ରୋଟାରୀ କ୍ଲବ ଅଫ ଭୁବନେଶ୍ୱର ପ୍ରିମିୟମର ଭବ୍ୟ ଦାୟିତ୍ୱ ଗ୍ରହଣ ସମାରୋହ: ନବନିର୍ବାଚିତ ସଭାପତି ଭାବେ ରୋଟେରିଆନ୍ ମଧୁସ୍ମିତା ତ୍ରିପାଠୀଙ୍କ ପଦଭାର ଗ୍ରହଣ

ଭୁବନେଶ୍ୱର : ରୋଟାରୀ ଜିଲ୍ଲା ୩୨୬୨ ଅନ୍ତର୍ଗତ ‘ରୋଟାରୀ କ୍ଲବ ଅଫ ଭୁବନେଶ୍ୱର ପ୍ରିମିୟମ’ର ୨୦୨୬-୨୭ ବର୍ଷ ପାଇଁ ନୂତନ କାର୍ଯ୍ୟକାରିଣୀଙ୍କ ଦାୟିତ୍ୱ ଗ୍ରହଣ ସମାରୋହ ଗତକାଲି ସନ୍ଧ୍ୟାରେ ଭୁବନେଶ୍ୱରସ୍ଥିତ ହୋଟେଲ ପିପଲ ପଦ୍ମଜାରେ ଅତ୍ୟନ୍ତ ଭବ୍ୟ ଆଡମ୍ବର ସହକାରେ ଅନୁଷ୍ଠିତ ହୋଇଯାଇଛି। ଏହି ଗୁରୁତ୍ୱପୂର୍ଣ୍ଣ ସମାରୋହରେ ନବନିର୍ବାଚିତ ସଭାପତି ଭାବେ ରୋଟେରିଆନ୍ ମଧୁସ୍ମିତା ତ୍ରିପାଠୀ ଏବଂ ସମ୍ପାଦକ ଭାବେ ରୋଟେରିଆନ୍ ରୂପମ ମହାପାତ୍ର ଆନୁଷ୍ଠାନିକ ଭାବେ ଶପଥ ଗ୍ରହଣ କରିଛନ୍ତି। ପୂର୍ବତନ ଜିଲ୍ଲା ପରିଚାଳକ (ଗଭର୍ଣ୍ଣର) ରୋଟେରିଆନ୍ ଅଶ୍ୱିନୀ କର ନୂତନ ପଦାଧିକାରୀମାନଙ୍କୁ ଶପଥ ପାଠ କରାଇବା ସହ ସଂସ୍ଥାର ସନନ୍ଦ (ଚାର୍ଟର) ଓ ନେତୃତ୍ୱ ମୁଦ୍ରା (ଗାଭେଲ୍) ପ୍ରଦାନ କରିଥିଲେ।
ଏହି ସମାରୋହରେ ରୋଟାରୀ ଜିଲ୍ଲା ୩୨୬୨ର ଜିଲ୍ଲା ପରିଚାଳକ ରୋଟେରିଆନ୍ ଅନିଲ କୁମାର ସାମଲ, ଭାରତୀୟ ପ୍ରଶାସନିକ ସେବା (ଅବସରପ୍ରାପ୍ତ) ମୁଖ୍ୟ ଅତିଥି ଭାବେ ଯୋଗଦେଇ କ୍ଲବର ସାମାଜିକ ନିଷ୍ଠାକୁ ପ୍ରଶଂସା କରିଥିଲେ। ସମ୍ମାନିତ ଅତିଥି ଭାବେ ଭାରତୀୟ ତୈଳ ନିଗମ (ଆଇଓସିଏଲ୍)ର ରାଜ୍ୟ ମୁଖ୍ୟ ଶ୍ରୀ କମଲ ଶିଲ୍ ଏବଂ ପୂର୍ବତନ ବିଧାୟକ ଶ୍ରୀ ପ୍ରିୟଦର୍ଶୀ ମିଶ୍ର ଉପସ୍ଥିତ ଥିଲେ। ଶ୍ରୀ ଶିଲ୍ ବ୍ୟବସାୟିକ ପ୍ରତିଷ୍ଠାନ ଓ ସମାଜସେବା ସଂସ୍ଥାମାନଙ୍କ ମଧ୍ୟରେ ସହଭାଗିତାର ଗୁରୁତ୍ୱ ଉପରେ ଆଲୋକପାତ କରିଥିବା ବେଳେ ଶ୍ରୀ ମିଶ୍ର ଜାତି ଗଠନ ଓ ସମାଜସେବା କ୍ଷେତ୍ରରେ ରୋଟାରୀର ନିରନ୍ତର ଅବଦାନକୁ ଉଚ୍ଚ ପ୍ରଶଂସା କରିଥିଲେ

ଦାୟିତ୍ୱ ଗ୍ରହଣ କରିବା ପରେ ନବନିର୍ବାଚିତ ସଭାପତି ରୋଟେରିଆନ୍ ମଧୁସ୍ମିତା ତ୍ରିପାଠୀ ତାଙ୍କ ଅଭିଭାଷଣରେ କ୍ଲବର ଆଗାମୀ ବର୍ଷର ଲକ୍ଷ୍ୟ ଓ କାର୍ଯ୍ୟଯୋଜନା ଉପସ୍ଥାପନ କରିଥିଲେ। ସେ ରୋଟାରୀର ମୂଳମନ୍ତ୍ର “ନିଜ ସ୍ୱାର୍ଥ ଉପରେ ସେବା” ଏବଂ ରୋଟାରୀ ଆନ୍ତର୍ଜାତୀୟର ସଭାପତି ରୋଟେରିଆନ୍ ଓଲାୟିଙ୍କା ହାକିମ୍ ବାବାଲୋଲାଙ୍କ ଚଳିତ ବର୍ଷର ଆଦର୍ଶ ବାକ୍ୟ ସ୍ଥାୟୀ ପ୍ରଭାବ ସୃଷ୍ଟି କରନ୍ତୁ କୁ ଆଧାର କରି ସମାଜସେବା, ମହିଳା ସଶକ୍ତିକରଣ ଓ ଯୁବ ବିକାଶ କ୍ଷେତ୍ରରେ ବ୍ୟାପକ କାର୍ଯ୍ୟକ୍ରମ ହାତକୁ ନିଆଯିବ ବୋଲି ଦୃଢ଼ ପ୍ରତିଶ୍ରୁତି ବ୍ୟକ୍ତ କରିଥିଲେ।
ଏହି ଆକର୍ଷଣୀୟ ଉତ୍ସବରେ କ୍ଲବର ବିଶେଷ ସ୍ମରଣିକା ପ୍ରିମିୟମ କନେକ୍ଟ କୁ ସମ୍ପାଦକ ରୋଟେରିଆନ୍ ତୁଷାର ନନ୍ଦଙ୍କ ଦ୍ୱାରା ଉନ୍ମୋଚନ କରାଯାଇଥିଲା। ଏହାସହ ବିଭିନ୍ନ ରୋଟାରୀ କ୍ଲବରୁ ଆଗତ ବିଶିଷ୍ଟ ଅତିଥିମାନଙ୍କୁ ଆନୁଷ୍ଠାନିକ ଭାବେ ସମ୍ବର୍ଦ୍ଧିତ କରାଯାଇଥିଲା।
କାର୍ଯ୍ୟକ୍ରମର ଶୁଭାରମ୍ଭରେ ରୋଟାରୀର ପ୍ରତିଷ୍ଠାତା ପଲ୍ ପି. ହ୍ୟାରିସ୍‌ଙ୍କ ପ୍ରତି ଶ୍ରଦ୍ଧାପୂର୍ବକ ପୁଷ୍ପାଞ୍ଜଳି ଅର୍ପଣ କରାଯିବା ସହ ଜାତୀୟ ସଙ୍ଗୀତ ଗାନ କରାଯାଇଥିଲା। ରୋଟେରିଆନ୍ ପାୟଲ ଆଚାର୍ଯ୍ୟ ଅତ୍ୟନ୍ତ ସୁନ୍ଦର ଭାବେ ମଞ୍ଚ ସଂଚାଳନ କରିଥିବା ବେଳେ ରୋଟେରିଆନ୍ ଅପରାଜିତା ପଟ୍ଟନାୟକ ଉପସ୍ଥାନ ବିବରଣୀ ଉପସ୍ଥାପନ କରିଥିଲେ। ଶେଷରେ ସମ୍ପାଦକ ରୋଟେରିଆନ୍ ରୂପମ ମହାପାତ୍ର ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ ଓ ସୁଦର୍ଶନ ଛୋଟରାୟ ଅଥିତି ପରିଚୟ ପ୍ରଦାନ କରିଥିଲେ l ନୂତନ ପରିଚାଳନା ପରିଷଦ ଓ ପଦାଧିକାରୀମାନଙ୍କ ଆନୁଷ୍ଠାନିକ ଦାୟିତ୍ୱ ଗ୍ରହଣ ସହ ରୋଟାରୀ କ୍ଲବ ଅଫ ଭୁବନେଶ୍ୱର ପ୍ରିମିୟମ ଏକ ନୂତନ ପ୍ରଗତିଶୀଳ ଅଧ୍ୟାୟର ଶୁଭାରମ୍ଭ କରିଛି।