କୋଲ୍ଡ ଡ୍ରିଙ୍କସ୍ ଟିଣରେ ତିଆରି ହେଲା ଅବିକଳ ନନ୍ଦିଘୋଷ ରଥ: ବାଲୁକା ଶିଳ୍ପୀ ସତ୍ୟ ନାରାୟଣ ମହାରଣାଙ୍କ ଆଉ ଏକ ବିରଳ କଳାକୃତି
ଭୁବନେଶ୍ବର : ବିଶ୍ୱପ୍ରସିଦ୍ଧ ରଥଯାତ୍ରା ଉପଲକ୍ଷେ ପ୍ରଭୁ ଜଗନ୍ନାଥଙ୍କ ଭକ୍ତିରେ ଭିଜିଛି ସାରା ଓଡ଼ିଶା। ଏହି ଅବସରରେ ନିଜ ନିଆରା କଳାକୃତି ପାଇଁ ବେଶ୍ ଜଣାଶୁଣା ଥିବା ଖ୍ୟାତନାମା ବାଲୁକା ଶିଳ୍ପୀ ସତ୍ୟ ନାରାୟଣ ମହାରଣା ଏଥର ମଧ୍ୟ ଏକ ଚମତ୍କାର ନିଦର୍ଶନ ସୃଷ୍ଟି କରିଛନ୍ତି। ଚଳିତ ବର୍ଷ ସେ ଏକ ବ୍ୟବହୃତ କୋଲ୍ଡ ଡ୍ରିଙ୍କସ୍ (ଥଣ୍ଡା ପାନୀୟ) ଟିଣ ବୋତଲକୁ ବ୍ୟବହାର କରି ଅବିକଳ ‘ନନ୍ଦିଘୋଷ ରଥ’ ପ୍ରସ୍ତୁତ କରିଛନ୍ତି।
ରଥର ଆକର୍ଷଣ ଓ ବିଶେଷତ୍ୱ ମାତ୍ର ସାଢ଼େ ୫ ଇଞ୍ଚ ଉଚ୍ଚତା ଏବଂ ୪ ଇଞ୍ଚ ଓସାର ବିଶିଷ୍ଟ ଏହି କ୍ଷୁଦ୍ର ରଥକୁ ସମ୍ପୂର୍ଣ୍ଣ କରିବା ପାଇଁ ଶିଳ୍ପୀଙ୍କୁ ୩ ଦିନ ଅର୍ଥାତ୍ ପ୍ରାୟ ୨୫ ଘଣ୍ଟା ସମୟ ଲାଗିଥିଲା। ଆକାରରେ ଛୋଟ ହେଲେ ମଧ୍ୟ ଏହି ରଥରେ ବଡ଼ ରଥର ସମସ୍ତ ଟିକିନିଖି ଅଂଶ ଅତି ନିଖୁଣ ଭାବରେ ଦେଖିବାକୁ ମିଳିଛି।
- ରଥରେ ରହିଛି ୧୬ଟି ଚକ ଏବଂ ୪ଟି ଘୋଡ଼ା।
- ସୌନ୍ଦର୍ଯ୍ୟ ବୃଦ୍ଧି ପାଇଁ ଖଞ୍ଜା ଯାଇଛି ୨ଟି ଓଲଟ ଶୁଆ।
- ଏହା ସହିତ ସାରଥୀ, ପତିତପାବନ ବାନା, ଦଧିନଉତି ଏବଂ ରଥ ବାଡ଼ ଆଦି ସବୁକିଛି ଏହି କ୍ଷୁଦ୍ର ରଥରେ ସ୍ଥାନ ପାଇଛି।
୨୦୨୦ରୁ ଜାରି ରହିଛି ନିଆରା ପ୍ରୟାସ ସୂଚନାଯୋଗ୍ୟ ଯେ, ଶିଳ୍ପୀ ସତ୍ୟ ନାରାୟଣ ପୂର୍ବରୁ ମଧ୍ୟ ବିଶ୍ୱର ସର୍ବକନିଷ୍ଠ (ସବୁଠାରୁ ଛୋଟ) ରଥ ନିର୍ମାଣ କରି ଅନେକ ବିଶ୍ୱ ରେକର୍ଡ ନିଜ ନାମରେ କରିସାରିଛନ୍ତି। ୨୦୨୦ ମସିହାଠାରୁ ସେ ପ୍ରତିବର୍ଷ କାଳିଆ ଠାକୁରଙ୍କ ପାଇଁ ଭିନ୍ନ ଭିନ୍ନ ସାମଗ୍ରୀରେ ରଥ ତିଆରି କରିଆସୁଛନ୍ତି। ପୂର୍ବରୁ ସେ ବୋତାମ, ବାଉଁଶ, ବେତ, ଚକ୍ଖଡ଼ି, ଦିଆସିଲି କାଠି ଆଦି ବ୍ୟବହାର କରି ଅତ୍ୟନ୍ତ ମନମୋହକ ରଥମାନ ନିର୍ମାଣ କରି ପ୍ରଶଂସା ସାଉଁଟିଛନ୍ତି।
ନିଜର ଏହି ନୂତନ ତଥା ବିରଳ କଳାକୃତି ସମ୍ପର୍କରେ ପ୍ରତିକ୍ରିୟା ରଖି ଶିଳ୍ପୀ ସତ୍ୟ ନାରାୟଣ ବିନମ୍ରତାର ସହ କହିଛନ୍ତି ଯେ, “ଏସବୁ କେବଳ ସେହି ଲୀଳାମୟ ପ୍ରଭୁ ଶ୍ରୀ ଜଗନ୍ନାଥଙ୍କ ଇଚ୍ଛା ଓ ଆଶୀର୍ବାଦରୁ ହିଁ ସମ୍ଭବ ହୋଇପାରିଛି।” ତାଙ୍କର ଏହି ନିଆରା ଭକ୍ତିଭାବ ଓ କଳା ନୈପୁଣ୍ୟକୁ ଏବେ ବିଭିନ୍ନ ମହଲରେ ବେଶ୍ ପ୍ରଶଂସା କରାଯାଉଛି।
