ଵ୍ରହ୍ମପୁର : ଜଣେ ନାବାଳିକାଙ୍କୁ ଅପହରଣ କରି ନେଇ ବଳତ୍କାର କରିଥିବା ଅଭିଯୋଗରେ ବଡ ବଜାର ଥାନା ପୁଲିସ ଅପହରଣକାରୀଙ୍କୁ ଗିରଫ କରି କୋର୍ଟ ଚାଲାଣ କରିଛି । ଅଭିଯୁକ୍ତ ଜଣକ ଆଇନା ବନ୍ଦ ସାହିର ଚନ୍ଦନ ନାୟକ ବୋଲି ପୁଲିସ କହିଛି ।ଅନ୍ୟ ପଟେ ଅପହରଣ ହୋଇଥିବା ନାବାଳିକାଙ୍କୁ ଆଜି ପୁଲିସ ଉଦ୍ଧାର କରିବା ପରେ ଉଭୟ ପିଡ଼ିତା ଓ ଅପହରଣକାରୀଙ୍କ ଏମକେସିଜି ମେଡିକାଲରେ ଡାକ୍ତରି ମଇନା ହୋଇଥିଲା । ସେହିପରି କୋର୍ଟରେ ପିଡ଼ିତାଙ୍କ ବୟାନ ରେକର୍ଡ କରାଯାଇଛି। ଘଟଣାରୁ ପ୍ରକାଶ ଯେ, ଗତ ୯ ତାରିଖରେ ବଡ଼ ବଜାର ଥାନା ଅଞ୍ଚଳର ଏକ ଜୈନିକା ନାବାଳିକାଙ୍କୁ ଅପହରଣ କରାଯାଇଥିବା ନେଇ ନାବାଳିକାଙ୍କ ବାପା ବଡ଼ ବଜାର ଥାନାରେ ଅଭିଯୋଗ କରିଥିଲେ। ଅଭିଯୋଗକୁ ଭିତ୍ତିକରି କରି ପୁଲିସ ଏକ ମାମଲା ରୁଜୁ କରି ଘଟଣାର ଅନୁସନ୍ଧାନ କରିଥିଲା । ଅପହରଣକାରୀ ଚନ୍ଦନ ଉକ୍ତ ନାବାଳିକା ଜଣଙ୍କୁ ଅପହରଣ କରି ନେଇ ଖୋଡ଼ାସିଂ ଅଞ୍ଚଳରେ ରଖିଥିବା ନେଇ ଖବର ପୁଲିସ ପାଇବା ପରେ ସେଠାକୁ ଯାଇ ନାବାଳିକାଙ୍କୁ ଉଦ୍ଧାର କରିବା ସହ ଅପହରଣକାରୀ ଯୁବକଙ୍କୁ ଗିରଫ କରିଥିବା ବଡବଜ଼ାର ଥାନା ଅଧିକାରୀ ସୂଚନା ଦେଇଛନ୍ତି ।