ଉମରକୋଟ /ରାଇଘର:- (୨୭/୦୭/୨୦୨୬)
ନବରଙ୍ଗପୁର ଜିଲ୍ଲା ରାଇଘର ଥାନା ଅନ୍ତର୍ଗତ ଗୋନା ସାପ୍ତାହିକ ହାଟରେ ପୋଲିସର ଏକ ଚଢ଼ାଉରେ ବେଆଇନ ଭାବେ ବିଅର ବିକ୍ରି କରୁଥିବା ଜଣେ ବ୍ୟବସାୟୀଙ୍କୁ ଗିରଫ କରାଯାଇଥିବା ବେଳେ ତାଙ୍କ ନିକଟରୁ ପ୍ରାୟ ୪୫ ଲିଟର ବିଅର ଜବତ କରାଯାଇଛି। ଏହି ଘଟଣା ପରେ ରାଇଘର ଅଞ୍ଚଳରେ ବେଆଇନ ବିଦେଶୀ ମଦ କାରବାରକୁ ନେଇ ପୁଣିଥରେ ଜୋରଦାର ଚର୍ଚ୍ଚା ଆରମ୍ଭ ହୋଇଛି। ମିଳିଥିବା ସୂଚନା ଅନୁଯାୟୀ, ବିଶ୍ୱସ୍ତ ସୂତ୍ରରୁ ଖବର ପାଇବା ପରେ ରାଇଘର ଥାନା ଅଧିକାରୀ ଟିକେଚାନ୍ଦ ବାହୁବଳୀ ଖଟୁଆଙ୍କ ନେତୃତ୍ୱରେ ଏକ ପୋଲିସ ଟିମ୍ ଗୋନା ସାପ୍ତାହିକ ହାଟରେ ଅଚାନକ ଚଢ଼ାଉ କରିଥିଲେ। ଚଢ଼ାଉ ବେଳେ ବିଜେନ୍ଦ୍ର ମଣ୍ଡଳ ନାମକ ଜଣେ ବ୍ୟକ୍ତି ବେଆଇନ ଭାବେ ବିଅର ବିକ୍ରି କରୁଥିବା ଧରାପଡ଼ିଥିଲେ। ପୋଲିସ ତାଙ୍କୁ ଗିରଫ କରିବା ସହ ତାଙ୍କ ନିକଟରୁ ୫୨ଟି ବିଅର ବୋତଲ ଓ ୧୩ଟି ବିଅର କେନ୍, ଅର୍ଥାତ ମୋଟ ପ୍ରାୟ ୪୫ ଲିଟର ବିଅର ଜବତ କରିଛି।
ଘଟଣା ପରେ ସ୍ଥାନୀୟ ଅଞ୍ଚଳରେ ବେଆଇନ ମଦ କାରବାରର ବିସ୍ତାରକୁ ନେଇ ସାଧାରଣ ଲୋକଙ୍କ ମଧ୍ୟରେ ପୁଣିଥରେ ଅସନ୍ତୋଷ ଦେଖାଦେଇଛି। ଅଞ୍ଚଳବାସୀଙ୍କ କହିବା ଅନୁଯାୟୀ, ସରକାରୀ ଭାବେ ରାଇଘରରେ ଦୁଇଟି ଓ ହାଟଭରଣ୍ଡୀରେ ଗୋଟିଏ ଅନୁମୋଦିତ ବିଦେଶୀ ମଦ ଦୋକାନ ଥିଲେ ମଧ୍ୟ, ପ୍ରାୟ ସମସ୍ତ ସାପ୍ତାହିକ ହାଟ ଓ କେତେକ ଦୈନିକ ବଜାରରେ ଖୁଲମଖୁଲ୍ଲା ଭାବେ ବେଆଇନ ବିଦେଶୀ ମଦ, ଦେଶୀ ମିଶ୍ରିତ ମଦ ଓ ପେଣ୍ଡାମ ବିକ୍ରି ଚାଲିଥିବା ଅଭିଯୋଗ ରହିଛି।
ସ୍ଥାନୀୟ ବୁଦ୍ଧିଜୀବୀ ଓ ଅଞ୍ଚଳବାସୀଙ୍କ ଅଭିଯୋଗ ହେଉଛି ଯେ, ଏଭଳି ବେଆଇନ ମଦ ବିକ୍ରେତାମାନଙ୍କଠାରୁ କେତେକ ହାଟ କମିଟି ରସିଦ ଦେଇ ଅର୍ଥ ଆଦାୟ କରି ସେମାନଙ୍କୁ ହାଟରେ ବସି ବ୍ୟବସାୟ କରିବାକୁ ସୁଯୋଗ ଦେଉଛନ୍ତି। ଏହି ଅଭିଯୋଗକୁ ନେଇ ଦୀର୍ଘଦିନ ଧରି ପ୍ରଶାସନଙ୍କ ନିକଟରେ ଅଭିଯୋଗ ହେଉଥିଲେ ମଧ୍ୟ ଏହାର ସ୍ଥାୟୀ ସମାଧାନ ହୋଇପାରିନାହିଁ ବୋଲି ସେମାନେ କହିଛନ୍ତି। ଅଞ୍ଚଳବାସୀଙ୍କ ମତରେ, ବେଆଇନ ମଦ କାରବାର ବଢ଼ିବା ସହ ଅନେକ ସାମାଜିକ ସମସ୍ୟା ମଧ୍ୟ ମୁଣ୍ଡ ଟେକୁଛି। ମଦ୍ୟପାନ ପାଇଁ ଟଙ୍କାର ଅଭାବ ହେଲେ କେତେକ ଅସାମାଜିକ ତତ୍ତ୍ୱ ଚୋରି, ଛିନତାଇ ଓ ଅନ୍ୟାନ୍ୟ ଅପରାଧମୂଳକ କାର୍ଯ୍ୟରେ ଲିପ୍ତ ହେଉଥିବା ନେଇ ମଧ୍ୟ ସ୍ଥାନୀୟ ଲୋକେ ଚିନ୍ତା ପ୍ରକାଶ କରିଛନ୍ତି। ଏହା ସହିତ ଆଉ ଏକ ଗୁରୁତର ପ୍ରସଙ୍ଗକୁ ନେଇ ମଧ୍ୟ ଅଞ୍ଚଳରେ ଆଲୋଚନା ଜୋର ଧରିଛି। ଗ୍ରାମାଞ୍ଚଳରେ ଯେଉଁଠି କେହି ବେଆଇନ ଭାବେ ହାତରେ ରନ୍ଧା ମହୁଳ ମଦ ପ୍ରସ୍ତୁତ କରୁଛନ୍ତି, ସେଠାରେ ଅବକାରୀ (ଏକ୍ସାଇଜ) ବିଭାଗ ତୁରନ୍ତ ଚଢ଼ାଉ କରି କାର୍ଯ୍ୟାନୁଷ୍ଠାନ ନେଉଥିବା ଦେଖିବାକୁ ମିଳୁଛି। କିନ୍ତୁ ଦୈନିକ ଓ ସାପ୍ତାହିକ ହାଟଗୁଡ଼ିକରେ ଖୁଲମଖୁଲ୍ଲା ଭାବେ ବେଆଇନ ବିଦେଶୀ ମଦ ଓ ଅନ୍ୟାନ୍ୟ ମାଦକ ପାନୀୟ ବିକ୍ରି ଚାଲିଥିଲେ ମଧ୍ୟ, ସେଥିପ୍ରତି ଅବକାରୀ ବିଭାଗର ପ୍ରଭାବଶାଳୀ ପଦକ୍ଷେପ ଦେଖିବାକୁ ମିଳୁନାହିଁ ବୋଲି ସ୍ଥାନୀୟ ବୁଦ୍ଧିଜୀବୀ, ଗ୍ରାମବାସୀ ଓ ଅଞ୍ଚଳବାସୀ ପ୍ରଶ୍ନ ଉଠାଇଛନ୍ତି। ତେବେ ଏହି ଅଭିଯୋଗ ସମ୍ପର୍କରେ ଅବକାରୀ ବିଭାଗର ପ୍ରତିକ୍ରିୟା ମିଳିପାରିନାହିଁ। ଅନ୍ୟପଟେ, ଏତେ ପରିମାଣରେ ବେଆଇନ ଦେଶୀ ମହୁଳ ମଦ, ପେଣ୍ଡାମ ଓ ବିଦେଶୀ ମଦ କେଉଁଠାରୁ ଆସୁଛି, କେଉଁ ମାର୍ଗରେ ଗ୍ରାମାଞ୍ଚଳକୁ ପହଞ୍ଚୁଛି ଏବଂ ଏହା ପଛରେ କୌଣସି ସଂଗଠିତ ଚକ୍ର କାର୍ଯ୍ୟ କରୁଛି କି ନାହିଁ, ସେନେଇ ମଧ୍ୟ ସାଧାରଣ ଲୋକଙ୍କ ମଧ୍ୟରେ ପ୍ରଶ୍ନ ଉଠିଛି। ଏହି ସମଗ୍ର ଘଟଣାର ନିରପେକ୍ଷ ତଦନ୍ତ କରି ମୂଳ ଉତ୍ସକୁ ଚିହ୍ନଟ କରିବାକୁ ସ୍ଥାନୀୟ ଲୋକେ ଦାବି କରିଛନ୍ତି। ଏପଟେ ପୋଲିସ ଏହି ଘଟଣାରେ ରାଇଘର ଥାନାରେ ଏକ ମାମଲା ରୁଜୁ କରିଛି। ବେଆଇନ ମଦ କାରବାରର ଉତ୍ସ, ଯୋଗାଣ ବ୍ୟବସ୍ଥା ଏବଂ ଏଥିରେ ଅନ୍ୟ କେହି ସମ୍ପୃକ୍ତ ଅଛନ୍ତି କି ନାହିଁ, ସେନେଇ ତଦନ୍ତ ଜାରି ରହିଥିବା ବେଳେ ଆଗାମୀ ଦିନରେ ବେଆଇନ ମଦ କାରବାର ବିରୋଧରେ ଅଧିକ କଡ଼ା ପଦକ୍ଷେପ ଗ୍ରହଣ କରାଯିବ ବୋଲି ରାଇଘର ଥାନା ଅଧିକାରୀ ଟିକେଚାନ୍ଦ ବାହୁବଳୀ ଖଟୁଆ ସୂଚନା ଦେଇଛନ୍ତି।
