ସାଇବର ଅପରାଧର ମୁକାବିଲା ପାଇଁ ପୋଲିସ ଅଧିକାରୀଙ୍କୁ ତାଲିମ: ରାଉରକେଲା BPUT ରେ ଦୁଇ ଦିନିଆ କର୍ମଶାଳା ସଫଳତାର ସହ ସମ୍ପନ୍ନ

ବିରମିତ୍ରପୁର (ନିସର୍ତ୍ତ ନ୍ୟୁଜ): ବର୍ତ୍ତମାନର ଡିଜିଟାଲ୍ ଯୁଗରେ ଦିନକୁ ଦିନ ବଢ଼ିଚାଲିଥିବା ସାଇବର ଅପରାଧର ପ୍ରଭାବଶାଳୀ ମୁକାବିଲା ପାଇଁ ରାଉରକେଲା ପୋଲିସ ପକ୍ଷରୁ ଏକ ବିଶେଷ ପଦକ୍ଷେପ ଗ୍ରହଣ କରାଯାଇଛି। ତଦନ୍ତକାରୀ ଅଧିକାରୀଙ୍କ ବୃତ୍ତିଗତ ଦକ୍ଷତା ବୃଦ୍ଧି କରିବା ଉଦ୍ଦେଶ୍ୟରେ ରାଉରକେଲାସ୍ଥିତ ବିଜୁ ପଟ୍ଟନାୟକ ବୈଷୟିକ ବିଶ୍ୱବିଦ୍ୟାଳୟ (BPUT) ପରିସରରେ ମାର୍ଚ୍ଚ ୨୯ ଏବଂ ୩୦ ରିଖରେ ଏକ ଦୁଇ ଦିନିଆ ସାଇବର ଅପରାଧ ତଦନ୍ତ ତାଲିମ କାର୍ଯ୍ୟକ୍ରମ ସଫଳତାର ସହ ଅନୁଷ୍ଠିତ ହୋଇଯାଇଛି।

ବିଶେଷଜ୍ଞଙ୍କ ଦ୍ୱାରା ପ୍ରଶିକ୍ଷଣ:
ଏହି କାର୍ଯ୍ୟକ୍ରମରେ ଦେଶର ପ୍ରତିଷ୍ଠିତ ସାଇବର ବିଶେଷଜ୍ଞ ଅଂଶୁ ସିଂହ ଏବଂ କୁମାର ବିଭୂତି ଯୋଗଦେଇ ପୋଲିସ ଅଧିକାରୀଙ୍କୁ ପ୍ରଶିକ୍ଷଣ ପ୍ରଦାନ କରିଥିଲେ। ଏହି ଅଧିବେଶନରେ ବିଶେଷ କରି ନୂଆ ନୂଆ ଶୈଳୀରେ ଘଟୁଥିବା ସାଇବର ଅପରାଧ, ଅତ୍ୟାଧୁନିକ ତଦନ୍ତ କୌଶଳ ଏବଂ କୋର୍ଟରେ ପ୍ରମାଣ ଦାଖଲ ପାଇଁ ଡିଜିଟାଲ୍ ପ୍ରମାଣର ବୈଜ୍ଞାନିକ ପରିଚାଳନା ଉପରେ ଗୁରୁତ୍ୱାରୋପ କରାଯାଇଥିଲା।

ଦକ୍ଷତା ବୃଦ୍ଧି ଉପରେ ଗୁରୁତ୍ୱ:
ସାଇବର ଅପରାଧୀମାନେ ଅତି ଚତୁରତାର ସହ ଅପରାଧ ଘଟାଉଥିବା ବେଳେ, ସେମାନଙ୍କୁ ଧରିବା ପାଇଁ ପୋଲିସ କର୍ମଚାରୀଙ୍କୁ ଅଧିକ ସକ୍ଷମ ଓ ଜ୍ଞାନକୌଶଳ ସମ୍ପନ୍ନ କରିବା ଏହି ପ୍ରୟାସର ଏକ ମୁଖ୍ୟ ଅଂଶ। ପୋଲିସ ଅଧିକାରୀମାନେ ଯେପରି ଜଟିଳ ଡିଜିଟାଲ୍ ମାମଲାର ସଠିକ୍ ଓ ଦ୍ରୁତ ତଦନ୍ତ କରିପାରିବେ, ସେଥିପାଇଁ ଏହି କର୍ମଶାଳା ବେଶ ସହାୟକ ହେବ ବୋଲି ଆଶା କରାଯାଉଛି।

ରାଉରକେଲା ପୋଲିସ ପକ୍ଷରୁ ନିଆଯାଇଥିବା ଏହି ଅଭିନବ ପଦକ୍ଷେପକୁ ବିଭିନ୍ନ ମହଲରେ ପ୍ରଶଂସା କରାଯାଇଛି।