ମାଲକାନଗିରି : ରଜପର୍ବର ଶେଷ ସନ୍ଧ୍ୟାକୁ ସ୍ମରଣୀୟ କରିବା ପାଇଁ ମାଲକାନଗିରି ସହରର ୱାର୍ଡ ନଂ–୧୮ ଗଣ୍ଡିଆଗୁଡ଼ା ବସ୍ତିରେ ଏକ ନିଆରା କୁଇଜ୍ ପ୍ରତିଯୋଗିତା ଓ ପୁରସ୍କାର ବିତରଣ ଉତ୍ସବ ଆୟୋଜିତ ହୋଇଥିଲା। ଗଣମାଧ୍ୟମ ପ୍ରତିନିଧିମାନଙ୍କ ସହଯୋଗରେ ଆୟୋଜିତ ଏହି କାର୍ଯ୍ୟକ୍ରମରେ ବସ୍ତିର ଶିଶୁ, କିଶୋର ଓ ଯୁବପିଢ଼ି ଉତ୍ସାହର ସହ ଅଂଶଗ୍ରହଣ କରିଥିଲେ।
କୁଇଜ୍ ପ୍ରତିଯୋଗିତାରେ ରଜ ପର୍ବ, ଓଡ଼ିଶାର ସଂସ୍କୃତି, ସାଧାରଣ ଜ୍ଞାନ, ଇତିହାସ ଓ ସାମାଜିକ ସଚେତନତା ସମ୍ବନ୍ଧୀୟ ବିଭିନ୍ନ ପ୍ରଶ୍ନ ପଚରାଯାଇଥିଲା। ପ୍ରତିଯୋଗୀମାନେ ସଠିକ୍ ଉତ୍ତର ଦେଇ ନିଜ ଜ୍ଞାନର ପରିଚୟ ପ୍ରଦାନ କରିଥିଲେ।
ପରେ ବିଜେତା ଏବଂ ଅଂଶଗ୍ରହଣକାରୀମାନଙ୍କୁ ପୁରସ୍କାର ଓ ଉପହାର ପ୍ରଦାନ କରାଯାଇଥିଲା। କାର୍ଯ୍ୟକ୍ରମରେ ଉପସ୍ଥିତ ଅତିଥି ଓ ସାମାଜିକ କର୍ମୀମାନେ ଶିଶୁମାନଙ୍କୁ ପାଠପଢ଼ା ସହ ଜ୍ଞାନବର୍ଦ୍ଧକ କାର୍ଯ୍ୟକଳାପରେ ଆଗ୍ରହୀ ହେବା ପାଇଁ ପ୍ରେରିତ କରିଥିଲେ।
ରଜର ଆନନ୍ଦ ମଧ୍ୟରେ ଆୟୋଜିତ ଏହି କୁଇଜ୍ ଓ ପୁରସ୍କାର ବିତରଣ କାର୍ଯ୍ୟକ୍ରମ ବସ୍ତିବାସୀଙ୍କ ମଧ୍ୟରେ ଉତ୍ସାହ ଓ ଖୁସିର ପରିବେଶ ସୃଷ୍ଟି କରିଥିଲା। ସାମାଜିକ ସଚେତନତା, ଶିକ୍ଷା ଓ ମନୋରଞ୍ଜନର ସୁନ୍ଦର ସମନ୍ୱୟ ହୋଇଥିବା ଏହି ଆୟୋଜନକୁ ସମସ୍ତେ ଭୁରିଭୁରି ପ୍ରଶଂସା କରିଥିଲେ।
