ଦୁର୍ଗମ ଅଞ୍ଚଳରେ ଯୋଗାଯୋଗ ବ୍ୟବସ୍ଥାକୁ ମିଳିବ ନୂଆ ଗତି, ଲୋକଙ୍କ ମଧ୍ୟରେ ଖୁସିର ଲହର
ଉମରକୋଟ / ରାଇଘର : ନବରଙ୍ଗପୁର ଜିଲ୍ଲା ରାଇଘର ବ୍ଲକର ଦୁର୍ଗମ ଆଦିବାସୀ ଅଞ୍ଚଳ କିବେକଙ୍ଗା ଗ୍ରାମବାସୀଙ୍କ ପାଇଁ ଏକ ନୂଆ ଆଶାର ସଞ୍ଚାର ହୋଇଛି। ଦୀର୍ଘଦିନର ଦାବି ପରେ କିବେକଙ୍ଗା ଠାରୁ ପଡ଼ୋଶୀ ରାଜ୍ୟ ଛତିଶଗଡ଼ ସୀମା ପର୍ଯ୍ୟନ୍ତ ନୂତନ ଆର୍ଡି ରାସ୍ତା ନିର୍ମାଣ କାର୍ଯ୍ୟର ଭିତ୍ତିପ୍ରସ୍ତର ସ୍ଥାପନ ଓ ଶୁଭାରମ୍ଭ କରାଯାଇଛି। ଏହି ରାସ୍ତା ନିର୍ମାଣ ହେବା ପରେ ଅଞ୍ଚଳବାସୀଙ୍କ ଯାତାୟାତ ସମସ୍ୟା ଦୂର ହେବା ସହ ଦୁଇ ରାଜ୍ୟ ମଧ୍ୟରେ ସଂଯୋଗ ଆହୁରି ସୁଦୃଢ଼ ହେବ।
ଓଡ଼ିଶା ସରକାରଙ୍କ ଗ୍ରାମ୍ୟ ଉନ୍ନୟନ ବିଭାଗ, ନବରଙ୍ଗପୁର ପକ୍ଷରୁ ମୁଖ୍ୟମନ୍ତ୍ରୀ ସଡ଼କ ଯୋଜନା ୨୦୨୫-୨୬ ଅଧୀନରେ ଏହି ଗୁରୁତ୍ୱପୂର୍ଣ୍ଣ ସଡ଼କ ପ୍ରକଳ୍ପ ଗ୍ରହଣ କରାଯାଇଛି। ଗତ ୦୪/୦୮/୨୦୨୬ ତାରିଖରେ ଓଡ଼ିଶା ସରକାରଙ୍କ ଗଣଶିକ୍ଷା ମନ୍ତ୍ରୀ ଶ୍ରୀ ନିତ୍ୟାନନ୍ଦ ଗଣ୍ଡଙ୍କ ଦ୍ୱାରା ଏହାର ଶୁଭ ଉଦ୍ଘାଟନ କରାଯାଇଥିଲା।
ପ୍ରକଳ୍ପର ଅଟକଳ ମୂଲ୍ୟ ୩୦୦୭୯ ହଜାର ଟଙ୍କା ରହିଛି। ଏହି ରାସ୍ତା ନିର୍ମାଣ ଦ୍ୱାରା କିବେକଙ୍ଗା ସମେତ ଆଖପାଖ ଅନେକ ଗ୍ରାମର ଲୋକମାନେ ଉପକୃତ ହେବେ। ବିଶେଷକରି ଛତିଶଗଡ଼ ରାଜ୍ୟକୁ ଯାତାୟାତ, ଚିକିତ୍ସା ସେବା ପାଇଁ ଯିବା, ଛାତ୍ରଛାତ୍ରୀଙ୍କ ଶିକ୍ଷା, କୃଷିଜାତ ଉତ୍ପାଦ ପରିବହନ ଓ ବ୍ୟବସାୟିକ କାର୍ଯ୍ୟକଳାପରେ ଏହି ରାସ୍ତା ଏକ ନୂଆ ସୁଯୋଗ ସୃଷ୍ଟି କରିବ।
ଶୁଭାରମ୍ଭ କାର୍ଯ୍ୟକ୍ରମରେ ସ୍ଥାନୀୟ ଜନପ୍ରତିନିଧି, ଗ୍ରାମ୍ୟ ଉନ୍ନୟନ ବିଭାଗର ଅଧିକାରୀ, ପ୍ରଶାସନିକ କର୍ମଚାରୀ, ବିଭିନ୍ନ ବିଭାଗର ପଦାଧିକାରୀ ଓ ବହୁ ସଂଖ୍ୟକ ଅଞ୍ଚଳବାସୀ ଉପସ୍ଥିତ ଥିଲେ।
ଏହି ଅବସରରେ ଗଣଶିକ୍ଷା ମନ୍ତ୍ରୀ ଶ୍ରୀ ନିତ୍ୟାନନ୍ଦ ଗଣ୍ଡ କହିଥିଲେ ଯେ, ରାଜ୍ୟ ସରକାର ଦୁର୍ଗମ ଓ ଆଦିବାସୀ ଅଞ୍ଚଳର ବିକାଶକୁ ସର୍ବୋଚ୍ଚ ପ୍ରାଥମିକତା ଦେଉଛନ୍ତି। ଭଲ ସଡ଼କ ଯୋଗାଯୋଗ ହେଲେ ଗ୍ରାମାଞ୍ଚଳର ଲୋକଙ୍କ ଜୀବନ ମାନରେ ପରିବର୍ତ୍ତନ ଆସିବା ସହ ଆର୍ଥିକ ଓ ସାମାଜିକ ବିକାଶ ତ୍ୱରାନ୍ୱିତ ହେବ।
ସ୍ଥାନୀୟ ଲୋକମାନେ କହିଛନ୍ତି ଯେ, ଏହି ରାସ୍ତା ପାଇଁ ସେମାନେ ବହୁ ବର୍ଷ ଧରି ଅପେକ୍ଷା କରିଥିଲେ। ବର୍ଷା ଋତୁରେ ଯାତାୟାତ ସମସ୍ୟା, ରୋଗୀଙ୍କୁ ହସ୍ପିଟାଲ ନେବାର ଅସୁବିଧା ଓ ଉତ୍ପାଦ ବଜାରକୁ ପହଞ୍ଚାଇବାର ସମସ୍ୟା ଏବେ ବହୁ ପରିମାଣରେ କମିବ ବୋଲି ସେମାନେ ଆଶା ବ୍ୟକ୍ତ କରିଛନ୍ତି।
ଅଞ୍ଚଳବାସୀଙ୍କ ମତରେ, କିବେକଙ୍ଗାରୁ ଛତିଶଗଡ଼ ସୀମା ପର୍ଯ୍ୟନ୍ତ ଏହି ନୂତନ ସଡ଼କ କେବଳ ଏକ ରାସ୍ତା ନୁହେଁ, ବରଂ ଦୁଇ ରାଜ୍ୟର ଲୋକଙ୍କ ମଧ୍ୟରେ ଯୋଗାଯୋଗ, ବାଣିଜ୍ୟ, ଶିକ୍ଷା ଓ ରୋଜଗାରର ଏକ ନୂଆ ସେତୁ ଭାବେ କାର୍ଯ୍ୟ କରିବ।
