ଗଞ୍ଜାମର କ୍ଷତିଗ୍ରସ୍ତ ଚାଷୀଙ୍କ ପାଇଁ ସ୍ୱତନ୍ତ୍ର ପ୍ୟାକେଜ୍ ଘୋଷଣା ଦାବି: RDCଙ୍କ ଜରିଆରେ ମୁଖ୍ୟମନ୍ତ୍ରୀଙ୍କୁ ଋଷିକୁଲ୍ୟା ରୟତ ମହାସଭାର ୧୫ ଦଫା ଦାବିପତ୍ର ପ୍ରଦାନ
ବ୍ରହ୍ମପୁର, ୧୧।୧୧: ବାରମ୍ବାର ବାତ୍ୟା, ଲଗାଣ ବର୍ଷା, ବନ୍ୟା ଓ ଅନ୍ୟାନ୍ୟ ପ୍ରାକୃତିକ ବିପର୍ଯ୍ୟୟ ଯୋଗୁଁ ଗଞ୍ଜାମ ଜିଲ୍ଲାର ଚାଷୀମାନେ ବ୍ୟାପକ କ୍ଷୟକ୍ଷତିର ସମ୍ମୁଖୀନ ହେଉଛନ୍ତି। ଏହାଦ୍ୱାରା ବହୁ ପରିମାଣର ଫସଲ ନଷ୍ଟ ହେବା ସହ ଜିଲ୍ଲାର କୃଷକମାନଙ୍କ ଆର୍ଥିକ ମେରୁଦଣ୍ଡ ସମ୍ପୂର୍ଣ୍ଣ ଭାବେ ଭାଙ୍ଗିପଡ଼ିଛି। ଏଭଳି ସଙ୍କଟଜନକ ସ୍ଥିତିରେ କ୍ଷତିଗ୍ରସ୍ତ ଚାଷୀ ଓ ଭାଗଚାଷୀଙ୍କ ସୁରକ୍ଷା, ପୁନରୁଦ୍ଧାର, ଥଇଥାନ ଏବଂ ସେମାନଙ୍କୁ ଆବଶ୍ୟକୀୟ ଆର୍ଥିକ ସହାୟତା ଯୋଗାଇଦେବା ପାଇଁ ସରକାର ତୁରନ୍ତ ଏକ ସ୍ୱତନ୍ତ୍ର ପ୍ୟାକେଜ୍ ଘୋଷଣା କରିବାକୁ ଜୋରଦାର ଦାବି ହୋଇଛି।
ଏହି ପରିପ୍ରେକ୍ଷୀରେ ଋଷିକୁଲ୍ୟା ରୟତ ମହାସଭା ପକ୍ଷରୁ ଆଜି ସ୍ଥାନୀୟ ଦକ୍ଷିଣାଞ୍ଚଳ ରାଜସ୍ୱ କମିଶନର (RDC) ବିଜୟ ଅମୃତ କୁଲାଙ୍ଗେଙ୍କୁ ସାକ୍ଷାତ କରାଯାଇଛି। ମହାସଭାର ଏକ ପ୍ରତିନିଧି ଦଳ ଆରଡିସିଙ୍କ ଜରିଆରେ ଓଡ଼ିଶାର ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ୧୫ ଦଫା ସମ୍ବଳିତ ଏକ ସ୍ମାରକପତ୍ର ତଥା ଦାବିପତ୍ର ପ୍ରଦାନ କରିଛନ୍ତି। ଆରଡିସି ଶ୍ରୀ କୁଲାଙ୍ଗେ କୃଷକ ପ୍ରତିନିଧିମାନଙ୍କ ସହ ବିସ୍ତୃତ ଆଲୋଚନା କରିବା ସହ ଦାବିପତ୍ରରେ ଉଲ୍ଲେଖ ଥିବା ସମସ୍ତ ବିଷୟ ଉପରେ ସହାନୁଭୂତିର ସହ ଉପଯୁକ୍ତ ପଦକ୍ଷେପ ଗ୍ରହଣ କରାଯିବ ବୋଲି ପ୍ରତିଶ୍ରୁତି ଦେଇଛନ୍ତି। ଗଞ୍ଜାମ ଜିଲ୍ଲାର କୃଷି ଓ କୃଷକଙ୍କ ବିଭିନ୍ନ ସମସ୍ୟାକୁ ଅଗ୍ରାଧିକାର ଦେଇ ଏହି ଦାବିପତ୍ରରେ ଏକାଧିକ ଗୁରୁତ୍ୱପୂର୍ଣ୍ଣ ପ୍ରସ୍ତାବ ଉପସ୍ଥାପନ କରାଯାଇଛି।
ମହାସଭା ପକ୍ଷରୁ କ୍ଷୋଭ ପ୍ରକାଶ କରି କୁହାଯାଇଛି ଯେ, ପ୍ରତିବର୍ଷ ପ୍ରାକୃତିକ ବିପର୍ଯ୍ୟୟ ଯୋଗୁଁ ଚାଷୀଙ୍କ ଅମଳକ୍ଷମ ଫସଲ ନଷ୍ଟ ହେଉଥିବାବେଳେ ପ୍ରଶାସନ ପକ୍ଷରୁ ଉପଯୁକ୍ତ କ୍ଷତିପୂରଣ ମିଳିବାରେ ଅହେତୁକ ବିଳମ୍ବ ଘଟୁଛି। ଫଳରେ ଚାଷୀମାନେ ବର୍ଷ ପରେ ବର୍ଷ ଋଣଭାରରେ ବୁଡ଼ି ରହୁଛନ୍ତି ଏବଂ ଆର୍ଥିକ ଅନାଟନ ଦିନକୁ ଦିନ ତୀବ୍ର ହେଉଛି। କ୍ଷତିର ବୋଝ ସହି ନପାରି ଅନେକ ଚାଷୀ ନିଜର ପାରମ୍ପରିକ ଜୀବିକା ହରାଇବା ସହ ସେମାନଙ୍କ ପାଇଁ ପରିବାର ପ୍ରତିପୋଷଣ କରିବା ମଧ୍ୟ ଅତ୍ୟନ୍ତ କଷ୍ଟକର ହୋଇପଡ଼ୁଛି। ଏଥିପାଇଁ କ୍ଷତିଗ୍ରସ୍ତ ଚାଷୀଙ୍କୁ ବିଳମ୍ବ ନକରି ତୁରନ୍ତ ସିଧାସଳଖ ଆର୍ଥିକ ସହାୟତା ପ୍ରଦାନ, କୃଷି ଋଣ ଉପରେ ରିହାତି ଏବଂ ଆବଶ୍ୟକ ସ୍ଥଳେ ସମ୍ପୂର୍ଣ୍ଣ କୃଷି ଋଣ ଛାଡ଼ ବ୍ୟବସ୍ଥା ଲାଗୁ କରିବାକୁ ଜୋରଦାର ଦାବି ହୋଇଛି।
ସେହିପରି ଚାଷ କାର୍ଯ୍ୟରେ ପ୍ରମୁଖ ଭୂମିକା ଗ୍ରହଣ କରୁଥିବା ବାସ୍ତବ ଭାଗଚାଷୀମାନଙ୍କୁ ମଧ୍ୟ ସରକାରୀ ସହାୟତାର ପରିସରଭୁକ୍ତ କରିବା, କ୍ଷେତ୍ରସ୍ତରରେ ଫସଲ କ୍ଷତିର ନିରପେକ୍ଷ ତଥା ଉପଯୁକ୍ତ ଆକଳନ କରି ଯଥାର୍ଥ କ୍ଷତିପୂରଣ ପ୍ରଦାନ ଏବଂ ଜଟିଳ ପ୍ରକ୍ରିୟା ଥିବା କୃଷି ବୀମା ବ୍ୟବସ୍ଥାକୁ ସରଳୀକରଣ କରିବା ଉପରେ ମହାସଭା ବିଶେଷ ଗୁରୁତ୍ୱାରୋପ କରିଛି। ଜିଲ୍ଲାରେ ଜଳସେଚନ ସୁବିଧାର ସମ୍ପ୍ରସାରଣ, ନଦୀବନ୍ଧଗୁଡ଼ିକର ସ୍ଥାୟୀ ସୁରକ୍ଷା ଓ ମରାମତି, ବନ୍ୟା ନିୟନ୍ତ୍ରଣ ବ୍ୟବସ୍ଥାର ଆଧୁନିକୀକରଣ ତଥା ଚାଷଜମିର ସ୍ଥାୟୀ ସୁରକ୍ଷା ନିମନ୍ତେ ପ୍ରଶାସନ ପକ୍ଷରୁ ଏକ ଦୀର୍ଘମିଆଦୀ ସୁଚିନ୍ତିତ ଯୋଜନା କାର୍ଯ୍ୟକାରୀ କରିବାକୁ ଦାବି କରାଯାଇଛି।
ଅନ୍ୟପକ୍ଷରେ ଜିଲ୍ଲାର ବିଭିନ୍ନ ଅଞ୍ଚଳରେ ପ୍ରସ୍ତାବିତ ତଥା ନିର୍ମାଣାଧୀନ ବଡ଼ ବନ୍ଧ ଓ ଜଳଭଣ୍ଡାର ନିର୍ମାଣ ସମ୍ପର୍କରେ ମଧ୍ୟ ମହାସଭା ଗଭୀର ଉଦ୍ବେଗ ପ୍ରକାଶ କରିଛି। ଏଭଳି ବୃହତ ପ୍ରକଳ୍ପ ଯୋଗୁଁ ସ୍ଥାନୀୟ ପରିବେଶ, କୃଷି ଏବଂ ସାଧାରଣ ଜନଜୀବନ ଉପରେ ପଡ଼ୁଥିବା ପ୍ରତିକୂଳ ପ୍ରଭାବର ତୁରନ୍ତ ସଠିକ୍ ଓ ନିରପେକ୍ଷ ଅନୁଧ୍ୟାନ କରାଯିବା ଆବଶ୍ୟକ। ଏଥିସହ ପ୍ରକଳ୍ପ ଦ୍ୱାରା ପ୍ରଭାବିତ ହେଉଥିବା ଲୋକଙ୍କ ସ୍ୱାର୍ଥ ଏବଂ ସେମାନଙ୍କ ଜୀବନ-ଜୀବିକାର ସୁରକ୍ଷା ଯେଭଳି କ୍ଷୁଣ୍ଣ ନହୁଏ, ତାହା ସୁନିଶ୍ଚିତ କରିବାକୁ ଦାବି ଉଠିଛି। କୃଷି କ୍ଷେତ୍ରକୁ ଲାଭଜନକ କରିବା, ଚାଷୀଙ୍କ ଉତ୍ପାଦିତ ଫସଲର ଉଚିତ ସହାୟକ ମୂଲ୍ୟ ପ୍ରଦାନ, ଗ୍ରାମାଞ୍ଚଳରେ କୃଷିଭିତ୍ତିକ ଭିତ୍ତିଭୂମିର ତ୍ୱରିତ ବିକାଶ ଏବଂ ଯେକୌଣସି ବିପର୍ଯ୍ୟୟ ସମୟରେ ବିନା ବିଳମ୍ବରେ କୃଷକଙ୍କ ନିକଟରେ ସହାୟତା ପହଞ୍ଚାଇବା ଦିଗରେ ରାଜ୍ୟ ସରକାର ଠୋସ୍ ଓ ସ୍ଥାୟୀ ନୀତି ନିର୍ଦ୍ଧାରଣ କରିବା ଜରୁରୀ ବୋଲି ମହାସଭା ମତ ରଖିଛି।
ଗଞ୍ଜାମ ଜିଲ୍ଲାର କୃଷକମାନଙ୍କର ଏହି ଚରମ ଦୁର୍ଦ୍ଦଶା ତଥା ଦୁର୍ଭୋଗ୍ୟପୂର୍ଣ୍ଣ ସ୍ଥିତିକୁ ଦୃଷ୍ଟିରେ ରଖି ସରକାର ଅବିଳମ୍ବେ ସ୍ୱତନ୍ତ୍ର ପ୍ୟାକେଜ୍ ଘୋଷଣା କରିବା ସହ ଉପସ୍ଥାପିତ ସମସ୍ତ ଦାବି ଉପରେ ଯଥାଶୀଘ୍ର ସକାରାତ୍ମକ ବିଚାର କରିବାକୁ ଋଷିକୁଲ୍ୟା ରୟତ ମହାସଭା ପକ୍ଷରୁ ନିବେଦନ କରାଯାଇଛି। ଏହି ଦାବିପତ୍ର ପ୍ରଦାନ ଓ ଆଲୋଚନାରେ ମହାସଭାର ଉପଦେଷ୍ଟା ତଥା ବରିଷ୍ଠ ସାମ୍ବାଦିକ ରବି ରଥ, ସମ୍ପାଦକ ସୀମାଞ୍ଚଳ ନାହାକ, ଚାଷୀ ନେତା ବିଜୟ ସ୍ୱାଇଁ, କିଶୋର ପାତ୍ର, ଲୋକନାଥ ପରିଡ଼ା, ସଞ୍ଜୀବ ରେଡ୍ଡୀ, ବିନୋଦ ପାଣିଗ୍ରାହୀ ଏବଂ ମୋହନ ରାଓ ପ୍ରମୁଖ ଉପସ୍ଥିତ ରହି ସକ୍ରିୟ ଭାବେ ଅଂଶଗ୍ରହଣ କରିଥିଲେ।
