ବିଡିଓ ଓ ବିଇଓଙ୍କ ହସ୍ତକ୍ଷେପ ପରେ ୨୧ ଦିନ ପରେ ଖୋଲିଲା ସ୍କୁଲ : ପୁଣି ଶ୍ରେଣୀଗୃହକୁ ଫେରିଲେ ଛାତ୍ରଛାତ୍ରୀ
ଉମରକୋଟ/ଝରିଗାଁ : ଦୀର୍ଘ ୨୧ ଦିନ ଧରି ଜନଆନ୍ଦୋଳନ ଯୋଗୁଁ ବନ୍ଦ ରହିଥିବା ନବରଙ୍ଗପୁର ଜିଲ୍ଲା ଝରିଗାଁ ବ୍ଲକ ଅନ୍ତର୍ଗତ ଇଚ୍ଛାପୁର ପଞ୍ଚାୟତ ସଦର ମହକୁମା ସ୍ଥିତ ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟ ଶେଷରେ ଖୋଲିଛି। ଝରିଗାଁ ବିଡିଓ ମଧୁସୂଦନ ମାଝୀ ଓ ଗୋଷ୍ଠୀ ଶିକ୍ଷା ଅଧିକାରୀ (ବିଇଓ)ଙ୍କ ସକ୍ରିୟ ହସ୍ତକ୍ଷେପ, ଗ୍ରାମବାସୀଙ୍କ ସହ ଦୀର୍ଘ ଆଲୋଚନା ଏବଂ ପ୍ରଶାସନର ପ୍ରତିଶ୍ରୁତି ପରେ ଗ୍ରାମବାସୀ ସ୍କୁଲର ତାଲା ଖୋଲିବାକୁ ସମ୍ମତି ପ୍ରକାଶ କରିଥିଲେ। ଫଳରେ ଗୁରୁବାର ଠାରୁ ବିଦ୍ୟାଳୟରେ ପୁଣିଥରେ ପାଠପଢ଼ା ସ୍ୱାଭାବିକ ହୋଇଛି।
ସୂଚନାଯୋଗ୍ୟ ଯେ, ଉକ୍ତ ବିଦ୍ୟାଳୟକୁ ପ୍ରଥମେ ‘ଫାଇଭ-ଟି’ ଅଧୀନରେ ସାମିଲ କରାଯାଇଥିଲା। ପରବର୍ତ୍ତୀ ସମୟରେ ଏହାକୁ ଗୋଦାବରୀଶ ମିଶ୍ର ଆଦର୍ଶ ବିଦ୍ୟାଳୟ ଭାବେ ମାନ୍ୟତା ପ୍ରଦାନ କରାଯାଇ ଭିତ୍ତିପ୍ରସ୍ତର ସ୍ଥାପନ କରାଯାଇଥିଲା। ତେବେ ଏହି ନିଷ୍ପତ୍ତିକୁ ମୁଣ୍ଡିମାଲ ଏବଂ ଆଖପାଖ ଗ୍ରାମର ବାସିନ୍ଦା ତୀବ୍ର ବିରୋଧ କରିଥିଲେ। ସେମାନଙ୍କ ଅଭିଯୋଗ ଥିଲା ଯେ, ସ୍ଥାନୀୟ ଲୋକଙ୍କ ମତାମତକୁ ଗୁରୁତ୍ୱ ନଦେଇ ଏହି ନିଷ୍ପତ୍ତି ନିଆଯାଇଛି।
ଏହି ପ୍ରତିବାଦକୁ ନେଇ ଗତ ଜୁନ୍ ୧୮ ତାରିଖରୁ ଗ୍ରାମବାସୀ ବିଦ୍ୟାଳୟ ଫାଟକରେ ତାଲା ପକାଇ ସ୍କୁଲ ସମ୍ମୁଖରେ ଧାରଣା ଆରମ୍ଭ କରିଥିଲେ। ପ୍ରତିବାଦ ଫଳରେ ବିଦ୍ୟାଳୟର ସମସ୍ତ ଶିକ୍ଷାଦାନ କାର୍ଯ୍ୟ ବନ୍ଦ ହୋଇଯାଇଥିଲା। ଘଟଣାର ଦୁଇ ଦିନ ପରେ ସ୍ଥାନୀୟ ଅତିରିକ୍ତ ଗୋଷ୍ଠୀ ଶିକ୍ଷା ଅଧିକାରୀ ଦଶରଥ ଗଣ୍ଡ ଘଟଣାସ୍ଥଳରେ ପହଞ୍ଚି ଗ୍ରାମବାସୀଙ୍କ ସହ ଆଲୋଚନା କରିଥିଲେ। କିନ୍ତୁ ସେତେବେଳେ କୌଣସି ସମାଧାନ ବାହାରି ନଥିଲା ଏବଂ ଗ୍ରାମବାସୀ ନିଜ ଦାବିରେ ଅଟଳ ରହିଥିଲେ।
ଦୀର୍ଘ ୨୧ ଦିନ ଧରି ସ୍କୁଲ ବନ୍ଦ ରହିବା ଫଳରେ ଶତାଧିକ ଛାତ୍ରଛାତ୍ରୀଙ୍କ ପାଠପଢ଼ା ସମ୍ପୂର୍ଣ୍ଣ ବ୍ୟାହତ ହୋଇଥିଲା। ବିଦ୍ୟାଳୟକୁ ଯିବା ପରିବର୍ତ୍ତେ ଅନେକ ଛାତ୍ରଛାତ୍ରୀ ଘରେ ରହି ପରିବାରକୁ ସହଯୋଗ କରିବା ସହ ଗାଈ, ମଇଁଷି, ଛେଳି ଓ ମେଣ୍ଢା ଭଳି ଗୃହପାଳିତ ପଶୁ ଚରାଇବା କାମରେ ସମୟ ବିତାଉଥିଲେ। ଏହାକୁ ନେଇ ଅଭିଭାବକ ଓ ଶିକ୍ଷାବିତ୍ମାନଙ୍କ ମଧ୍ୟରେ ଗଭୀର ଚିନ୍ତା ପ୍ରକାଶ ପାଇଥିଲା।
ଗୁରୁବାର ଝରିଗାଁ ବିଡିଓ ମଧୁସୂଦନ ମାଝୀ ଓ ଗୋଷ୍ଠୀ ଶିକ୍ଷା ଅଧିକାରୀ ଗ୍ରାମରେ ପହଞ୍ଚି ଗ୍ରାମବାସୀ, ଜନପ୍ରତିନିଧି ଓ ସମ୍ପୃକ୍ତ ବ୍ୟକ୍ତିଙ୍କ ସହ ଦୀର୍ଘ ସମୟ ଧରି ଆଲୋଚନା କରିଥିଲେ। ପ୍ରଶାସନ ପକ୍ଷରୁ ସେମାନଙ୍କ ଦାବି ସମ୍ପର୍କରେ ଉଚ୍ଚ କର୍ତ୍ତୃପକ୍ଷଙ୍କ ନିକଟରେ ଉପସ୍ଥାପନ କରାଯିବ ଏବଂ ଆଇନସମ୍ମତ ଭାବେ ବିଚାର କରାଯିବ ବୋଲି ପ୍ରତିଶ୍ରୁତି ଦିଆଯାଇଥିଲା। ଏହାପରେ ଗ୍ରାମବାସୀ ସ୍କୁଲ ଖୋଲିବାକୁ ସହମତି ପ୍ରକାଶ କରିଥିଲେ।
ସ୍କୁଲ ଖୋଲିବା ପରେ ଛାତ୍ରଛାତ୍ରୀଙ୍କ ମଧ୍ୟରେ ଉତ୍ସାହ ଓ ଆନନ୍ଦର ପରିବେଶ ଦେଖାଯାଇଥିଲା। ଦୀର୍ଘ ଦିନ ପରେ ସହପାଠୀ ଓ ଶିକ୍ଷକଙ୍କ ସହ ମିଳି ଶ୍ରେଣୀଗୃହରେ ପାଠପଢ଼ା ଆରମ୍ଭ କରିଥିବା ବେଳେ ଅଭିଭାବକମାନେ ମଧ୍ୟ ଆଶ୍ୱସ୍ତ ହୋଇଛନ୍ତି। ଶିକ୍ଷକମାନେ ବକେୟା ପାଠ୍ୟକ୍ରମକୁ ଶୀଘ୍ର ସମାପ୍ତ କରିବା ଏବଂ ଛାତ୍ରଛାତ୍ରୀଙ୍କ ଶିକ୍ଷାଗତ କ୍ଷତିକୁ ଭରଣା କରିବା ପାଇଁ ସ୍ୱତନ୍ତ୍ର ଯୋଜନା କରିବେ ବୋଲି ଜଣାପଡ଼ିଛି।
ସ୍ଥାନୀୟ ଅଞ୍ଚଳରେ ଏହି ଘଟଣା ଏବେ ଚର୍ଚ୍ଚାର ବିଷୟ ପାଲଟିଥିବା ବେଳେ, ଗ୍ରାମବାସୀ ଆଶା ପ୍ରକାଶ କରିଛନ୍ତି ଯେ ପ୍ରଶାସନ ସେମାନଙ୍କ ଦାବି ପ୍ରତି ଯଥୋଚିତ ଧ୍ୟାନ ଦେବ ଏବଂ ଆଗାମୀ ଦିନରେ ଏପରି ପରିସ୍ଥିତିର ପୁନରାବୃତ୍ତି ଘଟିବ ନାହିଁ। ଅନ୍ୟପଟେ, ଶିକ୍ଷାବିତ୍ମାନେ କହିଛନ୍ତି ଯେ କୌଣସି ବିବାଦର ସମାଧାନ ଆଲୋଚନା ମାଧ୍ୟମରେ ହେବା ଉଚିତ୍ ଏବଂ ଛାତ୍ରଛାତ୍ରୀଙ୍କ ଶିକ୍ଷା କେବେ ବି ବାଧାପ୍ରାପ୍ତ ହେବା ଉଚିତ୍ ନୁହେଁ।
