ଉମରକୋଟ, ୬/୧୧/୨୦୨୬ (ଆଗରତଳା, ୧ ନଭେମ୍ବର): ଭାଷା, ସାହିତ୍ୟ ଓ ସଂସ୍କୃତିର ଅପୂର୍ବ ସମନ୍ୱୟ ମଧ୍ୟରେ ତ୍ରିପୁରାର ରାଜଧାନୀ ଆଗରତଳାସ୍ଥିତ ଷ୍ଟୁଡେଣ୍ଟସ୍ ହେଲ୍ଥ ହୋମ୍ ଅଡିଟୋରିୟମ୍ରେ ମହାସମାରୋହରେ ଅନୁଷ୍ଠିତ ହୋଇଯାଇଛି ‘ଲେଖନୀ ସାହିତ୍ୟ ପରିଷଦ’ର ଷଷ୍ଠ ବାର୍ଷିକ ସମ୍ମିଳନୀ–୨୦୨୬। ଲେଖନୀ ସାହିତ୍ୟ ପରିଷଦ ଓ ଏହାର ସହଯୋଗୀ ସଂଗଠନଗୁଡ଼ିକର ମିଳିତ ଉଦ୍ୟମରେ ନଭେମ୍ବର ୧ ତାରିଖରେ ଆୟୋଜିତ ଏହି ସାହିତ୍ୟ ମହୋତ୍ସବରେ ତ୍ରିପୁରା ସମେତ ଆସାମ, ପଶ୍ଚିମବଙ୍ଗ, ଓଡ଼ିଶା ତଥା ଭାରତର ବିଭିନ୍ନ ରାଜ୍ୟରୁ ବହୁ ବିଶିଷ୍ଟ ସାହିତ୍ୟିକ, କବି, ଶିକ୍ଷାବିତ୍, ସାଂସ୍କୃତିକ ବ୍ୟକ୍ତିତ୍ୱ ଓ ସାମ୍ବାଦିକମାନେ ଯୋଗଦେଇଥିଲେ। ବଙ୍ଗଳା, ଆସାମୀ, କକବରକ, ସାଦ୍ରି, ଓଡ଼ିଆ ଓ ମଗ ଭାଷାର ସାହିତ୍ୟସାଧକମାନଙ୍କ ଉପସ୍ଥିତି ଏହି ସମ୍ମିଳନୀକୁ ଏକ ଅନନ୍ୟ ଆନ୍ତଃଭାଷା ସାଂସ୍କୃତିକ ମିଳନମେଳାରେ ପରିଣତ କରିଥିଲା।
କାର୍ଯ୍ୟକ୍ରମର ପ୍ରାରମ୍ଭରେ ଉତ୍ତର-ପୂର୍ବ ଭାରତର ବିଭିନ୍ନ ପ୍ରାନ୍ତରୁ ଆସିଥିବା ଅତିଥି, ସାହିତ୍ୟିକ, ଶିକ୍ଷାବିତ୍ ଓ ସାଂସ୍କୃତିକ ପ୍ରତିନିଧିମାନଙ୍କର ପରିଚୟ ପ୍ରଦାନ କରାଯାଇଥିଲା। ତ୍ରିପୁରାର ଆୟୋଜକ ମଣ୍ଡଳୀ ପକ୍ଷରୁ ସୁଖମୟ ମୁରାସିଂ ସ୍ୱାଗତ ଭାଷଣ ତଥା ବକ୍ତବ୍ୟ ପ୍ରଦାନ କରିଥିବା ବେଳେ ପ୍ରଖ୍ୟାତ କଥାସାହିତ୍ୟିକ ଦିଲୀପ ରାୟ ବହୁ ସାମ୍ବାଦିକ ଓ ଅତିଥିମାନଙ୍କ ଉପସ୍ଥିତିରେ ପ୍ରଦୀପ ପ୍ରଜ୍ଜ୍ୱଳନ ପୂର୍ବକ ଏହି ଭବ୍ୟ ସମ୍ମିଳନୀକୁ ଆନୁଷ୍ଠାନିକ ଭାବେ ଉଦ୍ଘାଟନ କରିଥିଲେ। ମଞ୍ଚରେ ଉପସ୍ଥିତ ବରିଷ୍ଠ ଅତିଥିମାନଙ୍କ ମଧ୍ୟରେ ରବୀନ୍ଦ୍ର କିଶୋର ଦେବବର୍ମା ପ୍ରମୁଖ ଉପସ୍ଥିତ ରହି ନିଜର ବକ୍ତବ୍ୟ ରଖିଥିଲେ। କକବରକ ଭାଷାର ବ୍ୟାକରଣ ଉପରେ ତାଙ୍କର ଗବେଷଣା ଓ ଅବଦାନ ତ୍ରିପୁରାର ନିଜସ୍ୱ ଭାଷା ତଥା ଲୋକସଂସ୍କୃତିର ସଂରକ୍ଷଣ କ୍ଷେତ୍ରରେ ଏକ ଉଲ୍ଲେଖନୀୟ ଭୂମିକା ଗ୍ରହଣ କରିଛି। ଆଗରତଳା ପ୍ରେସ୍ କ୍ଲବ୍ ପକ୍ଷରୁ ପ୍ରଣବ ସରକାର ଯୋଗଦେଇ ନିଜର ଗୁରୁତ୍ୱପୂର୍ଣ୍ଣ ମତାମତ ଓ ପ୍ରେରଣାଦାୟୀ ଅଭିଭାଷଣ ପ୍ରଦାନ କରିଥିଲେ।
ଆସାମରୁ ଆସିଥିବା ବିଶିଷ୍ଟ କବୟିତ୍ରୀ ଅଞ୍ଜଳି ଦତ୍ତ ମନଛୁଆଁ ଆସାମୀ ଭାଷାରେ କବିତା ପାଠ କରି ସମସ୍ତ ଶ୍ରୋତାମାନଙ୍କ ହୃଦୟ ଜୟ କରିଥିଲେ। ତାଙ୍କର ଏହି ସ୍ୱରଚିତ କବିତା ‘ସ୍ମରଣିକା ୨୦୨୬’ରେ ବଙ୍ଗଳା ଓ ଆସାମୀ ଭାଷାରେ ମଧ୍ୟ ସ୍ଥାନିତ ହୋଇଛି। ନଳବାରୀର ଏହି ବିଶିଷ୍ଟ କବୟିତ୍ରୀ ବିଗତ ଦୁଇବର୍ଷ ଧରି ଅମଲେଶ କୁମାର ଘୋଷ ଏବଂ ପରବର୍ତ୍ତୀ ସମୟରେ ଡ. ପାର୍ଥ ପ୍ରତିମ ବିଶ୍ୱାସଙ୍କ ସହ ମିଳିତ ଭାବେ ଗବେଷଣାମୂଳକ ଗ୍ରନ୍ଥ ‘ଭାଷାନଦୀର ଭଲୋବାସା’ ପ୍ରକାଶନ କରିବାରେ ବିଶେଷ ଭୂମିକା ନିର୍ବାହ କରିଛନ୍ତି। ଏହି ମହତ୍ତ୍ୱପୂର୍ଣ୍ଣ ଅବସରରେ ଆସାମରୁ ୧୫ ଜଣ ପ୍ରତିଭାବାନ ସାହିତ୍ୟିକ ଓ ଶିକ୍ଷାବିତ୍ ଆମନ୍ତ୍ରିତ ଅତିଥି ଭାବେ କାର୍ଯ୍ୟକ୍ରମରେ ଯୋଗଦେଇଥିଲେ।
ପରିଷଦର ଷଷ୍ଠ ପ୍ରତିଷ୍ଠା ଦିବସ ଉପଲକ୍ଷେ ‘ସ୍ମରଣିକା ୨୦୨୬’ ସମେତ ନଅଟି ମିଳିତ ସାହିତ୍ୟ ସଂକଳନ ମହାସମାରୋହରେ ଲୋକାର୍ପିତ ହୋଇଥିଲା। ଏହି ପୁସ୍ତକଗୁଡ଼ିକର ସମ୍ପାଦନା ଦାୟିତ୍ୱରେ ଅମଲେଶ କୁମାର ଘୋଷ, ଡ. ପାର୍ଥ ପ୍ରତିମ ବିଶ୍ୱାସ, ରଜନୀ କାନ୍ତି ଦାସ, ଝରଣା ଦତ୍ତ, ରୀଣା ପାତ୍ର ହାଜରା, ଦୀପିକା ହାଲଦାର ଓ ସୋନିଆ ଆକ୍ତାର ଲିପି ପ୍ରମୁଖ ରହିଥିଲେ। ଏଥିସହିତ ବଙ୍ଗଳା, ଆସାମୀ ଓ ସାଦ୍ରି ଭାଷାରେ ପ୍ରକାଶିତ ୧୫ଟି ଏକକ ପୁସ୍ତକ ମଧ୍ୟ ମଞ୍ଚରେ ଉନ୍ମୋଚିତ ହୋଇଥିଲା। ଏହି ସାରସ୍ୱତ ସୃଷ୍ଟିଗୁଡ଼ିକ ମଧ୍ୟରେ କେଶବୀ ଉରାଓଁ, ବିଶ୍ୱଜିତ ମାଣିକ, ଶିଖା ଭୌମିକ, ଡ. ରୁଣା ପାଲ, ବି.ଏମ୍. ମିଜାନୁର ରହମାନ, ସୁଖମୟ ମୁରାସିଂ, ଅପର୍ଣ୍ଣା ପାତ୍ର, ମୌମିତା ଘୋଷ, ଡ. ଆକବର ଅଲି ଶାହ, ମାୟାରାଣୀ ମଜୁମଦାର, ସୁଦୀପ ଚକ୍ରବର୍ତ୍ତୀ, ନିତାଇ ଶର୍ମା, ରଣଜିତ କୁମାର ରାୟ, ଅଞ୍ଜଳି ଦତ୍ତ, ଅମଲେଶ କୁମାର ଘୋଷ ଓ ଡ. ପାର୍ଥ ପ୍ରତିମ ବିଶ୍ୱାସଙ୍କ ସମେତ ବହୁ ବିଦଗ୍ଧ ଲେଖକଙ୍କ ଉଚ୍ଚକୋଟୀର ରଚନା ସ୍ଥାନ ପାଇଥିଲା।
ପ୍ରତିବର୍ଷ ପ୍ରତିଷ୍ଠା ଦିବସ ଅବସରରେ ପ୍ରକାଶିତ ହେଉଥିବା ‘ସ୍ମରଣିକା’ର ମୁଖ୍ୟ ଉପଦେଷ୍ଟା ଓ ସମ୍ପାଦକ ହେଉଛନ୍ତି ସାହିତ୍ୟସାଧକ ଅମଲେଶ କୁମାର ଘୋଷ, ଯିଏ ସାହିତ୍ୟ ମହଲରେ ସମସ୍ତଙ୍କ ନିକଟରେ ‘ଦାଦାଭାଇ’ ଭାବେ ବେଶ୍ ପରିଚିତ। ‘ସ୍ମରଣିକା ୨୦୨୬’ କେବଳ ଏକ ସାଧାରଣ ସାହିତ୍ୟ ସଂକଳନ ନୁହେଁ, ବରଂ ଦୁଇ ବଙ୍ଗଳା (ପଶ୍ଚିମବଙ୍ଗ ଓ ବାଂଲାଦେଶ) ସମେତ ସମଗ୍ର ଭାରତର ବିଭିନ୍ନ ରାଜ୍ୟର କବି, ଲେଖକ ଓ ସାହିତ୍ୟପ୍ରେମୀଙ୍କ ଭାବନା, ସୃଜନଶୀଳତା ତଥା ଆନ୍ତରିକ ସମ୍ପର୍କର ଏକ ଅମୂଲ୍ୟ ଦଲିଲ। ବାଂଲାଦେଶ ଓ ଭାରତର ବିଭିନ୍ନ ପ୍ରାନ୍ତରୁ ବଙ୍ଗଳା, ଆସାମୀ ଓ ଅନ୍ୟାନ୍ୟ ପ୍ରାନ୍ତୀୟ ଭାଷାର ହୃଦୟସ୍ପର୍ଶୀ କବିତା ତଥା ଗଳ୍ପ ଏଥିରେ ସ୍ଥାନିତ ହୋଇଛି। ଭାଷାରେ ଭିନ୍ନତା ଥିଲେ ମଧ୍ୟ ସାହିତ୍ୟର ମୂଳ ଆବେଦନ ଯେ ଚିରନ୍ତନ ତଥା ସର୍ବଜନୀନ, ଏହି ସଂକଳନ ତାହାର ଏକ ଜ୍ୱଳନ୍ତ ଉଦାହରଣ ପାଲଟିଛି। ପ୍ରକୃତି, ପ୍ରେମ, ବିରହ, ମାନବିକ ସମ୍ପର୍କ, ସମାଜ, ସମୟର ଆହ୍ୱାନ, ଦେଶପ୍ରେମ ଓ ମାନବିକତାର ବିବିଧ ଦିଗ ଲେଖକମାନଙ୍କ ଶାଣିତ କଲମ ମୁନରେ ଏଠାରେ ଜୀବନ୍ତ ହୋଇଉଠିଛି।
ଏହି ସମ୍ମିଳନୀ ଅବସରରେ ଆସାମର ବିଶିଷ୍ଟ କବି ତଥା ସାହିତ୍ୟିକ ରଞ୍ଜନ ଜ୍ୟୋତି ଶର୍ମା ବରଦଲୋଇ, କବିତା ଡେକା ତାଲୁକଦାର, ଡ. ଦେବେନ୍ଦ୍ର କୁମାର ବେଜବରୁଆ ଓ ଡ. ରଚନାଙ୍କୁ ସ୍ୱତନ୍ତ୍ର ପଦକ ପ୍ରଦାନ ପୂର୍ବକ ସମ୍ମାନିତ କରାଯାଇଥିଲା। ସେହିପରି ସମ୍ବର୍ଦ୍ଧନା ପର୍ବରେ ଡ. ମହମ୍ମଦ ମୁଜାହିଦ ରହମାନ, କ୍ରାଇରୀ ମଗ ଚୌଧୁରୀ, ସ୍ନେହମୟ ରାୟ ଚୌଧୁରୀ, ଡା. ଭାସ୍କର ମଜୁମଦାର, ପାର୍ଥ ଚକ୍ରବର୍ତ୍ତୀ, ଡ. ଅଲକ ଭଟ୍ଟାଚାର୍ଯ୍ୟ, ମାନସୀ ଘୋଷ, ଶ୍ୟାମଶ୍ରୀ ପୋଦ୍ଦାର ସାହା, ଅଞ୍ଜଳି ଦତ୍ତ, ଡ. ରୁଣା ପାଲ, ନିର୍ମଳେନ୍ଦୁ ଆଚାର୍ଯ୍ୟ, ନିତାଇ ଶର୍ମା, ତପନ ବୈଦ୍ୟ, ଡ. ଆକବର ଅଲି ଶାହ, ଡ. ସରୋଜ ମାହାତୋ, ଡ. ମନୋରଞ୍ଜନ ଦାସ, ଓଡ଼ିଶାର ବରିଷ୍ଠ ସାମ୍ବାଦିକ (ନିସର୍ତ ନ୍ୟୁଜ୍ ପେପର) ରସିକ ସରକାର, ନିଗମାନନ୍ଦ ମଣ୍ଡଳ, ଡ. ଆଶିଷ କୁମାର ବୈଦ୍ୟ, ସେବକ ଭଟ୍ଟାଚାର୍ଯ୍ୟ, ସୁଶାନ୍ତ ଘୋଷ, କେଶବୀ ଉରାଓଁ, ବରୁଣ ଚକ୍ରବର୍ତ୍ତୀ ଓ ଡ. ଦେବବ୍ରତ ଦେବରାୟଙ୍କ ସମେତ ଅନେକ ବିଶିଷ୍ଟ ବ୍ୟକ୍ତିତ୍ୱଙ୍କୁ ଭବ୍ୟ ସମ୍ବର୍ଦ୍ଧନା ପ୍ରଦାନ କରାଯାଇଥିଲା।
ଉତ୍ସବରେ ବିଶେଷ ଅତିଥି ଭାବେ ଟେକ୍ନୋ ଇଣ୍ଡିଆ ୟୁନିଭର୍ସିଟି (ତ୍ରିପୁରା)ର କୁଳପତି ତଥା ପ୍ରଖ୍ୟାତ ବିଜ୍ଞାନୀ ପ୍ରଫେସର ଡ. ରତନ କୁମାର ସାହା ଯୋଗଦେଇଥିଲେ। ବଙ୍ଗଳା ଓ ମଗ ଭାଷାର ଲୋକପ୍ରିୟ କବୟିତ୍ରୀ ତଥା ତ୍ରିପୁରା ପୋଲିସର ଡିଏସ୍ପି ନାଇନି ମଗ ଚୌଧୁରୀ ଏବଂ ଡିଏସ୍ପି ନିତ୍ୟାନନ୍ଦ ସରକାରଙ୍କ ଉପସ୍ଥିତି ସମ୍ମିଳନୀର ମର୍ଯ୍ୟାଦା ତଥା ଗାମ୍ଭୀର୍ଯ୍ୟକୁ ଆହୁରି ବୃଦ୍ଧି କରିଥିଲା।
ସାହିତ୍ୟ ଚର୍ଚ୍ଚା ସହିତ ମନୋରମ ସାଂସ୍କୃତିକ କାର୍ଯ୍ୟକ୍ରମ ଏହି ସମ୍ମିଳନୀର ଅନ୍ୟତମ ମୁଖ୍ୟ ଆକର୍ଷଣ ପାଲଟିଥିଲା। ତ୍ରିପୁରାର ରିଆଙ୍ଗ (ବ୍ରୁ) ଜନଜାତିର ପାରମ୍ପରିକ ‘ହୋଜାଗିରି ନୃତ୍ୟ’ ଶିଳ୍ପୀମାନଙ୍କ ଦ୍ୱାରା ପରିବେଷିତ ହୋଇ ଦର୍ଶକମାନଙ୍କୁ ବିଶେଷ ଭାବେ ଆକର୍ଷିତ କରିଥିଲା। ନୃତ୍ୟଶିଳ୍ପୀମାନଙ୍କ ଅଦ୍ଭୁତ ଶାରୀରିକ ସନ୍ତୁଳନ ଓ ଅନନ୍ୟ ନୃତ୍ୟକଳା ଉପସ୍ଥିତ ଦର୍ଶକଙ୍କୁ ମନ୍ତ୍ରମୁଗ୍ଧ କରି ରଖିଥିଲା। ଆନ୍ତର୍ଜାତିକ ଖ୍ୟାତିସମ୍ପନ୍ନ କଥକ ନୃତ୍ୟଶିଳ୍ପୀ ମାନସୀ ଘୋଷ ନିଜର ଚିତ୍ତାକର୍ଷକ ନୃତ୍ୟ ପରିବେଷଣ ମାଧ୍ୟମରେ ସମସ୍ତଙ୍କ ମନ ଜିଣି ନେଇଥିଲେ। ଅନ୍ୟପକ୍ଷରେ କବିତା ଡେକା ତାଲୁକଦାର ମନଲୋଭା ଆସାମୀ ବିହୁ ଗୀତ ପରିବେଷଣ କରିଥିବା ବେଳେ ରୁମା ଭଟ୍ଟାଚାର୍ଯ୍ୟଙ୍କ ସୁଲଳିତ କଣ୍ଠରେ ଆସାମୀ କବିତା ଆବୃତ୍ତି ଶ୍ରୋତାମାନଙ୍କୁ ଭାବବିହ୍ୱଳ କରିଥିଲା। ସେହିପରି ସଞ୍ଜୟ ବିଶ୍ୱାସଙ୍କ କୌତୁକ, ନୃତ୍ୟ ଓ ସଙ୍ଗୀତ ପରିବେଷଣ ସଭାଗୃହରେ ଉପସ୍ଥିତ ସମସ୍ତଙ୍କୁ ଆନନ୍ଦିତ କରିଥିଲା।
ସମ୍ମିଳନୀର ଅନ୍ୟତମ ମୁଖ୍ୟ ଆକର୍ଷଣ ଥିଲା ଗବେଷଣାମୂଳକ ମିଳିତ ପୁସ୍ତକ ‘ଭାଷାନଦୀର ଭଲୋବାସା’ର ଶୁଭ ଉନ୍ମୋଚନ। ଆସାମୀ, ବଙ୍ଗଳା ଓ ଇଂରାଜୀ ଭାଷାରେ ପ୍ରସ୍ତୁତ ଏହି ଗବେଷଣାଧର୍ମୀ ଗ୍ରନ୍ଥ ଉପରେ ସମ୍ପାଦକ ଅମଲେଶ କୁମାର ଘୋଷ ଓ ଆସାମର ବିଶିଷ୍ଟ କବୟିତ୍ରୀ ଅଞ୍ଜଳି ଦତ୍ତ ବିସ୍ତୃତ ଆଲୋକପାତ କରିଥିଲେ। ଏଥିସହ ଲେଖନୀ ସାହିତ୍ୟ ପରିଷଦର ଷଷ୍ଠ ପ୍ରତିଷ୍ଠା ଦିବସ ଅବସରରେ ବିଭିନ୍ନ କ୍ଷେତ୍ରର ସାଂସ୍କୃତିକ କର୍ମୀ, ସାମ୍ବାଦିକ ଓ ସମାଜସେବୀଙ୍କ ସମେତ ମୋଟ ୩୨ ଜଣ ବିଶିଷ୍ଟ ବ୍ୟକ୍ତିତ୍ୱଙ୍କୁ ସମ୍ମାନଜନକ ‘ଲେଖନୀ ରତ୍ନ ସମ୍ମାନନା–୨୦୨୬’ ପ୍ରଦାନ କରାଯାଇ ସମ୍ବର୍ଦ୍ଧିତ କରାଯାଇଥିଲା।
ସାମଗ୍ରିକ ଭାବେ ଆଗରତଳାର ଷ୍ଟୁଡେଣ୍ଟସ୍ ହେଲ୍ଥ ହୋମ୍ ଅଡିଟୋରିୟମ୍ରେ ଆୟୋଜିତ ଏହି ଷଷ୍ଠ ବାର୍ଷିକ ସମ୍ମିଳନୀ କେବଳ ଏକ ସାଧାରଣ ସାହିତ୍ୟିକ ଆୟୋଜନ ହୋଇ ରହିନଥିଲା; ବରଂ ଭିନ୍ନ ଭିନ୍ନ ଭାଷା, ଜାତି, ସଂସ୍କୃତି ଓ ଭୌଗୋଳିକ ଅଞ୍ଚଳର ମଣିଷଙ୍କୁ ଏକ ମଞ୍ଚରେ ଏକତ୍ରିତ କରି ଭାରତୀୟ ଏକତା ତଥା ସାଂସ୍କୃତିକ ସମନ୍ୱୟର ଏକ ଉଜ୍ଜ୍ୱଳ ନିଦର୍ଶନ ସୃଷ୍ଟି କରିଛି। ସାହିତ୍ୟ ଯେ ଭାଷା ଓ ଭୌଗୋଳିକ ସୀମା ଅତିକ୍ରମ କରି ମଣିଷର ହୃଦୟ ସହ ହୃଦୟକୁ ସ୍ନେହର ଡୋରିରେ ଯୋଡ଼ିପାରେ, ଆଗରତଳାର ଏହି ସାରସ୍ୱତ ମହାମିଳନ ତାହାର ଏକ ଚିରସ୍ମରଣୀୟ ତଥା ସାର୍ଥକ ପ୍ରତିଫଳନ ହୋଇ ରହିବ।
