ବ୍ରହ୍ମପୁର, ୦୨/୦୨ : କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ଦ୍ୱାରା ସଂସଦରେ ଆଗତ ୨୦୨୬-୨୭ ବର୍ଷର ବଜେଟକୁ ଏକ ‘ଯୁଗାନ୍ତକାରୀ ଓ ଲୋକାଭିମୁଖୀ’ ବଜେଟ୍ ଭାବେ ଅଭିହିତ କରିଛନ୍ତି ଓଡ଼ିଶା ସରକାରଙ୍କ ବାଣିଜ୍ୟ ଓ ପରିବହନ ଏବଂ ଖଣି ଓ ଇସ୍ପାତ ମନ୍ତ୍ରୀ ଶ୍ରୀ ବିଭୂତି ଭୂଷଣ ଜେନା। ବ୍ରହ୍ମପୁର ଠାରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ମନ୍ତ୍ରୀ ଶ୍ରୀ ଜେନା କହିଛନ୍ତି ଯେ, ୫୩,୪୭,୩୧୫ କୋଟି ଟଙ୍କାର ଏହି ବଜେଟ୍ ‘ଆତ୍ମନିର୍ଭର ଭାରତ’ ତଥା ‘ବିକଶିତ ଭାରତ’ ଗଠନର ସ୍ୱପ୍ନ ସାକାର କରିବାରେ ଏକ ପ୍ରମୁଖ ମାଧ୍ୟମ ହେବ।

ଓଡ଼ିଶା ହେବ ‘ରେୟାର ଅର୍ଥ କରିଡର’ର କେନ୍ଦ୍ର:
ମନ୍ତ୍ରୀଙ୍କ ସୂଚନା ଅନୁଯାୟୀ, ବିରଳ ଖଣିଜ ପଦାର୍ଥର ପ୍ରକ୍ରିୟାକରଣ ଓ ଉତ୍ପାଦନ ପାଇଁ ଓଡ଼ିଶାରେ ‘ରେୟାର ଅର୍ଥ କରିଡର’ (Rare Earth Corridor) ପ୍ରତିଷ୍ଠା ହେବାକୁ ଯାଉଛି। ଏହା ଦ୍ୱାରା ଗଞ୍ଜାମ ଜିଲ୍ଲା ଛତ୍ରପୁର ସ୍ଥିତ ‘ଭାରତୀୟ ବିରଳ ମୃତ୍ତିକା କମ୍ପାନୀ’ (IREL) ର ଉତ୍ପାଦନ କ୍ଷମତା ବୃଦ୍ଧି ପାଇବ। ଫଳରେ ବିଦେଶରୁ ଆମଦାନୀ ଉପରେ ନିର୍ଭରଶୀଳତା ହ୍ରାସ ପାଇବା ସହ ଭାରତୀୟ ପ୍ରତିରକ୍ଷା କ୍ଷେତ୍ର ଅଧିକ ସଶକ୍ତ ହେବ। ଏଥିସହ ନ୍ୟାସନାଲ କ୍ରିଟିକାଲ ମିନେରାଲ ମିସନ୍ (NCMM) ପାଇଁ ଆଗାମୀ ୭ ବର୍ଷରେ ୩.୪ ଲକ୍ଷ କୋଟି ଟଙ୍କାର ବ୍ୟୟବରାଦ କରାଯାଇଛି।

ଗଞ୍ଜାମ ଓ ପୂର୍ବ ଭାରତର ବିକାଶ:

• ବାହୁଡ଼ା ବନ୍ଦର: ଗଞ୍ଜାମ ଜିଲ୍ଲାର ବାହୁଡ଼ା ଠାରେ ଦେଶର ସର୍ବବୃହତ ବନ୍ଦର ନିର୍ମାଣ ପାଇଁ ୨୧,୫୦୦ କୋଟି ଟଙ୍କାର ବ୍ୟୟବରାଦ ହୋଇଛି।
• ଜଳପଥ (NW-5): ଜାତୀୟ ଜଳପଥ-୫ କାର୍ଯ୍ୟକାରୀ ହେବା ଦ୍ୱାରା ତାଳଚେର, ଅନୁଗୁଳ ଓ କଳିଙ୍ଗନଗର ଭଳି ଖଣି ଅଞ୍ଚଳ ସହ ପାରାଦୀପ ବନ୍ଦରର ସଂଯୋଗୀକରଣ ସୁଦୃଢ଼ ହେବ।
• ପର୍ଯ୍ୟଟନ ଓ ପରିବେଶ: ରିଷିକୁଲ୍ୟା ମୁହାଣରେ ଅଲିଭ୍ ରିଡଲେ କଇଁଛଙ୍କ ସୁରକ୍ଷା ପାଇଁ ‘ଟର୍ଟଲ ଟ୍ରେଲ’ (Turtle Trail) ବିକଶିତ ହେବ, ଯାହା ବିଶ୍ୱ ପର୍ଯ୍ୟଟନ ମାନଚିତ୍ରରେ ଗଞ୍ଜାମକୁ ଏକ ସ୍ୱତନ୍ତ୍ର ପରିଚୟ ଦେବ।
• ବ୍ରହ୍ମପୁର ମହାନଗର: ୫ ଲକ୍ଷରୁ ଅଧିକ ଜନସଂଖ୍ୟା ବିଶିଷ୍ଟ ସହର ତାଲିକାରେ ବ୍ରହ୍ମପୁରକୁ ‘City Economic Region’ ଭାବେ ଅନ୍ତର୍ଭୁକ୍ତ କରାଯାଇଛି, ଯାହା ସହରର ଆର୍ଥିକ ଅଭିବୃଦ୍ଧିରେ ସହାୟକ ହେବ।

ବଜେଟ୍‌ର ମୁଖ୍ୟ ଆକର୍ଷଣ:
୧. ପୁଞ୍ଜି ବ୍ୟୟ (Capex): ବିକାଶମୂଳକ କାର୍ଯ୍ୟ ପାଇଁ ପୁଞ୍ଜି ବ୍ୟୟକୁ ୧୨.୨ ଲକ୍ଷ କୋଟି ଟଙ୍କାକୁ ବୃଦ୍ଧି କରାଯାଇଛି।
୨. ସେମିକଣ୍ଡକ୍ଟର ମିସନ୍: ଭାରତକୁ ଟେକ୍ନୋଲୋଜି କ୍ଷେତ୍ରରେ ଆଗକୁ ନେବା ପାଇଁ ୪୦,୦୦୦ କୋଟି ଟଙ୍କାର ବ୍ୟୟବରାଦ ହୋଇଛି।
୩. ବାୟୋ ଫାର୍ମା ଶକ୍ତି: ଔଷଧ ନିର୍ମାଣ କ୍ଷେତ୍ର ପାଇଁ ୧୦,୦୦୦ କୋଟି ଟଙ୍କା ଏବଂ ନୂତନ NIPER ପ୍ରତିଷ୍ଠା ହେବ।
୪. ମହିଳା ଓ ଯୁବଶକ୍ତି: ମହିଳା ଉଦ୍ୟୋଗୀଙ୍କ ପାଇଁ ‘SHE Mart’ ଏବଂ ଶ୍ରମ ଭିତ୍ତିକ ବୟନ ଶିଳ୍ପ ପାଇଁ ସ୍ୱତନ୍ତ୍ର ପ୍ୟାକେଜ୍ ଘୋଷଣା ହୋଇଛି।
୫. ଟିକସ କୋହଳ: ବୈଦ୍ୟୁତିକ ଯାନ, ମୋବାଇଲ୍ ଉତ୍ପାଦନ ଏବଂ ୩୬ଟି ଜୀବନରକ୍ଷକ ଔଷଧ ଉପରୁ ସୀମା ଶୁଳ୍କ ଛାଡ଼ କରାଯାଇଛି।

ଏହି ସାମ୍ବାଦିକ ସମ୍ମିଳନୀରେ ମନ୍ତ୍ରୀ ଶ୍ରୀ ଜେନାଙ୍କ ସମେତ ଛତ୍ରପୁର ବିଧାୟକ କୃଷ୍ଣ ଚନ୍ଦ୍ର ନାୟକ, କବିସୂର୍ଯ୍ୟନଗର ବିଧାୟକ ପ୍ରତାପ ଚନ୍ଦ୍ର ନାୟକ, ରାଷ୍ଟ୍ରୀୟ ପରିଷଦ ସଭ୍ୟ କାହ୍ନୁ ଚରଣ ପତି ଏବଂ ବହୁ ବରିଷ୍ଠ ବିଜେପି ନେତା ଉପସ୍ଥିତ ଥିଲେ। ଏହି ବଜେଟ୍ ‘ମିସନ ପୂର୍ବୋଦୟ’ ମାଧ୍ୟମରେ ଓଡ଼ିଶାକୁ ଦେଶର ବିକାଶର ଇଞ୍ଜିନରେ ପରିଣତ କରିବ ବୋଲି ସମ୍ମିଳନୀରେ ମତ ପ୍ରକାଶ ପାଇଛି।