‘ଚିଙ୍ଗୁଡ଼ି ଉଦ୍ୟୋଗ ଓ ଚାଷୀଙ୍କ ଜୀବିକା ରକ୍ଷା କରନ୍ତୁ…’, ପ୍ରଧାନମନ୍ତ୍ରୀ ମୋଦୀଙ୍କୁ ଚିଠି ଲେଖିଲେ ତାରା ପଟ୍ଟନାୟକ
ଭୁବନେଶ୍ୱର: ଆମେରିକା ଦ୍ୱାରା ଭାରତ ଉପରେ ୫୦ ପ୍ରତିଶତ ଟାରିଫ୍ ଲାଗୁ କରାଯାଇଛି । ଅଗଷ୍ଟ ୨୭ରୁ ଭାରତରୁ ଆମଦାନୀ ହେଉଥିବା ସାମଗ୍ରୀ ଉପରେ ଟାରିଫ୍ ଆଦୟ କରୁଛି ଆମେରିକା । ଯାହାର ପ୍ରଭାବ ଭାରତୀୟ ନିର୍ମାତାଙ୍କ ଉପରେ ପଡ଼ିବା ନେଇ ଅନୁମାନ କରାଯାଉଛି । ଏହି ଟାରିଫ୍ର ପ୍ରଭାବରେ ଓଡ଼ିଶାରୁ ରପ୍ତାମୀ ହେଉଥିବା ଚିଙ୍ଗୁଡ଼ି ଓ କପଡା ଉଦ୍ୟୋଗ ମଧ୍ୟ ପ୍ରଭାବିତ ହେବାର ଆଶଂକା ରହିଛି । ଏହାକୁ ଦୃଷ୍ଟିରେ ରଖି ପ୍ରଧାନମନ୍ତ୍ରୀ ମୋଦୀଙ୍କୁ ଚିଠି ଲେଖିଛନ୍ତି ଓଡ଼ିଶାର ବିଶିଷ୍ଟ ଶିଳ୍ପପତି ତାରା ପଟ୍ଟନାୟକ ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଚିଠି ଲେଖିଛନ୍ତି ସି ଫୁଡ୍ ରପ୍ତାନକାରୀ ଫାଲ୍କନ୍ ଗ୍ରୁପ୍ ପ୍ରତିଷ୍ଠାତା ତାରା ପଟ୍ଟନାୟକ । ଆମେରିକାର ଟାରିଫ୍ରୁ ଭାରତର ଚିଙ୍ଗୁଡ଼ି ଉଦ୍ୟୋଗ ଓ ଚାଷୀଙ୍କ ଜୀବିକାକୁ ସୁରକ୍ଷା ଦେବା ପାଇଁ ଚିଠିରେ ନିବେଦନ କରିଛନ୍ତି । ସେ ଲେଖିଛନ୍ତି, ଗତ ଦୁଇ ଦଶନ୍ଧିରେ ଭାରତ ବିଶ୍ୱରେ ସର୍ବବୃହତ ଉଚ୍ଚମାନର ଡିଙ୍ଗୁଡ଼ି ରପ୍ତାନୀକାରୀ ଭାବେ ଉଭା ହୋଇଛି । ଆମେରିକା, ବ୍ରିଟେନ, ଇୟୁ, ରୁଷ ଓ ଜାପାନରେ ଏହାର ପ୍ରିମିୟମ କ୍ରେତା ଅଛନ୍ତି । ବିଶ୍ୱର ଅଧାରୁ ଅଧିକ ବିକଶିତ ରାଷ୍ଟ୍ର ଭାରତୀୟ ଚିଙ୍ଗୁଡ଼ିକୁ ପସନ୍ଦ କରୁଛନ୍ତି ।
ଚିଠିରେ ସେ କହିଛନ୍ତି, ଭାରତ ବର୍ତ୍ତମାନ ସମୟରେ ବାର୍ଷିକ ୯ ଲକ୍ଷ ମେଟ୍ରିକ୍ ଟନ୍ ଚିଙ୍ଗୁଡ଼ି ଉତ୍ପାଦନ କରୁଛି, ଯାହା ବିଶ୍ୱବଜାରର ୪୦ ପ୍ରତିଶତ । ଏହି ଉଦ୍ୟୋଗ ପ୍ରତ୍ୟକ୍ଷ ଭାବରେ ୧୫ ନିୟୁତରୁ ଅଧିକ ଲୋକଙ୍କୁ ନିଯୁକ୍ତି ଦେଉଛି । ଏହା କେବଳ ଏକ ଉଦ୍ୟୋଗ ନୁହେଁ, ବରଂ ଆମ ନୀଳ ଅର୍ଥନୀତିର ପ୍ରମୁଖ ସ୍ତମ୍ଭ ମଧ୍ୟ । ବର୍ତ୍ତମାନର ରପ୍ତାନୀ ଆହ୍ୱାନକୁ ଦୃଷ୍ଟିରେ ରଖି ଚିଙ୍ଗୁଡ଼ି ପାଇଁ ଘରୋଇ ବଜାର ସୃଷ୍ଟି କରିବାର ଆବଶ୍ୟକତା ରହିଛି । ଏହାସହ ସେ ପରାମର୍ଶ ଦେଇ କହିଛନ୍ତି, ସେନା, ଅର୍ଦ୍ଧସାମରିକ ବାହିନୀ ଏବଂ ସରକାରୀ ସମର୍ଥିତ ପୋଷଣ କାର୍ଯ୍ୟକ୍ରମରେ ଚିଙ୍ଗୁଡ଼ିକୁ ସାମିଲ କଲେ, ଏହା ଉପରେ ପଡ଼ିବାକୁ ଥିବା ପ୍ରଭାବକୁ କମ କରାଯାଇପାରିବ ।