୭୭ତମ ବନ ମହୋତ୍ସବରେ ଗମ୍ଭାରୀଡିହିରେ ପରିବେଶ ସୁରକ୍ଷା ପାଇଁ ସାମୂହିକ ସଂକଳ୍ପ
ସୁନ୍ଦରଗଡ : ପରିବେଶ ସୁରକ୍ଷା କେବଳ ସରକାରଙ୍କ ଦାୟିତ୍ୱ ନୁହେଁ, ବରଂ ପ୍ରତ୍ୟେକ ନାଗରିକଙ୍କ ସାମାଜିକ ଓ ନୈତିକ କର୍ତ୍ତବ୍ୟ। ଜଳବାୟୁ ପରିବର୍ତ୍ତନ, ଜଙ୍ଗଲ କ୍ଷୟ, ଅନିୟମିତ ବର୍ଷା, ବୃଦ୍ଧି ପାଉଥିବା ତାପମାତ୍ରା ଓ ଜୈବ ବିବିଧତାର ଅବକ୍ଷୟ ଆଜି ମାନବ ସମାଜକୁ ନୂତନ ଚ୍ୟାଲେଞ୍ଜର ସମ୍ମୁଖୀନ କରିଛି। ଏଭଳି ପରିସ୍ଥିତିରେ କେବଳ ବୃକ୍ଷରୋପଣ ନୁହେଁ, ବରଂ ଗଛର ସୁରକ୍ଷା, ଜଙ୍ଗଲର ସଂରକ୍ଷଣ ଓ ଲୋକଙ୍କ ମଧ୍ୟରେ ପରିବେଶ ସଚେତନତା ସୃଷ୍ଟି କରିବା ସମୟର ଆବଶ୍ୟକତା। ଏହି ଉଦ୍ଦେଶ୍ୟକୁ ନେଇ ଜଙ୍ଗଲ, ପରିବେଶ ଓ ଜଳବାୟୁ ପରିବର୍ତ୍ତନ ବିଭାଗ, ସ୍ୱେଚ୍ଛାସେବୀ ଅନୁଷ୍ଠାନ ‘ସେବକ’ ଏବଂ ଗ୍ରୀନ ମେମୋରୀ କ୍ୟାମ୍ପେନ୍ର ମିଳିତ ସହଯୋଗରେ ୭୭ତମ ବନ ମହୋତ୍ସବ ଅବସରରେ ଟାଙ୍ଗରପାଲି ବ୍ଲକର ଗମ୍ଭାରୀଡିହି ଗ୍ରାମରେ ଏକ ବୃହତ ପରିବେଶ ସଚେତନତା ସଭା ଓ ବୃକ୍ଷରୋପଣ କାର୍ଯ୍ୟକ୍ରମ ଆୟୋଜିତ ହୋଇଥିଲା।
ଏହି କାର୍ଯ୍ୟକ୍ରମରେ ସଦର ବିଧାୟକ ଯୋଗେଶ କୁମାର ସିଂହ ମୁଖ୍ୟ ଅତିଥି ଭାବେ ଯୋଗଦେଇ ଗମ୍ଭାରୀଡିହି ଫୁଟବଲ ପଡ଼ିଆ ପରିସରରେ ଚାରା ରୋପଣ କରି ବନ ମହୋତ୍ସବର ଶୁଭାରମ୍ଭ କରିଥିଲେ। ଉପସ୍ଥିତ ଜନସାଧାରଣଙ୍କୁ ସମ୍ବୋଧିତ କରି ସେ କହିଥିଲେ ଯେ, ବର୍ତ୍ତମାନ ସମୟରେ ଜଳବାୟୁ ପରିବର୍ତ୍ତନ ସମଗ୍ର ବିଶ୍ୱ ପାଇଁ ସବୁଠାରୁ ବଡ଼ ଚିନ୍ତାର ବିଷୟ। ପରିବେଶ ସୁରକ୍ଷା ପାଇଁ ସମାଜର ସମସ୍ତ ବର୍ଗର ଲୋକଙ୍କୁ ଏକାଠି ହେବାକୁ ପଡ଼ିବ। ଗ୍ରୀନ ମେମୋରୀ କ୍ୟାମ୍ପେନ୍ର ପ୍ରଶଂସା କରି ସେ କହିଥିଲେ ଯେ, ଜନ୍ମଦିନ, ବିବାହ ବାର୍ଷିକୀ ଏବଂ ଅନ୍ୟାନ୍ୟ ସ୍ମରଣୀୟ ଅବସରକୁ ବୃକ୍ଷରୋପଣ ସହ ଯୋଡ଼ିବାର ଏହି ଅଭିନବ ପ୍ରୟାସ ଲୋକଙ୍କ ମନରେ ପରିବେଶ ପ୍ରତି ଦାୟିତ୍ୱବୋଧ ସୃଷ୍ଟି କରୁଛି। ଆଗାମୀ ଦିନରେ ଏହି ଅଭିଯାନ ଗାଁ ଗାଁ ଓ ଘରେ ଘରେ ପରିବେଶ ସୁରକ୍ଷାର ବାର୍ତ୍ତାବାହକ ସାଜିବ ବୋଲି ସେ ଆଶା ପ୍ରକାଶ କରିଥିଲେ।
କାର୍ଯ୍ୟକ୍ରମଟି ପରିବେଶବିତ୍ ତଥା ସେବକର କାର୍ଯ୍ୟକ୍ରମ ନିର୍ଦ୍ଦେଶକ ଦିଗାମ୍ବର ଉପାଧ୍ୟାୟଙ୍କ ନେତୃତ୍ୱରେ ଆୟୋଜିତ ହୋଇଥିଲା। ସେ ତାଙ୍କ ବକ୍ତବ୍ୟରେ କହିଥିଲେ ଯେ, ଜଙ୍ଗଲ ହେଉଛି ଜଳ, ଜୀବନ, ଜୀବିକା ଓ ଜୈବ ବିବିଧତାର ମୂଳ ଭିତ୍ତି। ଜଙ୍ଗଲ ସୁରକ୍ଷିତ ରହିଲେ ହିଁ ପରିବେଶର ସନ୍ତୁଳନ ବଜାୟ ରହିବ, ଜଳ ଉତ୍ସ ସୁରକ୍ଷିତ ରହିବ ଏବଂ ବନ୍ୟଜନ୍ତୁମାନେ ସେମାନଙ୍କର ପ୍ରାକୃତିକ ବାସସ୍ଥାନରେ ନିରାପଦରେ ବଞ୍ଚିପାରିବେ। ତେଣୁ ବୃକ୍ଷରୋପଣ ସହ ଗଛର ଯତ୍ନ, ଜଙ୍ଗଲକୁ ଅଗ୍ନିକାଣ୍ଡରୁ ସୁରକ୍ଷା, ଅବୈଧ ଗଛକଟା ରୋକିବା ଏବଂ ବନ୍ୟଜନ୍ତୁଙ୍କ ପ୍ରତି ସକାରାତ୍ମକ ଓ ସମ୍ବେଦନଶୀଳ ମନୋଭାବ ଗଢ଼ି ତୋଳିବା ଆମ ସମସ୍ତଙ୍କ ଦାୟିତ୍ୱ। ସେ ଆହୁରି କହିଥିଲେ ଯେ, ଶିଶୁମାନଙ୍କୁ ପ୍ରକୃତି ସହ ଯୋଡ଼ିବା ଏବଂ ପ୍ରତ୍ୟେକ ସ୍ମରଣୀୟ ଅବସରକୁ ଗୋଟିଏ ଗଛ ସହ ସଂଯୋଗ କରିବା ହିଁ ଗ୍ରୀନ ମେମୋରୀ କ୍ୟାମ୍ପେନ୍ର ମୂଳ ଉଦ୍ଦେଶ୍ୟ।
ଏହି ଅବସରରେ ଗମ୍ଭାରୀଡିହି ସରପଞ୍ଚ ରବୀନ ଚନ୍ଦ୍ର ସା, ଉଜ୍ଜ୍ୱଳପୁର ବନାଞ୍ଚଳ ଅଧିକାରୀ ଦେବଦତ୍ତ ନନ୍ଦ, ବନପାଳ ଲେଲିନ ପଟେଲ ଏବଂ ବନରକ୍ଷୀ ଜନ୍ମଜୟ ଜେନା ବନ ମହୋତ୍ସବର ଇତିହାସ, ଉଦ୍ଦେଶ୍ୟ, ଜଙ୍ଗଲ ସୁରକ୍ଷା ଓ ସମୁଦାୟର ଭୂମିକା ଉପରେ ଆଲୋକପାତ କରିଥିଲେ। ସେମାନେ କହିଥିଲେ ଯେ, ବନ ସୁରକ୍ଷା କେବଳ ବନ ବିଭାଗର ଦାୟିତ୍ୱ ନୁହେଁ; ସ୍ଥାନୀୟ ଲୋକଙ୍କ ସକ୍ରିୟ ସହଯୋଗ ବିନା ଏହା ସମ୍ଭବ ନୁହେଁ।
କାର୍ଯ୍ୟକ୍ରମରେ ଗମ୍ଭାରୀଡିହି ଫୁଟବଲ ପଡ଼ିଆର ଚତୁଃପାର୍ଶ୍ୱରେ ୧୦୦ଟି ବିଭିନ୍ନ ପ୍ରଜାତିର ଚାରା ରୋପଣ କରାଯାଇଥିଲା। ଏହି ବୃକ୍ଷରୋପଣ ଦ୍ୱାରା ଆଗାମୀ ଦିନରେ ଖେଳ ପଡ଼ିଆ ଅଧିକ ସବୁଜ, ସୁନ୍ଦର ଓ ପରିବେଶ ଅନୁକୂଳ ହେବା ସହ ସ୍ଥାନୀୟ ଜୈବ ବିବିଧତାର ବିକାଶରେ ସହାୟକ ହେବ ବୋଲି ଆଶା କରାଯାଇଛି।
ଗ୍ରୀନ ମେମୋରୀ କ୍ୟାମ୍ପେନ୍ ବର୍ତ୍ତମାନ ସୁନ୍ଦରଗଡ଼ ଜିଲ୍ଲାରେ ଏକ ଅଭିନବ ଜନଆନ୍ଦୋଳନରେ ପରିଣତ ହୋଇଛି। ଏହା ମାଧ୍ୟମରେ ଲୋକମାନେ ନିଜ ଜୀବନର ସ୍ମରଣୀୟ ମୁହୂର୍ତ୍ତଗୁଡ଼ିକୁ ବୃକ୍ଷରୋପଣ ସହ ଯୋଡ଼ି ପରିବେଶ ସୁରକ୍ଷାରେ ସକ୍ରିୟ ଭାଗୀଦାର ହେଉଛନ୍ତି। ଚଳିତ ବନ ମହୋତ୍ସବ ସପ୍ତାହରେ ଜିଲ୍ଲାର ବିଭିନ୍ନ ଗ୍ରାମ, ବିଦ୍ୟାଳୟ ଓ ସମୁଦାୟ ସ୍ତରରେ ବୃକ୍ଷରୋପଣ, ପରିବେଶ ସଚେତନତା ଓ ଜନଜାଗରଣ କାର୍ଯ୍ୟକ୍ରମ ଅବ୍ୟାହତ ରହିଛି।
ଶେଷରେ ସମସ୍ତ ଉପସ୍ଥିତ ଅତିଥି, ଜନପ୍ରତିନିଧି ଓ ଗ୍ରାମବାସୀ “ଆଜି ଗଛ ଲଗାଇବା, ଆସନ୍ତାକାଲିକୁ ସବୁଜ କରିବା” ବାର୍ତ୍ତାକୁ ସାକାର କରିବା ସହ ଲଗାଯାଇଥିବା ପ୍ରତ୍ୟେକ ଚାରାର ସୁରକ୍ଷା ଓ ନିୟମିତ ପରିଚର୍ଯ୍ୟା କରିବା ପାଇଁ ସଂକଳ୍ପ ନେଇଥିଲେ।
ସମଗ୍ର କାର୍ଯ୍ୟକ୍ରମକୁ ଗମ୍ଭାରୀଡିହି–ବଡବାହାଲପଡ଼ା ବନ ସୁରକ୍ଷା ସମିତିର ସଦସ୍ୟମାନଙ୍କ ସହ ସେବକର ହରିପ୍ରିୟା ନାଏକ, ଅମୀୟ ରଞ୍ଜନ ଲେଙ୍କା, ସ୍ନିଗ୍ଧାରାଣୀ ମହାକୁଳ ଓ ସୁନୀଲ ତ୍ରିପାଠୀ ପ୍ରମୁଖ ସଫଳତାର ସହ ପରିଚାଳନା କରିଥିଲେ।
