ବ୍ରହ୍ମପୁର : ବ୍ରହ୍ମପୁର ସ୍ଥିତ ମହାତ୍ମା ଗାନ୍ଧୀ ଷ୍ଟାଡିୟମଠାରେ ଅନୁଷ୍ଠିତ ପ୍ରଥମ ବ୍ରହ୍ମପୁର ବୁଲ୍ସ ଟ୍ରଫି କ୍ରିକେଟ ଟୁର୍ଣ୍ଣାମେଣ୍ଟର ତୃତୀୟ ଦିନରେ ଦୁଇଟି ରୋମାଞ୍ଚକର ମ୍ୟାଚ୍ ଅନୁଷ୍ଠିତ ହୋଇଯାଇଛି। ଦ୍ୱିତୀୟ ମ୍ୟାଚରେ ଶୋଚନୀୟ ବିଜୟ ହାସଲ କରି ଆଲଫା ସ୍ପୋର୍ଟି କ୍ଲବ ସେମିଫାଇନାଲରେ ନିଜ ସ୍ଥାନ ପକ୍କା କରିଛି।
ଟୁର୍ଣ୍ଣାମେଣ୍ଟର ପ୍ରଥମ ମ୍ୟାଚ୍ ଦିଗପହଣ୍ଡି କ୍ରିକେଟ କ୍ଲବ ଏବଂ ଡିଫେନ୍ସ ଏକାଡେମୀ ମଧ୍ୟରେ ଖେଳାଯାଇଥିଲା। ଦିଗପହଣ୍ଡି ଦଳ ଟସ୍ ଜିତି ପ୍ରଥମେ ବ୍ୟାଟିଂ ନିଷ୍ପତ୍ତି ନେଇ ୧୭ ଓଭରରେ ସମସ୍ତ ୱିକେଟ୍ ହରାଇ ୧୬୪ ରନ୍ ସଂଗ୍ରହ କରିଥିଲା। ଜବାବରେ ଡିଫେନ୍ସ ଏକାଡେମୀ ୧୮ ଓଭରରେ ୯ ୱିକେଟ୍ ବିନିମୟରେ ମାତ୍ର ୧୫୧ ରନ୍ କରିବାକୁ ସକ୍ଷମ ହୋଇଥିଲା। ଫଳରେ ଦିଗପହଣ୍ଡି କ୍ରିକେଟ କ୍ଲବ ବିଜୟୀ ହୋଇଥିଲା। ଏହି ମ୍ୟାଚରେ ଅତିଥି ଭାବେ ଗୋପାଳ କୃଷ୍ଣ ରେଡ୍ଡୀ ଯୋଗଦେଇ ଅଶୋକ ସ୍ୱାଇଁଙ୍କୁ ‘ମ୍ୟାନ୍ ଅଫ୍ ଦି ମ୍ୟାଚ୍’ ପୁରସ୍କାର ପ୍ରଦାନ କରିଥିଲେ।
ସେହିପରି ଦ୍ୱିତୀୟ ମ୍ୟାଚ୍ ଆଲଫା ସ୍ପୋର୍ଟି କ୍ଲବ ଏବଂ ରାମେଶ୍ୱର କ୍ରିକେଟ କ୍ଲବ ମଧ୍ୟରେ ଅନୁଷ୍ଠିତ ହୋଇଥିଲା। ଆଲଫା ଦଳ ଟସ୍ ଜିତି ପ୍ରଥମେ ବ୍ୟାଟିଂ କରି ୨୦ ଓଭରରେ ୧୮୬ ରନର ଏକ ବିଶାଳ ସ୍କୋର ଛିଡ଼ା କରିଥିଲା। ଏହାର ପିଛା କରି ରାମେଶ୍ୱର ଦଳ ମାତ୍ର ୧୦୫ ରନରେ ଅଲ୍ ଆଉଟ୍ ହୋଇ ପରାଜୟ ବରଣ କରିଥିଲା। ଏହି ମ୍ୟାଚରେ ବିଜୟ ଭାସ୍କର ସିଂ ସାମନ୍ତ ଅତିଥି ଭାବେ ଯୋଗଦେଇ ଆଲଫା ଦଳର ରାକେଶ ବିଶ୍ୱାଳଙ୍କୁ ‘ମ୍ୟାନ୍ ଅଫ୍ ଦି ମ୍ୟାଚ୍’ ପ୍ରଦାନ କରିଥିଲେ।
ଏହି ବିଜୟ ସହ ଆଲଫା ସ୍ପୋର୍ଟି କ୍ଲବ ଟୁର୍ଣ୍ଣାମେଣ୍ଟର ପ୍ରଥମ ସେମିଫାଇନାଲରେ ପ୍ରବେଶ କରିଛି ଏବଂ ସେଠାରେ ଦଳ ରମ୍ଭା କ୍ରିକେଟ ଦଳକୁ ଭେଟିବ। ସମଗ୍ର ମ୍ୟାଚକୁ ଅମ୍ପାୟର ଭାବେ ଦିରେନ ମିଶ୍ର, ସନ୍ତୋଷ କୁମାର ହୋତା ଏବଂ ସୁଭ୍ରାଂଶୁ କୁଜୁରୁ ପରିଚାଳନା କରିଥିଲେ।
