ଛତ୍ରପୁର : ଜ଼ିଲ୍ଲାପାଳଙ୍କ ନିର୍ଦ୍ଦେଶରେ ଜିଲ୍ଲା ଶିକ୍ଷା ଅଧିକାରୀ, ଗଞ୍ଜାମ, ବରିଷ୍ଠ ଅଧିକାରୀ ଓ ଶିକ୍ଷକ-ଶିକ୍ଷୟିତ୍ରୀମାନେ ପ୍ରଥମ ପର୍ଯ୍ୟାୟରେ ଆଜି ବିଭିନ୍ନ ଶିଶୁବାଟିକାରେ ଶିଶୁମାନଙ୍କୁ ପ୍ରବେଶ କରାଇବା ପାଇଁ ଆଗ୍ରହୀ ଅଭିଭାବକମାନଙ୍କୁ ମାନ୍ୟବର ମୁଖ୍ୟମନ୍ତ୍ରୀଙ୍କ ସ୍ୱାକ୍ଷରିତ ନିମନ୍ତ୍ରଣ ପତ୍ର ସେମାନଙ୍କ ଘରକୁ ଘର ଯାଇ ବଣ୍ଟନ କରିଛନ୍ତି । ବେଗୁନିଆପଡା ବ୍ଲକର ଖଣ୍ଡିଆନଈ ଓ ଅନ୍ୟାନ୍ୟ ଗ୍ରାମକୁ ଅଧିକାରୀ ଓ ଶିକ୍ଷକ-ଶିକ୍ଷୟିତ୍ରୀମାନେ ଯାଇ ଏପ୍ରିଲ ୨ ତାରିଖରେ ପାଳିତ ହେବାକୁଥିବା ପ୍ରବେଶ ଓ ଖଡିଛୁଆଁ ଉତ୍ସବ ଅବସରରେ ନିଜ ଶିଶୁମାନଙ୍କୁ ଶିଶୁବାଟିକାରେ ଭର୍ତ୍ତି କରାଇବା ପାଇଁ ନିମନ୍ତ୍ରଣ ପତ୍ର ଦେବା ପୂର୍ବକ ଅଭିଭାବକମାନଙ୍କୁ ଶିକ୍ଷାର ମହତ୍ୱ ଓ ଗୁରୁତ୍ୱ ସମ୍ପର୍କରେ ବୁଝାଇଛନ୍ତି ।
ରାଜ୍ୟ ସରକାରଙ୍କ ଏହି ଅଭିନବ ପ୍ରୟାସ ମାଧ୍ୟମରେ ଶିଶୁମାନଙ୍କ ଶିକ୍ଷାର ପ୍ରାରମ୍ଭିକ ସ୍ତରକୁ ସୁଦୃଢ କରିବା ସହ ଶିଶୁବାଟିକାରେ ଅଧିକରୁ ଅଧିକ ପ୍ରବେଶ କରାଇବା ପାଇଁ ଗଞ୍ଜାମ ଜିଲ୍ଲା ପ୍ରଶାସନ ଲକ୍ଷ୍ୟ ରଖିଛି । ଏଥିପାଇଁ ବ୍ୟାପକ ଜନସଚେତନତା କାର୍ଯ୍ୟ ହାତକୁ ନିଆଯାଇଛି । ଜ଼ିଲ୍ଲା ଶିକ୍ଷାଧିକାରୀ ଅଜୟ କୁମାର ପାତ୍ର ଙ୍କ ସହ ଜ଼ିଲ୍ଲା ଏସସି ଏସଟି ସଂଯୋଜକ ଡ଼ ସରୋଜ ମୋହନ ପାଳ, ବେଗୁନିଆପଡା ଗୋଷ୍ଠୀ ଶିକ୍ଷାଧିକାରୀ ରୁଦ୍ର ନାରାୟଣ ସାହୁ, ସ୍ଥାନୀୟ ଅଂଚଳର ଶିକ୍ଷକ ଶିକ୍ଷୟତ୍ରୀ ମାନେ ଏହି ଅବସରରେ ଉପସ୍ଥିତ ଥିଲେ l