ଆକାରପଲ୍ଲୀ ଗାଁ ରାସ୍ତା ଲଗାଣ ବର୍ଷାରେ କ୍ଷତିଗ୍ରସ୍ତ ଖବର ପ୍ରଚାର ପ୍ରସାର ପରେ ମାଲକାନଗିରି ବିଧାୟକ ଶ୍ରୀ ନରସିଂହ ମାଡ଼କାମିଙ୍କ ତୁରନ୍ତ ପଦକ୍ଷେପ…

ମାଲକାନଗିରି, ଜୁଲାଇ ୩୦, ୨୦୨୫: ଲଗାଣ ବର୍ଷା ଯୋଗୁଁ ମାଲକାନଗିରି ଜିଲ୍ଲାର ମାଟାପାକା ଗ୍ରାମ ପଞ୍ଚାୟତ ଅନ୍ତର୍ଗତ ଆକାରପଲ୍ଲୀ ଗାଁର ମୁଖ୍ୟ ରାସ୍ତା ଗୁରୁତର ଭାବେ କ୍ଷତିଗ୍ରସ୍ତ ହୋଇଛି। ଫଳରେ ପ୍ରାୟ ୧୨୦ଟି ପରିବାର ଏବଂ ୫୦୦ ଗ୍ରାମବାସୀ, ବିଶେଷତ ଛୋଟ ଛୁଆମାନେ, ଅସୁବିଧାର ସମ୍ମୁଖୀନ ହେଉଛନ୍ତି। ରାସ୍ତାଟି ଏବେ କାଦୁଅରେ ଭର୍ତ୍ତି ହୋଇ ଯାତାୟାତ, ଅତ୍ୟାବଶ୍ୟକୀୟ ସେବା ଏବଂ ବିଦ୍ୟାଳୟ ଯିବାରେ ବାଧା ସୃଷ୍ଟି କରିଛି। ଏହି ଖବର ପ୍ରଚାର ପ୍ରସାର ହେବା ପରେ ମାଲକାନଗିରିର ବିଧାୟକ ଶ୍ରୀ ନରସିଂହ ମାଡ଼କାମି ତୁରନ୍ତ ପଦକ୍ଷେପ ଗ୍ରହଣ କରିଛନ୍ତି। ସେ ମାଲକାନଗିରି ଗୋଷ୍ଠୀ ଉନ୍ନୟନ ଅଧିକାରୀ (ବିଡିଓ) ଶ୍ରୀ ତପନ କୁମାର ସେନାପତିଙ୍କ ସହ ଆଲୋଚନା କରିଛନ୍ତି। ବିଧାୟକଙ୍କ ନିର୍ଦ୍ଦେଶ ଅନୁଯାୟୀ, ବିଡିଓ ଶ୍ରୀ ସେନାପତି, ପଞ୍ଚାୟତ ଏକ୍ସିକ୍ୟୁଟିଭ ଅଫିସର (ପିଇଓ) ଶ୍ରୀ ସୁବାଶ କବିରାଜ, ସ୍ଥାନୀୟ ସରପଞ୍ଚ ଏବଂ ମାଲକାନଗିରି ବ୍ଲକ ପ୍ରତିନିଧି ଶ୍ରୀ ସତ୍ୟସରନ ପାଲଙ୍କ ସମେତ ଏକ ଦଳ ଆକାରପଲ୍ଲୀ ଗାଁରେ ପହଞ୍ଚି କ୍ଷତିର ମୂଲ୍ୟାଙ୍କନ କରିଛନ୍ତି।ଗ୍ରାମବାସୀଙ୍କୁ ସମ୍ବୋଧିତ କରି ବିଧାୟକ ମାଡ଼କାମି ଆଶ୍ୱାସନା ଦେଇଛନ୍ତି ଯେ ରାସ୍ତାର ମରାମତି ଓ ପୁନର୍ନିର୍ମାଣ ପାଇଁ ୬ ଲକ୍ଷ ଟଙ୍କାର ଅର୍ଥ ପ୍ରସ୍ତାବ କରାଯାଇଛି ଏବଂ ଶୀଘ୍ର ଏହା ମଞ୍ଜୁର ହେବ। ସେ କହିଛନ୍ତି, “ଆକାରପଲ୍ଲୀ ଗ୍ରାମବାସୀଙ୍କ ସୁବିଧା ନିମନ୍ତେ ଏହି ରାସ୍ତାର ପୁନରୁଦ୍ଧାର ଆମର ପ୍ରାଥମିକତା।” ସ୍ଥାନୀୟ କର୍ତ୍ତୃପକ୍ଷ ରାସ୍ତାଟିକୁ ପୂର୍ଣ୍ଣ ସକ୍ଷମ କରିବା ପାଇଁ ପ୍ରତିଶ୍ରୁତିବଦ୍ଧ ହୋଇଛନ୍ତି। କ୍ଷତିଗ୍ରସ୍ତ ରାସ୍ତା ଯୋଗୁଁ ଅସୁବିଧାର ସମ୍ମୁଖୀନ ହେଉଥିବା ଗ୍ରାମବାସୀମାନେ, ବିଧାୟକଙ୍କ ହସ୍ତକ୍ଷେପ ଓ ପ୍ରସ୍ତାବିତ ଅର୍ଥ ସହାୟତା ପରେ ସମାଧାନର ଆଶା ରଖିଛନ୍ତି।