ରାଜ୍ୟ ସ୍ତରୀୟ ଟାଏକୋଣ୍ଡୋ ପ୍ରତିଯୋଗିତାରେ ଭିକ୍ଟରୀ ଏକାଡେମୀର ବାଜିମାତ: ୧୩୫ଟି ପଦକ ସହ ହାସଲ କଲେ ‘ବିଜୟୀ କପ୍’

ବ୍ରହ୍ମପୁର/କଟକ : କଟକର ଜବାହାର ଲାଲ ନେହେରୁ ଇଣ୍ଡୋର ଷ୍ଟାଡିୟମଠାରେ ଅନୁଷ୍ଠିତ ପଞ୍ଚମ ଓଡ଼ିଶା ରାଜ୍ୟ ସ୍ତରୀୟ ଟାଏକୋଣ୍ଡୋ ପ୍ରତିଯୋଗିତାରେ ‘ଭିକ୍ଟରୀ ଏକାଡେମୀ ମାର୍ଶଲ ଆର୍ଟ୍ସ’ ଏକ ବଡ଼ ସଫଳତା ହାସଲ କରିଛି। ତିନି ଦିନ ଧରି ଚାଲିଥିବା ଏହି ପ୍ରତିଯୋଗିତାରେ ଏକାଡେମୀର ଖେଳାଳିମାନେ ନିଜର ଶ୍ରେଷ୍ଠ ପ୍ରଦର୍ଶନ କରି ‘ବିଜୟୀ କପ୍’ (Winner’s Cup) ଜିତିବାରେ ସକ୍ଷମ ହୋଇଛନ୍ତି।

ଏହି ସଫଳତା ଉପଲକ୍ଷେ ଆଜି ରବିବାର ଦିନ ଆନ୍ଧ୍ରା ମହିଳା ସମାଜ ପରିସରରେ ଭିକ୍ଟରୀ ଏକାଡେମୀ ପକ୍ଷରୁ ଏକ ସାମ୍ବାଦିକ ସମ୍ମିଳନୀ ଓ ସମ୍ବର୍ଦ୍ଧନା ସଭା ଅନୁଷ୍ଠିତ ହୋଇଯାଇଛି। କୋଚ୍ ବି. ସତୀଶ କୁମାର ରାଓ ଏବଂ କୈବଲ୍ୟ ବଡମୁଣ୍ଡିଙ୍କ ଅଧ୍ୟକ୍ଷତାରେ ଆୟୋଜିତ ଏହି କାର୍ଯ୍ୟକ୍ରମରେ ବିଜୟୀ ଖେଳାଳିମାନଙ୍କୁ ସମ୍ବର୍ଦ୍ଧିତ କରାଯାଇଥିଲା।

ସୂଚନାଯୋଗ୍ୟ ଯେ, ଏହି ରାଜ୍ୟ ସ୍ତରୀୟ ପ୍ରତିଯୋଗିତାରେ ଏକାଡେମୀ ତରଫରୁ ମୋଟ ୭୩ ଜଣ ଖେଳାଳି ଅଂଶଗ୍ରହଣ କରିଥିଲେ। ସେମାନେ ଚମତ୍କାର ପ୍ରଦର୍ଶନ କରି ସମୁଦାୟ ୧୩୫ଟି ପଦକ ଜିତିଛନ୍ତି, ଯେଉଁଥିରେ ୫୧ଟି ସ୍ୱର୍ଣ୍ଣ (Gold), ୩୯ଟି ରୌପ୍ୟ (Silver) ଏବଂ ୫୧ଟି ବ୍ରୋଞ୍ଜ (Bronze) ପଦକ ସାମିଲ ରହିଛି।

ଏହି ସମ୍ବର୍ଦ୍ଧନା କାର୍ଯ୍ୟକ୍ରମରେ ଗଞ୍ଜାମ ଟାଏକୋଣ୍ଡୋ ସଭାପତି ସୁଜିତ୍ କୁମାର ମିଶ୍ର, ଅନ୍ତର୍ଜାତୀୟ ଖ୍ୟାତିସମ୍ପନ୍ନ କୋଚ୍ ସରୋଜ ଚନ୍ଦ୍ର ବଡମୁଣ୍ଡି ଏବଂ କିରନ୍ କୁମାର ନାୟକ ପ୍ରମୁଖ ଅତିଥି ଭାବେ ଉପସ୍ଥିତ ରହି ଖେଳାଳିମାନଙ୍କୁ ଉତ୍ସାହିତ କରିଥିଲେ। ରାଜ୍ୟ ସ୍ତରରେ ଏଭଳି ସଫଳତା ପାଇବା ପରେ ଆଗାମୀ ଦିନରେ ଏହି ଖେଳାଳିମାନେ କିପରି ଜାତୀୟ ସ୍ତରରେ ଓଡ଼ିଶା ପାଇଁ ଗୌରବ ଆଣିପାରିବେ, ସେଥିପାଇଁ ସମସ୍ତ କୋଚ୍ ଓ ଅତିଥିମାନେ ଶୁଭକାମନା ଜଣାଇବା ସହ ସେମାନଙ୍କ ଉଜ୍ଜ୍ୱଳ ଭବିଷ୍ୟତ କାମନା କରିଛନ୍ତି।