗାଲୁରୁ ରୁଟ୍ରେ ଚଳାଚଳ କରିବ। ଏହାଦ୍ବାରା ସଂପୃକ୍ତ େଷ୍ଟସନ ମଧ୍ୟରେ ଯାତ୍ରା ଅବଧି ହ୍ରାସ ପାଇବା ସହ ପର୍ଯ୍ୟଟନର ବିକାଶ ଘଟିବ ବୋଲି କୁହାଯାଇଛି। ବାରାଣସୀ-ଖଜୁରାହୋ ବନ୍ଦେ ଭାରତ ଟ୍ରେନ ଚଳାଚଳ କରିବା ଫଳରେ ଯାତ୍ରା ଅବଧି ୨ ଘଣ୍ଟା ୪୦ ମିନିଟ ହ୍ରାସ ପାଇବ। ଏହି ଟ୍ରେନ ବାରାଣସୀ, ପ୍ରୟାଗରାଜ, ଚିତ୍ରକୂଟ ଓ ଖଜୁରାହୋ ଭଳି ଧାର୍ମିକ ଓ ପର୍ଯ୍ୟଟନ ସ୍ଥଳୀକୁ ସଂଯୋଗ କରିବ। ମଧ୍ୟପ୍ରଦେଶରେ ଅବସ୍ଥିତ ଖଜୁରାହୋ ମନ୍ଦିରକୁ ୟୁନେସ୍କୋ ପକ୍ଷରୁ ବିଶ୍ବ ଐତିହ୍ୟ ମାନ୍ୟତା ମିଳିସାରିଛି।
ଲକ୍ଷ୍ନୌରୁ ଯାତ୍ରାରମ୍ଭ କରୁଥିବା ବନ୍ଦେ ଭାରତ ଟ୍ରେନ ୭ ଘଣ୍ଟା ୪୫ ମିନିଟ ମଧ୍ୟରେ ସାହାରନପୁରରେ ପହଞ୍ଚିବ। ଏହାଦ୍ବାରା ଯାତ୍ରା ସମୟ ୧ ଘଣ୍ଟା ହ୍ରାସ ପାଇବ। ଏହି ଟ୍ରେନ ଯୋଗୁଁ ସୀତାପୁର, ଶାହାଜାହାନପୁର, ବରେଲୀ, ମୋରାଦାବାଦ, ବିଜ୍ନୋର ଓ ସାହାରନପୁର ଯାଉଥିବା ଯାତ୍ରୀ ଉପକୃତ ହେବେ। ହରିଦ୍ବାର ଯିବାକୁ ଇଚ୍ଛୁକ ଯାତ୍ରୀ ଏହି ଟ୍ରେନ ଯୋଗେ ସୁବିଧା ମଧ୍ୟ ପାଇବେ ବୋଲି କୁହାଯାଇଛି। ଫିରୋଜପୁର-ଦିଲ୍ଲୀ ବନ୍ଦେ ଭାରତ ଟ୍ରେନ ୬ ଘଣ୍ଟା ୪୦ ମିନିଟ ମଧ୍ୟରେ ଯାତ୍ରା ଶେଷ କରିବ।
ଏହି ଟ୍ରେନ ଚଳାଚଳ କରିବା ଦ୍ବାରା ପଞ୍ଜାବର ଫିରୋଜପୁର, ଭଟିଣ୍ଡା ଓ ପଟିଆଲା ସହରଗୁଡିକ ରାଜଧାନୀ ଦିଲ୍ଲୀ ସହ ସିଧାସଳଖ ସଂଯୋଗ ହୋଇପାରିବ। ଏହାଦ୍ବାରା ବ୍ୟବସାୟ, ପର୍ଯ୍ୟଟକ ଓ ନିଯୁକ୍ତି ସୁଯୋଗ ବୃଦ୍ଧି ପାଇବା ସହ ଜାତୀୟ ଓ ଆଞ୍ଚଳିକ ମାର୍କେଟ ମଧ୍ୟରେ ଉପଯୁକ୍ତ ସମନ୍ବୟ ରକ୍ଷା କରାଯାଇ ପାରିବ। ଅପରପକ୍ଷରେ ଦକ୍ଷିଣ ଭାରତ ପାଇଁ ଉଦ୍ଦିଷ୍ଟ ଏର୍ଣ୍ଣାକୁଲମ-ବେଙ୍ଗାଲୁରୁ ବନ୍ଦେ ଭାରତ ଟ୍ରେନ ୮ ଘଣ୍ଟା ୪୦ ମିନିଟ ମଧ୍ୟରେ ଯାତ୍ରା ଶେଷ କରୁଥିବାବେଳେ ଯାତ୍ରୀଙ୍କୁ ୨ ଘଣ୍ଟାର ମହଲତ ମିଳିବ। ଏହି ଟ୍ରେନ ଯୋଗୁଁ କେରଳ, ତାମିଲନାଡୁ ଓ କର୍ଣ୍ଣାଟକର ପ୍ରମୁଖ ଆଇଟି ହବ୍ଗୁଡିକ ଲାଭବାନ ହେବେ। ଏହା ବ୍ୟତୀତ ଏହି ତିନି ରାଜ୍ୟରେ କାର୍ଯ୍ୟରତ ଆଇଟି କର୍ମଚାରୀ, ଛାତ୍ରଛାତ୍ରୀ ଓ ବ୍ୟବସାୟୀ ଉପକୃତ ହେବେ ବୋଲି ରେଳ ମନ୍ତ୍ରଣାଳୟ ପକ୍ଷରୁ ଆଶା କରାଯାଉଛି।